АСХЫС АЙМАА ЧУРТАҒҶЫЛАРЫНЫҢ ӦРІНІЗІ
29.07.2016
Хабарлар
ПУ КӰННЕРДЕ ХАКАСИЯНЫҢ ПАЗЫ ВИКТОР ЗИМИН ТОҒЫС ЧОРЫҒЫНАҢ АСХЫС АЙМААНДА ПОЛ КИЛГЕН. ПАСТАП ОЛ АСХЫС ПОСЁЛОКТА ТИМІРЧОЛӋЫЛАР ӰЛӰКӰНІНЕ ТИМНЕНІС ХАЙДИ ПАРЧАТХАНЫН СЫНЫХТААН.
ПУОХ КӰНДЕ ОЛ АСХЫС ААЛЗАР ЧӦРГЕН. МЫНДА ВИКТОР МИХАЙЛОВИЧ ИРГІЛЕН ПАРҒАН ТУРАЛАРДАҢ КІЗІЛЕРНІ КӦЗІРЕР ПРОГРАММА ХООСТЫРА НАА ТУРА ТУЗАЛАНЫСХА КИРІЛЧЕТКЕНІНЕ ЧАРЫДЫЛҒАН МЕРОПРИЯТИЕДЕ АРАЛАСХАН. ХАКАСИЯНЫҢ ПАЗЫ ОН ПІР СӦБІРЕЕ НАА ЧУРТТАРНЫҢ КЛӰСТЕРІН ЧИТІРГЕН.
Асхыс станцияда республиканың устағҷызын паза Хызылчар тимір чолының пастых орынӌызы Дмитрий Василиадині поселок чӧбінің пазы Сергей Энграф удурлаан. Ол Виктор Михайловичке ӱлӱкӱн таныхтирына пӱӱнгі кӱнде ниме иділ парғанын кӧзіткен.
Таныхтирға кирек, пӱӱл поселоктың кӧрімі тың алыс парған, аны чахсыландырарынҷа уғаа кӧп тоғыс иділтір. Иң пурун кізі хайиин чазағлығ тимір чол вокзалы тартча, ол пӱӱнгі кӱнге килістіре кӧрімніг пол партыр. Ибіркізін дее прай иптеп салтырлар. Прай чирде сіліг чолыӌахтар, газон, чахайахтар. Перронда, тізең, Черепанов харындастарның пастағы паровозының македі турча. Вокзалдаң ырах ниместе Илбек Ада чаа матырларына чарыдылған хумартхы комплекс турча, ол ӱлӱкӱнге нааҷылалғанох. Тыхтағ тоғыстары ідӧк станцияның полызығлығ паза административнай тураларында иртірілгеннер.
Виктор Зимин, Асхыс поселоктағы школа-олған садынаң сығара стадионға читіре чазағ парып, поселоктың кӧрімін иптирінӌе иділген тоғысты паалаан. Ідӧк ол Культура туразынзар кірген, мында тыхтағ тоғыстарын иртірерге киректелчеткенін таныхтаан. Пу чоохтазығда поселоктын, ағырсымнығ сурығлары кӧдірілген. Иң пастағызы - музыка школазына тура кирек. Пӱӱнгі кӱнде ол Культура туразында орныхча, че мында орын уғаа асхынах. Кӧг тиріглерінең ойнирға, сарнирға сағынчатхан палаларның саны кӧп, че прайзын мында сыындырып алҷаң оңдай чоғыл. Ікінӌізі - ортымах школаның ікінӌі корпузында тыхтағ тоғыстарын иртірері. Хырны тыхтир сурығ кӧместең орнынаң тибірепчетсе, кӧзенектер алыстырарында сидіксіністер пар. Хакасияның пазы орынҷыларына пу сурығны пір ай чарым аразына пӧгібізерге чахығ пирген. ДК-ны тыхтирын 2018 чылға планға кир саларға чахаан.
Халғанӌызын Виктор Михайлович стадионны кӧріп алған. Тимірчолӌылар ӱлӱкӱніне чарыдылған мероприятиелер ӧӧнінде мында иртерлер. 5-6 чыл мының алнында мында сайбал парған туралар ла турчатханнар, амды, тізең, мында 800 орынға кӧрілген сіліг стадион, хайзында кічіг-улуғлар пос тустарын хынып иртірчелер.
Сергей Энграф мындағы ойын чазызы, прай даа республиканы алып алза, иң артых полар тіп таныхтаан. Ол Виктор Михайловичке, мындағ тынағ орнын пӱдірерге полысхан ӱчӱн, алғызын читірген.
Аннаң андар Виктор Зимин Асхыс аймааның кінінзер чол тутхан. Мында ол аал чуртағҷыларына наа тураларының клӱстерін читірген. Школьнай ораманың 6 № туразы кізілерні иргілен парған туралардаң кӧзірер программа хоостыра пӱдірілген. Аның пӱдіриине ӧӧнінде федеральнай бюджеттең ахча хорадылған. Хайди чоохтаан Хакасияның пӱдіріг паза ЖКХ министрi Сергей Можаров, ӱс хадыллығ тураның пастағы подъезді ирткен чылда тузаланысха киріл парған, амды ікінӌізінде кізілерге чурт пирілче. Ідӧк тӱрчедең ӱзінңі подъезді тимнел парар.
Ікінҷі подъездте прай 12 квартира, оларның он пірі кізілерні иргілен парған туралардаң кӧзірер программа араласчыларына пирілген. Пір хадылда тӧртер квартира: 2 - пip комнаталығ квартира, 2 -ікі комнаталығ, оларның улии 40 - 62 кв. метрге тиңнелче. Пу программаны толдырчатханы хоостыра Асхыс аймаа иң артыхтарның санына кірче тіп таныхтаан Сергей Можаров.
Чуртағҷыларның ӧрінізіне, наа квартираларның клӱстерін оларға Хакасияның пазы позы читірген.
«Пӱӱнгі кӱн Асхыс аалның чуртағҷыларына уғаа танығлығ полча тізе, пір дее саба полбас. Кізілерні иргілен парған туралардаң кӧзірер программа хоостыра тиксі республикаҷа 1 млрд салковай азыра ахча хорадылған. Амғы тусха піс иргі туралардаң 1,5 муң кізіні кӧзір салғабыс. Минің сағызымнаң, анзы хазна, республика правительстволарының, президенттің, муниципалитеттер устағ-пастааның ӧӧн пӧгіннерінің пірсі полча. Кізілерні наа тураларзар кӧзіріп, оларның чуртас оңдайларын на чахсыландырбинчабыс, піс ідӧк оларның чуртастарын хорғыс чох итчебіс. Прайзын пу чалахай кӱннең алғыстапчам, хазых, часкалығ полыңар!» - теен Виктор Михайлович.
Ідӧк наа чуртсар кӧсчеткеннерні Асхыс аймааның пазы Абрек Челтыгмашев паза аал чӧбінің пазы Марина Анжиганова алғыстааннар. Наа чурт алғаннарның иң улуғ частығ чуртағӌызы Нина Чучунова полған. Ағаа ам 81 час. Колхозта, Калининскай совхозта кӧп чыллар тоғынған. Амды ол оолғынаң пір квартирада чуртапча, наа турада чурт пирілгеніне уғаа ӧрінче. Ууӌа, оңдай полғанда, Виктор Михайловичке паза Асхыстың устағ-пастаана, мындағ сыйых ӱчӱн, чылығ алғыс сӧстерін читірген.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде