УЛУҒЛАРЫНЗАР КӦРЕ, КӰСТІГ ПОЛАРҒА ТАРТЫЛАР
26.07.2016
Хабарлар
Советтер тузындох Таштыпта прай чонның кӱзінең уғаа чахсы стадион пӱдірілген. Аалға килістіре аны «Урожай» тіп адап салғаннар. Позының чуртазында нинҷе ле марығлар иртір салды ни ол стадион? Анда спорт ла нимес, пасха даа аймах-пасха ӱлӱкӱннер иртірілӌең. Че тус позының киреен итлече: ағастаң пӱдірілген трибуналар, ӧӧн тура іріктеп парғаннар. Оларны нааӌылирға илееде хорадығлар кирек полған. Аннаңар аймахтың устағ-пастаа саңай пасха, амғы чуртасха килістіре спорткомплекс пӱдірерге чарадығ алған.
Иргі пӱдіріглерні чирнең тиңнебіскеннер, орнында тимірдең, пластиктең наа трибуналар турғызыбысханнар. Трибуналар кистінде, тізең, иптіг кӧрімніг спортзал турғыс салғаннар. Сынында, пӱдіріг 3-4 чылға сӧӧ тартыл парыбысхан. Пастап ахча чох полған. Че хайдағ даа сидіксіністер учураза, кӱстензе, кирек алнынзар чыллача нооза. Іди 2015 чыл тоозылчатханда трибуналар, спортзал тимде полғаннар. Че итчең тоғыстар ам даа халған, спорткомплексті кӧместең тузаланысха киріп пастапчалар, Пеер волейбол, теннис ойнирға кил парчалар. Марығлар ам даа иртіргелектер. Че от айының пастағы кӱннерінде спорт марығларына пу спортзалзар чол азыл парды. Пастағҷылар полдылар Таштып аймаа администрациязы тоғынӌыларынаң ветераннар. Олар волейболҷа тоғазығ иртіргеннер.
Хайди ойын парғанын чоохтап пирерге сидік тее, аны кӧрерге кирек полған. Волейбол ойнаӌаң площадкада чииттернің чапчаңы, табыраа паза улуғларның узы, опыды хабыза халғаннар тиирге чарир. Ойын пастағы тоғазығда тиңнең тиңе парған. Че кем-де утарға кирек нооза. Талаан ветераннарға кӱлінібіскен. Пастағы ойында олар чиңіс тутханнар. Че чииттерні азарға кӱстері паза читпин халған. Халғанӌы ӱс тоғазығда администрацияның ооллары алнында полғаннар. Іди тоғазығ 4:1 саннаң тоозылған.
Ветераннарның аразында частан парған волейболист Виктор Алексеевич Тиспиреков полған. Ол 68-ҷі чазын апарча. Че ам даа чииттердең пір дее халбинча. Хысхызын саналығ чарысчатхан марығларда сыбыра араласча, чиңісчі полча. Ӧсчеткен тӧлге чахсы кӧзідім нимес пе?
Тоғазығ тоозылған соонда, Таштып аймаа администрациязының спортча, туризмңе паза чииттер киреенҷе пӧлиинің устағӌызы Виктор Венарьевич Тормозаков чоох тудып таныхтаан:
- Пу пӱдіріп алған спорткомплексте иртірілген марығнаң піс аймахта спортты тилідерінде наа чол асчабыс. Ізенчем, амды пасха даа кӧрімнерде мындағ тоғазығлар удаа иртір турарбыстар. Чииттерібістің узын таптирбыстар, наа чемпионнар ӧскірербістер.
Минің кӧрізімнең, пу тоғазығда пір команда пірсін утып алғаны ӧӧні нимес. Мында ынағлас, спортха, хазых чуртасха хыныс чиңіс тутхан. Чиит тӧл, улуғларынзар кӧре, ідӧк чапчаң, кӱстіг поларға тартылар. Спортнаң айғасчатхан кізінің арағанаң, тамкынаң, наркотиктернең позының хазиин чох идерге сағыс таа чох полча нооза.
Хайди сыбыра таныхтапча аймахтың пазы Василий Иванович Шулбаев, хайдағ даа тоғыста істі-тастынаң хазых, сыдамах ла кізі пӧзік чидіглерге чидер. Андағ полар ӱчӱн, спортха хынарға кирек.
Автор :
Георгий КУНУЧАКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы