УЛУҒ ПӰДІРІГЛЕРДЕ ТОҒЫС ТӰЗІМНІГ ПАРЧА
28.06.2016
Хабарлар
Пу кӱннерде Хакасияның пазы Виктор Зимин Ағбанда парчатхан улуғ пӱдіріглерҷе пазох сыныхтағнаң чӧр килді.
Иң пурун ол Г.Я.Ремишевскаяның адынаң имнег туразының наа хирургия корпузын генподрядчиктең имнег учреждениезіне пайрамнығ пирілчеткенінде араласхан. Виктор Михайлович имҷілерні мындағ танығлығ кӱннең алғыстаан паза оларның Хакасиядаң, Тувадаң, Хызылчар крайының ӱстӱнзархы чардығынаң имненерге килген кізілерзер чахсы хайарларына, пӧзік синде полызығ пирерлеріне ізенізін читірген.
Аның соонаң Виктор Зимин республиканың культура-тархын кінінзер парған. Мында тоғыс уғаа ӧткін парча - июньның халғанҷы кӱннерінде мында "Сибер Ил" форум иртер. "Монолитстрой" ООО-ның устағҷызы Разим Абасов Виктор Михайловича иділген тоғыстардаңар чоохтаан паза тимге дее сых париған культура-тархын кінінің ӧӧн залын паза ӱзінҷі хадылын кӧзіт пирген. Республиканың пазы ідӧк ӧӧн директор-проектировщик Валерия Куцебонаң тоғасхан. Хайди таныхтаан Валерия Валентиновна, тиксі Россияда мындағ культура-тархын кіннерінің саны асхынах, аннаңар аның пӱдірии уламох чапсыстығ. Мында итчең ниме ам даа илееде, че прай тоғыстар тузында толдырылчалар. Виктор Зимин тоғыстар тӱзімніг парчатханын таныхтаан паза музейнің тастындағы кӧріміне улуғ хайығ саларға чахығ пирген. Тиксі музей комплексi 2016 чылның декабрьында тузаланысха кирілері кӧрілче.
Ідӧк Виктор Михайлович перинатальнай кіннің пӱдірии хайди парчатханын сыныхтаан. Пу пӱдірігнің устағҷызы Роман Соломонюк, тоғыс хайди парчатханынаңар чоохтап, аның маңнаныстығ толдырылчатханынаңар искірген. Перинатальнай кіннің ӧӧн туразынаң пір тиңе полызығлығ туралар пӱдірілчелер. Машиналар турар гараж прай даа тимнел партыр.
Мындох штаб чыылии ирткен. Аның тоғызында Хакасия пазының пастағы орынҷызы Олег Нам, орынҷызы Ирина Смолина, пӱдіріг паза чурт-коммунальнай хоных министрі Сергей Можаров, культура министрі Светлана Окольникова, хазых хайраллаҷаң министр Наталья Коган, "Монолитстрой" ООО-ның устағҷызы Разим Абасов паза даа пасхалары араласханнар. Чыылығны республиканың пазы Виктор Зимин алғыстас сӧстерінең пастаан: "Пастап пӱдірігҷілерні сӧстерін тутчатхан ӱчӱн алғыстирға сағынчам. Піс, гізең, позыбыстың саринаң алылған обязательстволарыбысты толдырарбыс.
Мында республиканың финанстар министерствозы тоғызын чахсы апарча, оларзар минің сурығлар чоғыл. Пӱӱн кӧрген ӱс объекттің пірсінде пӱдіріг тоғыстары тоозыл пардылар. Ам азылған хирургия корпузынзар наа оборудование аларға пӧгін турча. Анзы, пілдістіг, пір-ікі кӱнге иділ парбас, че ӱрге артызарға чарабазох. Аннаңар ол пӧгіннерні пӱӱл толдыр саларынаңар чоохтас салалар.
Культура-тархын кінінеңер чоохтаза, мында чарытхы паза аны ибіре ӧзімнерні одыртарынаңар сурығларны пӧгерге кирек, олар городтың кӧрімінең палғалыстығ ползыннар. Музей комплексін тузаланысха киреріне ам даа чарым чыл, че, оңдай полза, пӱдіріг тоғыстарын ирте арах тоозыбызарға сіренербіс. Ол олаңай чир-суғ ӱгренҷең музей нимес, мында аннаң пасха филармония, аалҷыларны азыраҷаң орын полар. Паза минің пір сурыныс пар: концерт залы, аның оборудованиезі амғы тустың прай кирексіністеріне нандырзын. Піс пу комплексті республика чуртағҷыларына тимнепчебіс, аннаңар ол турыстығ поларға кирек."
Ідӧк штаб чыылиинда перинатальнай кіннің пӱдіриинеңер чоох парған. Пӱдіріг паза чурт-коммунальнай хоных министрі Сергей Можаров искіриинде тоғыстар кӧрілген графиктең азынада толдырылчатханын таныхтаан. Хакасияның хазых хайраллаҷаң министрі Наталья Коган перинатальнай кінде тоғынар кізілер табыл парғанынаңар искірген. Хайди ол таныхтаан, мында специалисттер чидіспинчеткенінеңер сурығ турбас.
- Прай объекттерні тузында тоозыбызарға кирекпіс, мында, тоғысты толдыр полбин, нимее ле полза сылтанарға киліспес. Аннаңар тоғыстарыңа нандырығлығ хайыңар, - теен, чыылығны тоозып, Виктор Михайлович.
Автор :
Татьяна КЫШТЫМОВА Сомнар Максим АХПАШЕВТИ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы