МУНИЦИПАЛИТЕТТЕРНІҢ ИНВЕСТИЦИЯЛАР АЛАР ОНДАЙЛАР ПАР
23.08.2016
Хабарлар
Пу наада Бабик суғ хыриндағы ачых чирде муниципалитеттернің кибірге кір парған тӧртінҷі чыылии ирткен. Пӱӱл ол «Муниципальнай пӱдістернің тилізі - регионның экономика ӧзізіне кӧстег» тіп адалған.
Аның тоғызында Хакасияның министерство-ведомстволарының устағҷылары, Ӧӧркі Чӧптің депутаттары, городтарның, аймахтарның, аал чӧптерінің пастары араласханнар. Форумның тоғызын устап, апарған Хакасияның пазы Виктор Зимин.
Ідӧк чыылығда аарлығ аалҷылар полғаннар: география наукаларының докторы, СССР-ның паза Россияның Матыры, РАН-ның член-корреспондентi Артур Чилингаров, Россияның Хазна Думазының депутаттары Надежда Максимова паза Лариса Шойгу, «ОБОРОНПРОМ» ОПК АО директорлар чӧбінің кнезі Сергей Сокол. Олар форумның секцияларының тоғызында араласханнар, пілістерінең ӱлескеннер.
Форумның тоғызы пленарнай чыылығдаң пасталған. Араласчыларзар алғыстас сӧстерінең Хакасия пазының пастағы орынҷызы Олег Нам айланған. Ол таныхтаан: «Муниципалитеттернің форумын-да иң ағырсымнығ сурығлар ӱзӱрілчелер. Алылған чарадығлар республиканың программаларына кирілчелер. Амды Хакасияда «Кічіг паза ыраххы аалларны хайраллиры паза тилідері» кӧстегліг программа маңнаныстығ тоғынча. Аны піс 2012 чылда муниципалитеттернің пастағы форумында ӱзӱргебіс. Ирткен чылда піс ол программа хоостыра істеніс ветераннарына, кӧп палалығ сӧбірелерге паза чалғызан чуртапчатхан пенсионерлерге иргілен парған тура хырларын нааҷыли алыстырғабыс. Хакасияда амды потребительлер кооперативтері тоғынчалар, тамах хайраллаҷаң орыннар пӱдірілчелер.
Иң ӧӧні - кізілернің таңдағы кӱнге ізеніс пар. Олар амды постары ахча тоғынып аларға кӱстенчелер». Анаң Ӧӧркі Чӧптің кнезі Владимир Штыгашев чоох тутхан. В.Н.Штыгашев правительство муниципальнай пӱдістернең хада улуғ тоғыс апарча тіп таныхтаан. Ол чоохтаан: «Муниципальнай пӱдістер пастарының законодательнай пастағнаң сығарға оңдай пар, че, хомзынысха, халғанҷы туста олар пу праволарынаң ӧткін тузаланминчалар».
Ӧӧркі Чӧптің кнес орынҷызы, бюджетче комитеттің устағҷызы Сергей Комаров чыылған чонға уғаа тузалығ искіріг тимнеп салған. Сергей Владимирович таныхтаан: «Амғы туста муниципальнай пӱдістернің бюджедіне ахча чидіспинче. Олох туста полған на муниципалитетте кадастрға турғызылбаан чирлер паза туралар пар. Оларны прай пічіктерге кир салып, анаң ээлеріне налогтар тӧлеттірерге кирек».
Обед соонаң форумның тоғызы ӱс секцияа чарылған. Мында постарының пілістерінең чыылыға Москвадаң паза Новосибирск облазынаң ӧнетін хығыртылған эксперттер ӱлескеннер. Тарас Демиденко паза Руслан Клочков инвестицияларнаң айғасчалар, олар кічіг аалларда тоғынтырлар. Ідӧк «Муниципалитеттернің инвестициялар алар оңдайлары» секцияда араласчыларға республиканы тилідер фондтың тоғызынаңар чоохтап пиргеннер.
Хазыр ӱзӱріглер «Хакасияның аалларындағы хоныхтарны тилідері» секцияда парғаннар. Аал чӧптерінің пастары піліп аларға иткеннер, хайдағ оңдайнаң тайға ӧзімнерін садыға сығарарға чарир. Хакасияның аал хонии паза ас-тамах министрі Игорь Гердт чыылған чонға искірген, пазағы чылда республикада потребительлер кооперативтерін тилідерінҷе алғым программа тоғынып пастир. Кооперативтер тайға хыринда орныхчатхан аалларнаң хада тоғынарлар. Хазнадаң пу программаа 20 миллион салковай позыдылары кӧріл парған.
Форум тузында улуғ тоғыс парған. Муниципалитеттернің пастары чыылығда тоғынчатхан программалар хоостыра постарының сағыстарынаң ӱлескеннер. Кӧбізі чахсы тоғынчаттыр, че пір сурығны пӧгібіссең, пасха сидіксіністер сых килче. Хакасияның экономика министерствозында прай сурығларға хайығ айландырарлар, анаң оларны хоостыра Виктор Михайлович Зимин чарадығлар алар, олар чуртасха кирілерлер.
Автор :
Майя КИЛЬЧИЧАКОВА Сомнар Елена САГАТАЕВАНИ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы