АТ - ФЕРМЕРНӀҢ ХАНАДЫ
24.06.2016
Хабарлар
Пётр Трошкин Шира аймаандағы Хызыл аалда чуртапча. Ол фермер полча, аттар тутча. Пётр Анатольевич, Ағбандағы аал хонии колледжін тоозып, Хызылчардағы аал хонии институдында пӧзік ӱгредіг алған.
Пётрның пабазы Анатолий Иванович ідӧк аттар ӧскірҷең, ӧӧнінде марығларда араласчаңнарны. Хайди чоохтаан П.А.Трошкин, ол 11 частығда ат чарызынаң айғас сыххан. Аймах марығларда сыйыхтығ орыннарға турысчаң. Амды ол позы фермерлер аразында марығлар иртірче. Ағаа сӧбірезі чахсы полысча.
- Пӱӱл 14 майда Чиңіс кӱніне чарыдылған ат чарызын иртіргебіс, - чооғын пастаан П.А.Трошкин. - Хакасиядағы фермерлерні марыға хығырғабыс. Пастағы орынны ІІІира аймааның ӧмезі алған, ікінҷі орынны - Орджоникидзе аймааның ӧмезі, ӱзінҷізін - Таштып аймааның ӧмезі. Ат чарызын иртірерге спонсорлар хабасчалар. Азах Сӧӧт аалдаң «Таныҷах» ансамбльны концертте аралазарға хығырғабыс.
Пӱӱл Шира аймааның администрациязы чахсы полыс пирген. Чыл сай хабазарбыс тіп молҷааннар. Кізілер чыырға, азырирға Максим харындазым полысхан, ол администрацияда тоғынча. Пабам Анатолий Иванович Трошкин паза іҷем Лариса Ивановна ідӧк хабасханнар. Пиҷем Оксана полысчаңох, че, ирге парыбызып, амды Северде чуртапча.
Пётр Трошкиннің кӧрізінең, аттар ӧскірерінде уғаа сизіктіг поларға паза прай чӱреенең тоғысха хынарға кирек.
- Аттарны аймах-пасха чирлердең садызып алчабыс, іди итпезе, олар оох пол парчалар. Таарлағ тарт чӧрҷең аттарны садызып алҷаңмыс, че хулуннарын хысхыда азахха турғызарға сидік. Аннаңар оларны тутпиныбысхабыс. Чарыста араласчаң орловскай порода чортчаң аттар ӧскірчебіс, - чооғын узаратхан фермер.
Ирткен чылларда ол фермерлер аразында иртірілчеткен грант мариинда, пос ахчазы чохтаңар, аралас полбаҷаң. Че пӱӱл марыға пічіктер тимнепче. Хайди теен Пётр Анатольевич, грант утып алза, ол ікі тоғысчы аларға паза фермазар чарытхы тартырарға пӧгінче.
Пиилер тутчатхан ӱчӱн хазнадаң пирілчеткен субсидиялар чахсы хабазығ полча тіп таныхтаан П.А.Трошкин. Малға азых читкіҷе алып алчалар.
Хайдағ сидіксіністерге урунарға килісче фермерге? Мал хадарҷаң орын чидіспинче. Аннаңар часхыда, хыралар таарыл сыхса, чылғыларын тайғазар апарчалар, кӱскӱде индірчелер. Пірееде фермерлер хыраларын кискелек полчалар. Ол туста уғаа сидік чухча. Хысхыда даа фермерлер постарының чирлерін типсирге чаратпинчалар. Аннаңар хыраларын сиденнеп салған ползалар, чахсы поларҷых тіпче Пётр Анатольевич.
- Атты ӧскіріп алары - пір тоғыс, че ат ахча тоғынарға кирек. Ат чарызында пір кӱнде 30 муң салковай утып аларға чарир, - таныхтаан П.А.Трошкин. - Пабамның Кемеровтаң ағылған Памир ады сыйыхтығ ла орыннар алҷаң. Амды киріп парған. Мин андағох аттар ӧскірерге хынчам. Атты марығ полчатхан чирзер апарарға кирек. Ат чарызы ыраххы чирде иртчетсе, таарлағ тартчаң машиналығ апарчабыс. Марығларға тимненчетсе, посха даа, атха даа айабинчазың, че ут полбаза, уғаа ачырғастығ полча.
Чыл сай чайғызын Пётрзар нанҷылары городтардаң тынанарға килчелер. Хайди ол теен, арғыстары атнаң пір хати даа чалаң чӧр килзелер, оларны аттаң чарып аларға сидік. Кӧңнілеріне кірче.
Пётр Анатольевичтің оолғы пар, пабазы нименең айғасчатханын корче. Че хайди чоохтаан фермер, палам, улуғ ӧс парза, позы кӧрер нименең айғазарын, мин аны пір дее нимее кӱстебеспін.
Пётр - ачых-чарых, ӱгредігліг чиит оол. Аның аттардаңар книга пас салар сағыс пар. Ізенербіс, фермер позының сағызын толдырып алар - чонға тузалығ книга чайап салар.
Автор :
Галина ТЮДЕШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы