АҒБАН 85 ЧЫЛЫН ПАЙРАМНИ ТАНЫХТАДЫ
23.08.2016
Хабарлар
ПӰӰЛ АҒБАННЫҢ ТАНЫҒЛЫҒ ЧЫЛ, ХАКАСИЯНЫҢ ӦӦН ГОРОДЫНА 30 АПРЕЛЬДЕ 85 ЧЫЛ ТОЛҒАН. КИБІР ХООСТЫРА АНЫҢ ТӦРЕЕН КӰНІН АВГУСТ АЙДА ТАНЫХТАПЧАПАР. ГОРОДТЫҢ ПАЙРАМЫ КИНО ЧЫЛЫНА КИЛІС ПАРҒАҢДА, АҒБАН 20 АВГУСТТА ПІР КӰНГЕ УЛУҒ КИНОФАБРИКАА АЙЛАН ПАРҒАН. ПРАЙ АЧЫХТАРДА АЙМАХ ФИЛЬМНЕРНІҢ МАТЫРЛАРЫН КӦРІП АЛАРҒА, ПОСХА ПІРЕЕ РОЛЬ ТОЛДЫРЫБЫЗАРҒА ЧАРИР ПОЛҒАН. ТАНЫХТИРҒА КИРЕК, АҒБАННЫҢ ЧУРТАҒҶЫЛАРЫН ПАЗА ААЛҶЫЛАРЫН ӦРІНДІРЕРГЕ ПӦГІНІП, ГОРОДТЫҢ УСТАҒ-ПАСТАА УЛУҒ ПАЗА ХЫНЫҒ ПРОГРАММА ТИМНЕП САЛҒАН.
Фильм, фильм, фильм
Пайрам 12.00 часта спорт чӱгӱрізінең пасталған, Ағбанда спортха хынчатхан улус чуртапча нооза. Пӱӱл марығларда кӱстерінең сыназарға 400 артиинаң кізі сыххан, театр ачығынаң сығара «Палалар» садығ туразының хырина теере прайзынаң пурун СФО-ның ниик атлетикаҷа чемпионы Глеб Ромащенко чӱгӱрібіскен.
Олох туста Пастағы май площадьта Хакасияның пазы Виктор Михайлович Зимин Ағбанның пазы Николай Генрихович Булакиннең хада сценаа сыхханнар. Олар маркаларға городтың 85 чылына чарыдылған таңма турғысханнар. Пу акцияны Город кӱніне Россия почтазының Хакасиядағы пӧлии ӧнетін тимнептір. Анаң площадьха толдыра ыр-сарыннар чайылған, Оларны Валерий Константинович паза Екатерина Тимофеевна Толмашовтар Рената пархаҷахтарынаң хада хынып исчеткеннер. Валерий Константинович чоохтапча: «Піс Тӧӧ пазында чуртапчабыс, ипчімнең хада тынағдабыс.
Ағбанзар палаа кип-азах аларға паза городтың пайрамын кӧрерге килгебіс. Минің кӧрізімнең, Город кӱні пӧзік синде иртче». Ағазына Рената хозылған: «Мағаа - 9 час, кӱскӱзін 4-ҷі классха парарбын. Город кӱніне килгеніме ӧрінчем, мында кӧп аттракционнар тоғынча».
(Кино матырларының тiрiг скульптураларынаң чон хынып суурынған)
Таныхтирға кирек, пайрамда кічіг чуртағҷыларны кӧп чапсых ниме сахтаан. Кӧзідімге, «АғбанОлғаннарФильм» ачыхта оолағастарға паза хызыҷахтарға шахмат ойнирға ӱгреніп аларға, пластилиннең аймах аңыҷахтар идерге, хоостар чайирға, Том Сойер чіли сиденнер сырлирға оңдай полған. Кічіглер, пір дее туртухпин, аймах мастер-класстарда ӧткін араласчатханнар. Чиит іҷе Анастасия Топоева Город кӱніне Яна хызыҷаанаң хада килтір. Ол таныхтапча: «Мин Ағбанда чуртапчам, Город кӱніне чыл сай чӧрчем. Олғаннарға чахсы программа тимнеп салтырлар. Сизінгенде, пірее ачыхтар палаларға тикке тоғынчалар. Ідӧк кӧңніме кірче ікі-ӱс частығ палаҷахтарға алынҷа кибіс тӧзеп салғаны. Олар пос алынҷа ойнапчалар, пірдеезіне харығ полбинчалар».
Пастағызын на Город кӱнінде «Кӧк экран алнындағы тоғазығлар» ачых тоғынған. Чертыгашев орамазында улуғ экран турғызылған. Аны хоостыра чуртағҷылар 85 чыл аразына Хакасияның ӧӧн городы хайди алысханын кӧріп алғаннар. Ачыхты «Ағбан» телевидениезінің тоғынҷылары тимнееннер. Олар пайрам тузында улуғ нимес фильм суурарға маңнанғаннар, хайзын ТНТ каналда пу неделяда кӧзідерлер.
Прайзының хайиин чахайахтар кӧзідии тартхан. Мында чахайахтардаң иділген паннолар, торт, кӧгенек полғаннар. Оларны флористтер Город кӱніне ӧнетін тимнептірлер. Кізілер, оларны кӧріп, сомға суурынмин, иртпинчеткеннер.
«Тіріг синематограф» ачыхта чииттер «Война и мир», «Карнавальная ночь», «Бриллиантовая рука», «Мэри Поппинс, до свидания» фильмнернің матырларына хубулып алып, пip дее хыймырабин турчатханнар. 12.00 частаң пасти иирге теере піди турарға сидік полған, неке. Тіріг скульптураларның хыринда философия наукаларының докторы, доцент Марат Николаевич Чистанов тоғас парған. Ол чоохтапча: «Мин Томск облазындағы Северск городта тӧреем. Ағбанзар піс 1994 чылда кӧскебіс. Пастап Хакасияның ӧӧн городы минің кӧңніме кірбеен. Че 22 чыл аразына ол, чахсы саринзар алыс парып, ӧңнен сыххан. Минің сағызымнаң, Ағбан - чуртасха уғаа чарас город».
Москвадаң артисттер килгеннер
Кӱнӧрте Ағбанның чуртағҷылары кӧп чапсых ниме кӧріп алғаннар, че кӧбізі, чидікпин, иирдегі программаны сахтаан. Ағбандағыларны город пайрамынаң Россия эстрадазының саблығ артисттері Стас Михайлов паза Наталья Подольская алғыстирға кирек полғаннар.
20.00 часха чит париғанда, «Саяны» спорткомплексе кізі тол парған. Ӧӧн трибунада Хакасияның пазы Виктор Михайлович Зимин, Ӧӧркі Чӧптің кнезі Владимир Николаевич Штыгашев паза Ағбанның пазы Николай Генрихович Булакин одырғаннар. Оларнаң хада аарлығ аалҷылар полғаннар: Россияның Хазна Думазының депутаттары Надежда Сергеевна Максимова паза Лариса Кужугетовна Шойгу, география наукаларының докторы, СССР-ның паза Россияның Матыры, РАН-ның член-корреспонденті Артур
Николаевич Чилингаров, «ОБОРОНПРОМ» ОПК АО директорлар чӧбінің кнезі Сергей Михайлович Сокол.
Концерт тузында пасталыбысхан. Пастап чуртағҷыларны чайаачызынаң Наталья Подольская ӧріндірген. Чарым час аразына ол аймах сарыннар толдыр пирген. «Жар-птица» ырның хай пірее сӧстерін Наталья ундут салған полза даа, ағбандағылар аны хынып истіп алғаннар. Артист кӧрігҷілерні аптаан, ол чыылған чонны Ағбанның пайрамынаң алғыстаан.
(Стас Михайлов ырлапча)
Че, сизінгенде, чон ӧӧнінде Стас Михайловты кӧріп паза истіп аларға килген. Россияның саблығ артизі сценаа сыхханда, аны кізілер матап айа саап удурлааннар. Сарыннарын кӧрігҷілер чахсы пілчелер, оларны радио пастыра удаа истерге килісче. Чайаачы ус пip час артиинаң сарнаан, прай ырларны ол чалтырама толдырыбысхан. Че хайди таныхтаан Стас Михайлов, кӧп ырлар сарналбин халғаннар, аннаңар ол Ағбанзар концертнең хайди даа килер. Саблығ артисттің сӧстері чыылған чонның кӧңніне кірген.
Россияның эстрада ырҷылары соонаң сценазар Ағбанның кічіг артисттері сыхханнар. Ачыныстығ олғаннар чалахай ӱннерінең сарын толдыр пиргеннер. Анаң чуртағҷыларны городтың пайрамынаң Николай Генрихович Булакин алғыстаан: «Ағбан городтың чуртағҷылары паза аалҷылары, пӱӱн Ағбанда улуғ пайрам - ағаа 85 чыл толған. Пістің город пӱтче, тиліпче, ӧсче, амды Ағбанда 180 муң чуртағҷы саналча.
Прайзы часкалығ полыңар, хазых чӧріңер. Город кӱнінең, Ағбан!» Алғыстас сӧстері соонаң тигірзер хайхастығ фейерверк позыдылған.
Автор :
Майя КИЛЬЧИЧАКОВА Сомнар Елена САГАТАЕВАНИ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы