ЧИИТТЕРНІ ПІРІКТІРЧЕТКЕН ФЕСТИВАЛЬ
03.08.2016
Хабарлар
ПУ КӰННЕРДЕ САЯНОГОРСК ХЫРИНДА ОРНЫХЧАТХАН «КӰН ЧАХАЙАҒЫ» СПОРТКОМПЛЕКСТЕ ЧУРТАС АҒЫНЫ ХАЙНАБЫСТЫ. МЫНДА 1 АВГУСТТАҢ «ЭТНОВА-2016. ЧЫЛЫҒ СИБИРЬ» ЧИИТТЕРНІҢ ФЕСТИВАЛЬЫ ПОЗЫНЫҢ ТОҒЫЗЫН ПАСТАБЫСТЫ.
Чоннар аразындағы чииттер фестивальы пӱӱл алтынҷы хати иртче. Пу тус аразына «Этнова» чииттернің иң хынған фестивальларының пірсіне айлан парған. Оол-хыстар, чыылызып, аймах проекттер тимнепчелер, марығларда араласчалар, хада тоғынарға ӱгренчелер. Пӱӱл «Этновада» сигіс ачых тоғынар: «Чиит ученайларның паза ӱгретчілернің лабораториязы», «Син - пос идінӌек», «Аттар туризмі», «Чииттернің киректерінҷе команда» паза аннаң даа пасхалары. Фестивальда пӱӱл 220 оол паза хыс араласча. Олар Германиядаң, Казахстаннаң, Кыргызстаннаң, Тувадаң, Санкт-Петербургтаң, Москвадаң, Сургуттаң, Иркутсктаң, Липецктең килгеннер. Че чииттернің кӧбізі Хакасияның чуртағҷылары полчалар.
«Этнова» - кӧс чӧрчеткен фестиваль. Пастағызын ол Шира аймаанда ирткен, 2015 чылда чииттер Асхыста чыылысханнар, пӱӱл, тізең, Саяногорск хыринда. Андағ оңдайнаң фестивальный араласчылары Хакасияның аймах пулуңнарынаң танысчалар. Пастағы кӱнде мында чиит идінӌектернің чырғалы тоғынған. Олар прайзы даа бизнеснең 2015 алай 2016 чылларда айғас сыхханнар. Тимир паза Мария Борчиковтар «Сибирьде тӧреен» фирманы 2015 чылда 13 декабрьда тӧстееннер. Чиит ирепчі кип-азах тікче паза аймах чазанӌыхтар итче. Тимир Александрович чоохтапча: «Ипчімнең хада тоғынчабыс. Садығ Интернет пастыра парча». Пос идінӌектерге чахығлар Австралиядаң ала килчеттір.
«Азахха турып аларға хоза тус паза ахча киректелче, - узаратча чооғын Тимир Борчиков, - ізенчебіс, киректерібіс килізер». Максим Хегай ідӧк кип-азах сығарчаттыр. Чиит кізі 2016 чылда февраль айда тоғынарға пастаан. Ол таныхтаан: «Ирткен кӱскӱзін Хакасияда «Син пос идінӌексің» тіп программа тоғынған. Ікі ай аразына кӧп тузалығ ниме піліп алғам, анаң бизнеснең айғас сыххам». Кип-азахты Максим Интернет паза магазиннер пастыра сатчаттыр. Максимнің чооғынаң, «Этновада» ол пастағызын на араласча, кӧп наа ниме піліп аларға паза кізілернең танызып аларға сағынча.
Сизінгенде, чииттернің кӧбізі чоннар аразындағы фестивальда хати-хати араласчаттыр. Кӧзідімге, аал хонии наукаларының кандидады Виталий Чагин «Этноваа» ӱзінӌі хати килген. Ол тіпче: «Мин ХГУ-да ӱгретчі полып істенчем. Фестиваль тузында кӧп аймах сурығлар пӧкчебіс, аймах мастер-класстарда араласчабыс. Пістің ачых «Чиит ученайларның паза ӱгретчілернің лабораториязы» тіп адалча, Чыл сай фестивальный, программазы алысча. Ікінҷі кӱніндӧк піс ӧменең Пурус тағзар сыххабыс, анзы прайзын піріктірген».
Пастағы кӱнінде чииттер Хакасия правительствозы кізілерінең хада тоғасханнар. Хакасия пазының орынӌызы Владимир Крафт, экономика министрі Татьяна Пауль, культура министрі Светлана Окольникова, национальнай паза территориальнай политика министрі Дмитрий Тодышев, ӱгредіг министрінің орынӌызы Юрий Сагалаков, туризмңе хазна комитеді кнезінің тоғызын толдырчатхан Анжелика Челтыгмашева оол-хыстарның сурығларына нандырғаннар.
Ағбаннаң килген Виктор Шульбереков, «Этнова» фестиваль тузында аймах гранттарның мариин иртірген ползалар, чахсы поларӌых тіп таныхтаан. Т.В.Пауль чиит оолнаң чарасхан. Пазағы чылда «Этновада» иң артых проекттерні ахчанаң даа таныхтирлар. Орджоникидзе аймааның чуртағызы Анастасия Мулярчик сурған, хайдағ оңдайнаң пу аймахта ӱлгӱлер туризмні тилідерге пӧгінчелер. А.Д.Челтыгмашева чоохтаан: «Хакасияда туризмге улуғ хайығ салылча. Орджоникидзе аймаанда хайхастығ орыннар кӧп, кӧзідімге, Ивановскай кӧллердеңер прайзы искен, пу сурығны, хада-пірге тоғынып, пӧгібізерге чарир. Сірер, пірее хынығ проект тимнеп салып, пістің комитет чарлаан гранттарда аралазыңар, андағ оңдайнаң аймахта туризм тилир». Чииттер уғаа хынығ сурығ В.А.Крафтха пиргеннер. Олар Владимир Александровичтең сурғаннар, пілче бе ол хакас тілін. Хакасия пазының орынҷызы хакас тілін кӧмес оңарчаттыр, че аны ӧтіре пілбинчеткеніне хомзынча. В.А.Крафттың сағызынаң, республиканың чуртағӌылары прайзы хакас тілін пілерге киректер.
Тиксі Россияда Кино чылы таныхталчатханда, оол-хыстар устағӌылардаң хынған фильмнерні адап пирерге сурынғаннар. Прайзы Совет тузында суурылған киноға хынчаттыр. Хайди таныхтаан С.А.Окольникова, ол фильмнерде хайдағ-да ӧӧн сағыс полған, амғы киноларда анзы чидіспинче. «Сірер дее, чииттер, «Этнова» фестиваль тузында пірее сағыстарыңнаң ӱлезіп, хазна тилиріне хозым идерге кирексер», - чоохтаан культура министрі.
«Этнова-2016» 6 августха теере тоғынар. Анда чииттер кӧп чапсых паза хынығ ниме кӧрерлер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы