ӦРІНІСТЕР ПАЗА ХОМЗЫНЫСТАР
19.08.2016
Хабарлар
Хаҷан чайғыдағы XXXӀ Олимп ойыннарында олаңай кӱреснең айғасчатхан ипчілер аразында марығлар пасталыбысханда, иң пастап чир-суғҷыбыс Наталья Малышева анда араласпинчатханына хомзыныс полған. Че ол ам даа чиит, соондағы Олимп ойыннарында аралазарға маңнанарына ізеніс чітпинче.
Мында, тізең, 2012 чылда Лондонда ирткен Олимп ойыннарында чиңіс тутхан Наталья Воробьеваа ізеніс полған. Ырах таа полза, чир-суғҷыбысха килісче -Сибирьдең. Ол Иркутск городта олаңай кӱреснең айғазып пастаан, 2012 чылда прайзына ӧрініс сыйлаан, Олимп ойыннарынаң ибзер алтын медальлығ айланған.
Рио-де-Жанейрода ол уғаа ізестіг харбазып пастаан, азах меетке сығып алған. Алтын медаль ӱчӱн 69 кг кӧдірімде ағаа Японияның кӱресчізі Сара Дошонаң тоғазарға киліскен, утыр салған. Наталья кӱмӱс медальнаң таныхталған.
Ідӧк олаңай кӱресте кӱмӱс медаль утып алған Валерия Коблова. Ол 58 кг кӧдірімде харбасхан. Пастағы орын ӱчӱн ағаа японка Каори Итонаң тоғазарға киліскен. Чиңіс тудып, Японияның кӱресчізі пастағызын на Олимп ойыннарының тӧрт хати чемпионы полыбысхан. Мының алнында пір дее кӱресчі мындағ чидіге читпеені таныхталча.
Ӧрініс ағылғаннар суғдағы спорт кӧрімінең айғасчатхан синхронисттер Наталья Ищенко паза Светлана Ромашина. Пу оларның тӧртінңі алтын медальлары полтыр. Пастап 2008 чылда, Пекинде ирткен Олимп ойыннарында аралазып, алтын медальлар утып алтырлар, Анан, 2012 чылда Лондонда ирткен Олимп ойыннарында ікілер алтын медаль утып алғаннар. Хайди ӧрінмес андағ чалтырама чиңістерге читчеткен хыстар ӱчӱн.
18 августха орта командалар аразында орыннар піди ӱлестіріл парғаннар. Пастағы орында США, аның алтын 28 медаль, кӱмӱс 30 медаль, хола 28 медаль. Ікінӌі орында Великобритания, аның алтын 19 медаль, кӱмӱс 19 медаль, хола 12 медаль. Ӱзінңі орында Хыдат, аның алтын 17 медаль, кӱмӱс 15 медаль, хола 20 медаль. Россия тӧртінӌі орында, пістіңнернің алтын 12 медаль, кӱмӱс 12 медаль, хола 15 медаль. Че пістің командадаң nip санға ла соона халча Германия. Пу кӱннерде алызығлар пол парарға айабас.
Автор :
Тимнеен Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы