СЕРГЕЙ МЕНЯЙЛО: «ХАКАСИЯ АЛНЫНЗАР ХААЛАПЧА»
16.08.2016
Хабарлар
РОССИЯ ПРЕЗИДЕНТІНІҢ СИБИРЬДЕГІ ФЕДЕРАЛЬНАЙ ОКРУГЧА ПОЛНОМОЧИЕЛІГ КІЗІЗІ СЕРГЕЙ МЕНЯЙЛО ИРТКЕН НЕДЕЛЯДА ХАКАСИЯЗАР ТОҒЫС ЧОРЫҒЫНАҢ ЧИТКЕН. АНЫҢ АЛНЫНДА ОЛ БУРЯТИЯ РЕСПУБЛИКАДА, НОВОСИБИРСК ПАЗА ОМСК ОБЛАСТЬТАРЫНДА ПОЛ КИЛГЕН. СЕРГЕЙ ИВАНОВИЧ ПУ ДОЛЖНОСТЬХА РОССИЯ ПРЕЗИДЕНТІНІҢ УКАЗЫ ХООСТЫРА ПӰӰЛ ИЮЛЬ АЙДА ТУРҒЫЗЫЛҒАН. АНЫҢ АЛНЫНДА ОЛ СЕВАСТОПОЛЬНЫҢ ГУБЕРНАТОРЫ ПОЛҒАН. 2 АВГУСТТА СЕРГЕЙ МЕНЯЙЛО СИБИРЬДЕГІ РЕГИОННАРӋА ТОҒЫС ЧОРЫҒЫНАҢ СЫХХАН.
Чааҷыларны хумартхылап...
Таныхтирға кирек, Россия Президентінің Сибирьдегі федеральной округча полномочиеліг кізізі Сергей Меняйло Сибирьдегі регионнарӌа сыныхтағнаң чӧрбинче. Чорыхтың ӧӧн пӧгіні - СФО-ға кірчеткен регионнарнаң танызары паза орындағы сидіксіністерні піліп алары. Аның алнында ол Сибирьде полбаан полтыр.
Ағбанда Сергей Иванович, Хакасия пазы Виктор Зимин паза республиканың министерство-ведомстволарының устағҷылары иң пастап Ирт тағдағы мемориал комплексінде пол килгеннер. Мемориал комплексі, хакас чонның Улуғлар чӧбінің сурынызынаң, 2012 чылда Хакасия пазы чахиинаң пӱдіріліп пастаан. Ирткен чылда 8 майда, Илбек Чиңістің пайрамнығ 70 чылы кӱні алнында, Ирт тағдағы наа комплекс пайрамни азылған. Амды чыл сай, 9 май алнында, анда «Хумартхы свечі» акция иртче.
Пір чыл аразына мемориал комплексі Хакасияның чуртағҷыларының паза аалӌыларының иң хынған орны пол парған. Мемориал комплексінде аалӌыларға улуғ нимес экскурсияны иртірген Россияның саблығ культура тоғынӌызы, С.П. Кадышевтің адынаң культура кінінің режиссеры Руфина Потапова.
- Чааӌы, чааға парчатса, тӧреен чирінең тас алып алҷаң, ол тасты ол хада ибзер ағылӌаң. Іди мының алнында кӧрҷеңнер, нинҷе чааӌы ибзер айланған паза айланмаан, - чоохтапча Руфина Владимировна.
Ирт тағда Хакасияның паза Сибирьнің устағ-пастаа, чаадаң айланмаан чааҷыларны хумартхылап, тіріг чахайахтар салғаннар.
Музей-культура кіні - республика поғдархазы.
Хакасиянаң таныстырчатханда, Россия синінде саблан парған Хакасиядағы музей-культура кінін хайди кӧзітпессің зе? Ирт тағда полған соонаң, аалӌылар музей-культура кінін кӧріп алғаннар. Анда Хакасияның пӧзік, сылағай хыстары аалҷыларны айраннаң удурлааннар. Хакас чонның иң хынған ас-тамаан оортап, чон музейзер ирткен. Кінде пӱдірігӌілер тоғыстарын тоос таа салтырлар. Музейні кӧрiп, Сергей Меняйло сизінген: «Тиксі Россияда мындағ кін чох таа полар». Аалӌыларға Л.Р.Кызласовтың адынаң чир-суғ ӱгренҷең музейнің устағӌызы Андрей Готлиб обаалардаңар чарытхан.
- Пӱӱнгі кӱнге пу обаалар тилекейде иң пурунғы археология памятниктері полчалар, - чооғында таныхтаан Андрей Иосифович.
Музей-культура кінінің ӱзінҷі блогында концерт паза конференц-зал полар. Анда наука конференцияларын паза улуғ культура мероприятиелерін иртірерге чарир. Залда 800 орын полары кӧрілче, ол санда кинектерге ӧнетін орыннар.
Хайди чооғында таныхтаан Хакасия пазы Виктор Зимин, музей-культура кіні ахча тоғынарға кирек. Аннаңар кіндегі орыннар арендаа пирілерлер. Мында ресторан-кафелер, олған площадкалары паза даа пасха нимелер полары кӧрілче. Ідӧк ЗАГС-ты пеер кӧзірібізерге пӧгінчебіс. Іди хоных хончатханнарның иң танығлығ кӱні улам сіліг иртер!
Таныхтирға кирек, июль айда, Хакасияда «Сибер Ил» чоннар аразындағы культура-турист форумы иртчеткенде, республиканың чуртағҷыларына паза аалӌыларына музей-культура кінін істінең кӧріп аларға оңдай полған. Хайди чоохтапча Андрей Готлиб, пу кӱннерде ле кінде тиксі 11 муң азыра кізі пол парған. Анзы музей-культура кіні чуртағҷыларның хайиинда полчатханын киречілепче.
Перинатальнай кін - Сибирьге кирек пӱдіріг
Пӧзік паалағ пирген Россия Президентінің Сибирьдегі федеральнай округча полномочиеліг кізізі Сергей Меняйло Ағбанда пӱтчеткен перинатальнай кінге. Пу пӱдіріг ӱзінӌі орын полған, хайзынзар аалҷылар килгеннер. Хайди піс пілчебіс, Хакасияда пу проект регион пазы Виктор Зиминнің кӱстенізінең паза Россия президентi хабазиинаң нинҷе-де чыл мының алнында чуртасха киріл сыххан. Пастағы ӧӧн подрядчик Москвадағы фирма полған, че олар тоғыстарын идерге маңнанминчатханнар. Амды кінні Хызылчардағы «Монолитстрой» ООО читіре пӱдірче. Пӱдірігні тузында тоозыбызар ӱчӱн, пӱдірігҷілер ікі сменанаң тоғынчалар. Кӱнӧрте пӱдірігде 580 кізі істенче, хараа, тізең, 100 кізі. Тӱрчедең ӧӧн пӱдіріг тоғыстары тоозылар. Чоохтирға кирек, пу проектке кӧрілген ахча сині - ӱс миллиард азыра салковай. Амды андар амғы тусха килістіре оборудованиелер алылчалар, хайзылары, кӧзідімге, 500 граммнығ тӧреен ыңааӌахтарның чуртазын ал халарға оңдай пирер.
Улуғ пӱдіріглерні кӧріп алған соонаң, Сергей Meняйлонаң Виктор Зимин орындағы хабарӌыларның сурығларына нандыр пиргеннер.
- Тоғазығ тузында мин Сергей Ивановичке тиксі Хакасиядаңар, аның чидіглерінеңер паза сидіксіністерінеңер искір пиргем. Піс оларны хада пӧгерге чӧптес салғабыс, - чооғында таныхтаан Виктор Зимин.
- Хайдағ даа регионда сидіксіністер пар полчалар. Парлар тӧӧй, че ідӧк пасха-пасха ағырсымнығ сурығлар. Полған на регион ус-тағҷызы ол сидіксіністерге пос оңдайынаң хайча. Піреелері оларны пӧгерге кӱстенчелер, хайзылары, тізең, оларны сизінмеске сағынчалар. Хакасияда полып, мин кӧрчем, мында тиліс чахсы парча. Республика алнынзар тилирге кӧстег тутчатханы іле кӧрін парды. Орында устағ-пастағ тоғызын чахсы толдырчатханнаңар, салтары кӧріндіре - музей-культура кіні, перинатальнай кін паза пасхазы даа. Ідӧк минің кӧңніме Kipген хайди орындағы чуртағӌылар устағ-пастағзар хайчатханы. Піс 2015 чылдағы ӧрттерде чурт чох халған Хызыл чазы аалда полғабыс. Орындағы чуртағӌылар, постары піссер пастырып, Виктор Михайловичке улуғ алғыс читіргеннер! Минің кӧрізімнең, олаңай кізі ӱлгее алғызын читірчетсе, анзы устағӌының тоғызына иң пӧзік паалағ паза олар чахсы тоғынчатханын киречілепче. Мин тӧреміл чоохтапчам, ӱлгӱ чонға тоғынарға кирек. Ол тоғызын чахсы толдырчатса, чон чахсы чуртир, уйан тоғынчатса, салтар андағох полар. Хакасия алнынзар хаалапчатханын мин пӱӱн іле кӧріп алдым, - таныхтаан Сергей Меняйло.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы