СИБИРЬДЕГӀ УЛУҒ РЕГИОННАРНЫ ДАА АСЧАБЫС
12.07.2016
Хабарлар
Устағҷылар санына нинҷе бюджет ахчазы килісчеткені хоостыра Хакасия Сибирьдегі федеральнай округта 5-ҷі орында пол парған. Пу син бюджеттегі ахчаны паза чуртағҷылар санын кӧре тӧстелче. Іди 2015 чылның салтарларынҷа Хакасияда пip чуртағҷаа 47 муң салковай бюджет ахчазы киліскен.
Таныхтирға кирек, пістің син Сибирьнің пасха улуғ регионнардағыларнинаң даа кӧп арах. Кӧзідімге, Хакасия Иркутск, Новосибирск, Кемеров паза Омск областьтарын ас парыбысхан. Оларның, тиңнестіріге, пip чуртағҷаа 31 муңар салковай бюджет ахчазы килісче.
Олох туста республика бюджеді, алындағы чыллардағыох чіли, ӧӧнінде социальнай кӧстегліг полып халча. Республиканың прай хорадығларының 70 процентi социальнай обязательстволарнаң палғалыстығ. Ол обязательстволарның сині, тізең, чылдаң чылға ӧзіп одырча. Ол ӧзіс ідӧк Россия президентінің бюджет тоғынҷыларына чал ахчазын ӧскірерінҷе указтарын толдырарына теелче. Пу хорадығлар 40 процентке читкеннер. Ідӧк республика бюджеді хорадығларының пілдірте чардығы имнег киреендегі, ӱгредігдегі паза чуртағҷыларға социальнай хабазығ пирер сферадағы обязательстволарны толдырарынаң палғалыстығ. Чоох парча улуғ частығларға, ветераннарға, пенсионерлерге, кӧп палалығ сӧбірелерге, ӧкіс палаларға паза хазна саринаң хайығ кирексіпчеткен пасха даа чуртағҷыларға социальнай хабазығ пирер оңдайлардаңар. Тиксі саназа, Хакасияда социальнай хорадығларның сині 15 миллиард салковайны ас парча.
Республиканың ӧӧн кӧстеглері санына социальнай объекттернің (олған садтары, школалар, имнег туралары, ФАП-тар, культура туралары) пӱдірии, тыхтаа паза оларны тудары кірче. Ирткен чылларда онарлап наа объекттер пӱдірілген. Оларның полғаны ла бюджеттің хорадығларын ӧскірче.
- Че піс ӧнетін социальнай обязательстволарны хызырарына парбинчабыс, анзынаң пістің чуртағҷыларның чуртас сині кӧні палғалыстығ нооза. Ӱлгӱнің прай органнары алнында пасха пӧгін - парыстарны ӧскірері, - теен республика устағҷызы Виктор Зимин ирткен чылның декабрьында, Хакасияның халых чонынзар айланыснаң чоох тутхан туста. - Иң кирек кӧстег федеральнай кіннең тоғынары полча. Ол тоғыстың салтарларынҷа 2015 чылда республиказар экономика отрасльларын тилідеріне хоза 1 миллиард 300 миллион салковай кірген. Ағаа хоза, піс республика бюджедінің пос парыстарын ӧскіріп алғабыс 1 миллиард 615 миллион салковайға алай алындағы чылдағызынаң 12,7 %-ке кӧп.
Экономика саринаң сидіксіністер пар полза даа, хоза ахча киргені паза пос парыстарын ӧскіргені Хакасияа нинҷе-де чыл мының алнында танығлығ социальнай проекттерні чуртасха кирерге оңдай пирген. Чоох парча республиканың имнег туразының сигіс хадыллығ имнег корпузынаңар, республиканың музей-культура кінінеңер, перинатальнай кіннеңер.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы