ЧИҢІС ТУДАРЫ - ААР ТОҒЫС
09.08.2016
Хабарлар
Хакасияның спорт министерствозында пу наада чапсых тоғазығ полды. Ӱр ниместе Якутскта ирткен чоннар аразындағы «Азия олғаннары» марығда аралазып, чиңіс тутхан «ЦСКА-Хакасия» команданың волейболисттері паза алтын, ікі кӱмӱс медаль утхан Артём ПОПОВ хабарҷыларнаң тоғасханнар.
Чоннар аразындағы марығда чахсы тимненіс кӧзіткен, ибзер алтын паза кӱмӱс медальлығ айланған спортсменнерні Хакасияның спорт министрi Валерий Денщиков чылығ алғыстаан, тӧреен чирібісті мыннаңох артых сабландыр турарға алғаан. Улуғ спортсар мындағ ізестіг хаалағларнаң кірчеткеннері прайзын ӧріндірчеткенін таныхтаан Валерий Васильевич.
Волейбол ойнапчатхан хызыҷахтарның тренері Ирина Золотухина мындағ чалтырама чидіге чидеріне ӱр тимненерге киліскенін, марығ тузында чиңістер тударына парчан кӱсті салғанын таныхтаан. Олох арада Хакасияның пазы Виктор Зиминге, спорт министрі Валерий Денщиковха, «ЦСКА-Хакасия» командаа улуғ хайығ салчатхан, сыбыра полысчатхан ӱчӱн, алғызын читірген.
- «Азия олғаннары» чоннар аразындағы марығда араласчатханда, піс сыбыра сизінгебіс, мында Хакасия алай Сибирь ӱчӱн не турыспинчабыс, Россия командазына саналчабыс. Ол уғаа аар чӱк полтыр, сыбыра нандырығлығ тудынарға киліскен, - ӱлескен позының сағыстарынаң команда капитаны Алина Струкова.
Таныхтирға кирек, хызыҷахтар аны постарының капитанына орта тааптырлар. Алина ойын тузында азағын тың ағырт салған, че ӧӧрелерін тастабаан. Чиңіс тутхан соонда, хызыӌахтар аны, махтап-алғыстап, хол узына кӧдіріп, чоғар тастааннар. Андағ хайығны кӧріп, Алина харах частарын чызынған осхас. Анзын ол пірдеезінең чазырбинчатхан.
- Марығ тузында піс Уралдағы федеральнай округтаң килген командадаң паза Хыдат хызыҷахтарынаң чочынғабыс. Оларның чахсы тимненістерін пілчебіс, - таныхтаан тренер И.Золотухина.
- Андағ даа полза, хайзын даа 3:1 саннаң утып алғазар, я? - махтапча Хубачарда чуртапчатхан хызыӌахтарны Хакасияның спорт министрі Валерий Денщиков.
Чоннар аразындағы «Азия олғаннары» марығны прайзы даа палаларның кічіг Олимпиадазы тіп санапчатхан осхас. Аннаңар, Сибирьдегі федеральнай округтың піріктірілген командазына кіріп, Якутсксар парар оңдай алғаны улуғ чидіге саналча. Марығда аралазып, алтын-кӱмӱс медальлар утып алары уламох махтағлығ кӧзідім тіп паалирға чарир.
Че олғаннар сыбыра ла марығласпааннар, маң туста, удур-тӧдір танысхлап, хынығ чоох-чаахнаң алысчаңнар. Кічіг тустағы ынархас сағыста хаӌанға даа халча нооза. Аннаңар пістің спортсменнерібістің ӧрінізін оңарарға чарир. Уламох мындағ килкім арға-мӧрійде чиңіс тутханын санға ал килзе, чорых тӱзімніг полтыр тиирге чарир.
Волейбол ойнапчатхан хызыӌағастар аразында амыр ла одырчатхан ниик атлетиканаң айғасчатхан Артём Попов. Ол, СФО мариинда аралазып, чиңіс тутхан. Анаң Россия мариинда даа чахсы тимненіс кӧзіткен. Іди ол СФО-ның піріктірілген командазына алылған. Якутскта Артём, 1500 метрге чӱгӱріп, кӱмӱс медаль утып алған. Анаң, 3000 метрге чӱгӱргенде, прайзын ас парыбысхан, Хакасиязар алтын паза ікі кӱмӱс медальлығ айланған. Чоннар аразындағы марығда андағ сыйыхтар алғаны - айдас чидіг.
- Ікінӌі кӱмӱс медальын ол эстафетада аралазып утып алған, - чоохтапча Артёмның тренері Игорь Владимиров. Кӧмес тынанып алзалар, тоғазығда араласхан спортсменнер теестегі марығларға тимненіп пастирлар. Чалтырама чиңістернең пісті мыннаң мындар даа ӧріндір турарларына тыңох ізенербістер.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде