ИҢ АРТЫХ МЕХАНИЗАТОР ШИРА АЙМААНАҢ
29.06.2016
Хабарлар
ШИРА АЙМААНДА ИРТКЕН НЕДЕЛЯДА МЕХАНИЗАТОРЛАР МАРИИ ИРТКЕН. ШИРАДАҒЫ АГРОТЕХНИКУМЗАР РЕСПУБЛИКАНЫҢ ПРАЙ АЙМАХТАРЫНАҢ МЕХАНИЗАТОРЛАР ЧЫЫЛЫСХАННАР. ШИРАДАҒЫЛАР, ТІЗЕҢ, АЙМАХ АДЫНАҢ ПІР МЕХАНИЗАТОРНЫ МАРЫҒА СЫҒАРҒАННАР ПАЗА "ЦЕЛИННОЕ" ООО ПОЗЫНЫҢ МЕХАНИЗАТОРЫН - ИВАН СИНЬКОНЫ (сомда). ІДӦК МАРЫҒДА АГРОТЕХНИКУМНЫҢ ӰЗІНҶІ КУРСТАҒЫ СТУДЕНТІ АРАЛАСХАН. ТРАКТОР ТІНІН ТУТЧАТХАННАРҒА МАРЫҒНЫҢ ӰС ЧАРДЫҒЫН ИРТЕРГЕ КИРЕКТЕЛГЕН. АВТОДРОМДА ИРЕННЕР ТРАКТОРНАҢ ЧӦРЧЕТКЕННЕРІН КӦЗІТКЕННЕР, ЧАЗЫДА - ХЫРАНЫ ХАЙДИ ТАРТЧАТХАННАРЫН, АНАҢ ЧОЛ ЧӦРІЗІНІҢ ПРАВИЛОЛАРЫН ПІЛЧЕТКЕННЕРІН СЫНЫХТААННАР.
Хакасияның аал хонии паза ас-тамах министерствозы кізілері марығ араласчыларынзар ситкіп кӧргеннер. Автодромда марығ пастир алнында араласчыларға пу чардыхта нимее улуғ хайығ салылары искірілген паза тиксі марығдаңар чоохтааннар. Механизаторларның полғанының на ізебінде удостоверениезі полған, ол чох тракторға одыртпасчыхтар. Механизаторға "тӧңіҷекті", "чыланахты" паза "гаражты" иртібізерге киректелген. Хазна техника сыныхтааның инспекторлары механизаторлар автодромның полған на чардығын орта толдырғаннарын паза нинҷе тусха ирткеннерін сыныхтааннар.
Марығда Алтай аймаа адынаң Дмитрий Щепилов араласхан. Иреннің чооғынаң, ол 10 частығдох трактор тінін тут сыххан. Ағазы тракторист полған. Амды сӧбіре ферма тутча. Ус тӧлнің иреннері амды хада-пірге тоғын парчалар. Асхыс аймаанаң марыға "Бор" КФХ-ның механизаторы Александр Бурнаков килген. Ферма пазы Виталий Боргояков мындох пас чӧрче, тоғынҷызына "ағырча". Александр тракторға 1994 чылда одырған, Виталий Борисович ферма асханнаң сығара анда істен парир.
- Марыға ӧнетін тимненерге маң чоғыл, - чоохтапча Александр Бурнаков, - аннаңар нинҷе пар пілізіме, опыдыма ла ізенерге халча. Марығда пастағызын на араласчатханда, ниме хайди иртчеткенін дее чахсы пілбинчезің, че хорыхчаң ниме чоғыл сағынчам.
Александр БУРНАКОВ (сол саринаң) паза Виталий БОРГОЯКОВ
Виталий Боргояков республикада механизаторлар аразында марығ иртірілчеткеніне чӧпсінче. Аның кӧрізінең, марығдаңар кӧп искірерге кирек, андада чииттерге дее пу тоғыс хынығ полар. Ӱс чулдағылар, Александрның марыға парчатханын ис салғаннарында, аның ӱчӱн ӧрінтірлер.
Пiс чоохтасхан аразында прай механизаторлар автодромҷа чӧрібістірлер. Амды механизаторлар "Целинное" ООО-ның хыраларынзар парчалар. Анда пір чыл тартылбаан хыраларда оларға ӧнетін участоктар тимнел парған. Полғанына ла 40 минутаа тартылҷаң хыра кизегі кӧрілген. Мында кирексіністер уламох кӧп. Хыраның хайди тартылғанын агротехникумның преподавательлері паалааннар. Тоғысха ӱс трактор сығарылған. Аннаңар полған на тракторист жребий тартхан, андар оңдайнаң ол позына трактор паза хыра кизегін таллаан.
Чоохтирға кирек, Хакасия кічіг дее республика полза, анын, чирлері пасхалалча. Тӧӧдегілер паза таштыптағылар хара чирнең тоғынчалар, ширадағыларның хыралары тойлығ, аннаңар сала хатығ. Механизаторлар анзын чахсы пілчелер: олар ирте часхыдаң пасти орай кӱскее теере чирнең тоғынчалар нооза.
"Ростсельмаштың" хызыл футболкаларын кискен ӱс чарғыҷы ырахтынох кӧрінчеткен. Хыраҷыларның соонҷа линейкалығ пазыс чӧргеннер, чирнің нинҷе тирең хазылғанын сыныхтааннар. Олох туста шатер алтында тракторнаң тузаланарынҷа паза чол чӧрізінҷе механизаторларның пілістерін сыныхтааннар.
Чиңісчілерні, тізең, Наа чир аалда чеестееннер. Пастап ӱзінҷі орынға турысхан механизаторны - Алтай аймаанаң Дмитрий Щепиловты - хығырғаннар, анаң ікінҷі орынға турысхан механизаторны - Ағбан пилтірінең Андрей Щипинні. Иң артых механизатор полыбысхан "Целинное" ООО-ның механизаторы Иван Синько. Тӧрт чыл трактор тінін тутчатхан ирен иң артых полыбызарын сағыбаанға тӧӧй. Алында скотник паза конюх
полған даа полза, иреннің ағазынаң пабазы тракторнаң тоғынғаннар. Механизатор тоғызы кӧңніне кірче. Сағынчабыс, ӱс оолааның піреезі пабазының чолынҷа парарох.
Чиңісчілер паза араласчылар ахчалығ сыйыхтарға турысханнар. Пастағы орынға сыххан механизаторға 25 муң салковай читірілген, ікінҷі орындағызына - 20 муң, ӱзінҷізіне - 15 муң, сыйыхтығ орын албааннарға -5 муң. Аннаң пасха иң чиит араласчы таныхталған. Ол агротехникумның студенті - Вячеслав Чебунин.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде