ТУРАЛАР НААҶЫЛАЛЧАЛАР, ЧУРТАҒҶЫЛАР ӦРІНЧЕЛЕР
12.07.2016
Хабарлар
Пу кӱннерде Хакасияның кӧп квартиралығ тураларының тиксі тыхтағ тоғыстары фондының директоры Антон Иванов Харатас городта сигіс турада тыхтағ тоғыстары хайди толдырылғанын сыныхтаан. Подрядчиктер иргі тураларның хырларын паза тастын нааҷылааннар, инженернай системаны алыстырғаннар.
Пурнада Антон Александрович КСК поселоктағы 3 № тураның алыстырылған хырын кӧрген.
- Пӱӱл піс пу тураның хырын алыстырғабыс. Пазағы чылда инженернай системаны нааҷылирбыс, соонаң тураның тастындағы кӧрімін иптирбіс, - чоохтаан ол. - Подрядчик «Ремстрой» ООО полча, директоры - Леонид Кораблев. Пӱдірігҷілер тоғыстарын чахсы паза тузында толдырыбысханнар, салтарларына чӧпсінчем.
- Пӱдірігҷі ооллар морсымнығ тоғынғаннар, - кӧңнінең ӱлесче 3 № тураның чуртағҷызы Геннадий Филиппов. - Ынағ бригада. Олар 8.00 часта иртен, киліп, тоғысха чапсынҷаңнар. Иблерінзер 22.00 часта ла, тасхар пӱлескі полыбысса ла, тарасчаңнар. Пірее-пірее ле туста чей ізерге хырдаң тӱсчеңнер. Ікі неделя аразына турабыс наа хырнаң чабыныбысхан. Ооллар пістің турада паза Матросовтың орамазында тоғынғаннар. Мында аар тоғыс полза, кӧзідімге, листтерні хырзар тазирға киректелзе, пеер илееде пӱдірігҷі ысчаңнар. Тоғыс аар полбаза, ӱс-тӧртче оол хайынҷаң.
Анаң Черногорскай орамадағы 117 паза 117 а №№ тураларзар парғабыс. Иргі туралар амды саңай наа кӧрімніг турғлабыстырлар. Кӧрерге дее иптіг пілдірген, харах ӧрінче. Пу ікі тураның хырлары даа, тасты даа прай нааҷылал партыр. Анда чуртапчатхан чуртағҷыларның даа кӧңнілері кӧдіре.
- Тыхтағ тоғызында сидіксіністер тоғаспинча, - чоохтапча «НВФ-Строй» ООО-ның директоры Евгений Павлов. - Хакасияның тиксі тыхтағ тоғызы фондынаң ікінҷі чылы тоғынчабыс. Чуртағҷылар толдырған тоғызыбысха хомзынминчалар.
Таныхтирға кирек, Харатас чуртағҷылары тиксі тыхтағ тоғызы ӱчӱн тӧлегні чахсы тӧлепчелер. Пӱӱл пу городта 66 тураны нааҷылиры кӧріл парған. 34 турада, тізең, тыхтағ тоғызы айныпча.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде