ХАДА-ПІРГЕ ТОҒЫНАРДАҢАР ЧӦПТЕЗІГ
26.07.2016
Хабарлар
Ирткен неделяда Хакасия пазы Виктор Зимин паза «Синостил инжиниринг и технологии» ООО-ның ӧӧн директоры Ван Дзянь тоғасханнар. Олар хада-пірге тоғынар оңдайларны ӱзӱргеннер. Хыдат компаниязы республикада «Чек-Су» компания хоостыра марганецті анир проекттi чуртасха кирерінде араласча. Хакасияның ӱлгӱлері компанияның устағӌызынаң тоғазығны чидікпин сахтааннар. Республикада сидік оңдайларға кір парған тимір аныпчатхан предприятиелер пар, «Синостил» компания, тізең, чир ис-пайын анирынаң айғасча, аннаңар аны предприятиелерні азахха турғызар проекттерзер тартарға пӧгінчелер пістің ӱлгӱлер.
Хакасия пазы Виктор Зимин, пасха хан чирінің аалчыларын удурлап, республиканың социальнай паза экономика чуртазынаңар чоохтаан, ӧӧн хайығны ӧңніг паза хара металлургия тилізіне айландырып. Пӱӱнгі кӱнде чахсы тиліс кӧзітчелер алюминий заводтары, фольга сығарызы, хара тас промышленнозы. Олох туста Ағбандағы рудник улуғ сидіксіністерге кір парғаны таныхталған, итсе, тимірліг орында чыындылар илееде чылға чидер осхас. Аннаң пасха республика пазы региондағы чоллардаңар чоохтаан, ол санда чоннар аразындағы аэропорттаңар, хайзы хайдағ даа самолёттарны удурлирға тимде. Ідӧк республикада тимір чол чахсы тиліпче.
Нандырығлығ сӧзінде Ван Дзянь республиканың пай чир-чайааның чалахай чуртағӌыларын таныхтаан. Аның сӧстерінең компанияның паза Хакасияның хада-пірге тоғынӌаң кӧп оңдайлар пар. Компания республиканың проекттерін ӱзӱрерге тимде.
Аалӌыларны ідӧк Хазна Думазынзар Хакасиядаң табылған депутат Надежда Максимова удурлаан. Ол Россияның паза Хыдаттың хада-пірге тоғынчатханы регионға паза компанияа хада тоғынҷаң чахсы оңдайлар пирчеткенін таныхтаан. Ідӧк депутат республика ӱлгӱлері регионда инвесторларға килістіре оңдайлар тӧстепчеткенін махтаан. Чидіглернің пірсі - Хакасия 2017 чылдаң сығара алнынӌа тиліпчеткен территория полыбызары. Аның сылтаанда регионда бизнеске ӧнетін налог льготалары пирілер паза пасха оңдайлар кӧрілер.
Тоғазығда Хакасияның экономика министрi Татьяна Пауль, Абазада тимір анып, аннаң ниме-ноо сығарызын азарынаңар проектнең таныстырған. Пӱӱнгі кӱнде Ағбандағы рудник тимір анирынаң на айғасча. Наа проект хоостыра хайылдырған тимір мындох ниме-ноо сығарҷаң заводсар парар, хайзы тимір ниме-нооларын тимнир, оларның садиинаң айғазар. Пілдістіг, проект городха даа, республикаа даа улуғ туза ағылар. Че аны чуртасха кирҷең инвестор киректелче.
Пӱӱнгі кӱнде «Синостил инжиниринг и технологии» ООО пу проектті чуртасха кир полар инвесторларның пірсі полча. Компания Хыдатта ла нимес, пасха даа хазналарда аймах проекттернең тоғынча, ол санда Австралияда, Ӱстӱнзархы Африкада, Индияда, Сингапурда, Бразилияда, Германияда.
Тоғазығ хайзы даа сарина тузалығ чӧптезігде хол салғанынаң тоозылған. Республика пазы Виктор Зимин паза «Синостил инжиниринг и технологии» ООО-ның ӧӧн директоры Ван Дзянь 2016 - 2020 чылларда социальнай паза экономика сурығларынӌа хада-пірге тоғынардаңар чӧптезігде хол салғаннар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы