ОЛҒАННАРНЫҢ ӦРІНІЗІ
27.07.2016
Хабарлар
ЧЫЛ САЙ ТАШТЫП АЙМААНЫҢ КІЧІГ ЧУРТАҒӋЫЛАРЫНА СЫЙЫХТАР ТИМНЕП ПИРЧЕЛЕР. ААЛЛАРДА АЙМАХ ПРОГРАММАЛАР ХООСТЫРА ОЛҒАННАРҒА СПОРТНАҢ АЙҒАСЧАҢ, ОЙНАӋАҢ ОРЫННАР ПӰДІРІЛЧЕ.
ПУ ЧАЙҒЫЗЫН ПАЗОХ ПІР КІЧІГ ААЛДА ПАЛАЛАРҒА ӦРІНІС СЫЙЛАП ПИРДІЛЕР: ЧОҒАРХЫ СИРДЕ (АНЫ ӦЛЕҢ ЧАЗЫ ТІПЧЕЛЕРӦК) ОЛҒАННАРҒА ЧАЙҒЫДА ПОС ТУСТЫ ТУЗАЛЫҒ ИРТІРӋЕҢ ОРЫН ТИМНЕЛ ПАРҒАН.
Пу орынны пӱдірерге Таштып аймааның ветераннар паза кинектер чӧбінің кнезі Наталья Николаевна Канзычакова паза Индіркі Сир аал чӧбінің пазы Евгений Васильевич Камалов кӧп кӱс салғаннар. Наталья Николаевна грантха пічіктер тимнеен. Аалдағыларның ӧрінізіне, грант хоостыра 200 муң салковай ахча пирілген. Ағаа олғаннарға ойнаӌаң тиріглер алылған.
21 июльда Ӧлең чазыда ӱлӱкӱн полған. Олғаннарнаң ӧрініснең ӱлезерге, оларға сыйыхтар читір пирерге килгеннер Хакас Республиканың істеніс паза социальнай тиліс министрi Наталья Николаевна Карамашева, Таштып аймаандағы чонға полызығ пирҷең пӧліктің устағӌызы Марина Георгиевна Сагалакова, ветераннар паза кинектер чӧбінің кнезі Наталья Николаевна Канзычакова, аймахтың устағ-пастаандағы спортча, туризмҷе паза чииттер киреенҷе пӧлік устағӌызы Виктор Венарьевич Тормозаков, олох пӧліктің ӧӧн специализі Николай Николаевич Иптышев.
Килген аалӌыларның полғаны ла аал чуртағӌыларын, ӧӧнінде олғаннарны, чылығ алғыстааннар, сыйыхтар читіргеннер.
- Мин пу аалда тӧреем, ӧскем, - теен Наталья Николаевна Канзычакова позының чооғында. - Пістің олған тузында мындағ спортнаң айғасчаң, ойнаҷаң орыннардаңар сағыста даа чох полҷаң. Часхыда, хар хайылып, чир хуруп парзох, мерчік саап ойнаҷаңмыс. Паза позыбыс сағынып алған даа ойыннар ойнаҷаңмыс. Амғы тӧл уғаа чахсы оңдайларда чуртапча, кӧзідімге пу даа пӱӱнгі орынны алза. Хазна полызығ пирче. Аннаңар айланчам чиит тӧлзер: хайраллаңар мындағ чахсы, сіліг тиріглеріңні.
Ӱлӱкӱнде прай даа, теедег, сыйыхтар спортнаң палғалыстығ полғаннар.
- Пу аалдаң чахсы спортсменнер сығарына ізенчебіс. Амды сірернің спортнаң айғасчаң орыннарың, тиріглерің пар, - таныхтаан позының чооғында Виктор Венарьевич Тормозаков.
Сыннаң даа, аал аразынҷа изеп чӧргенче, пеер киліп, кӱс алынып алчатса, тузазы кӧріндіре полбас па? Улуғ спортсмен дее полбаза, че кізі пик хазыхтығ поларына ікінҷілес чоғыл. Амды Ӧлең чазыдағы чииттерге оңдайлар пар.
Автор :
Георгий КУНУЧАКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы