ЧИР-СУУ ӰЧӰН ЧААЛАСХАННАРНЫ УЛУҒЛАП
23.08.2016
Хабарлар
Ирткен неделяда Абаза городтың сыырадында уғаа чӱрексіністіг чыылығ полған - анда прай чааларда араласхан чир-суғҷыларына чарыдылған хумартхы тас турғызылған. Ол олаңай ла пу орында орныхпас. Аның хыринда чааларда араласхан паза амыр чуртас ӱчӱн турысханнарны чыып турарлар.
Мына ниме чоохтап пирген Абаза городтың ветераннар чӧбінің кнезі Иван Легкун:
- Пістің городыбыста ӱс тее сыырат пар. Чааларда араласханнарны прайзында даа чыыпчалар. Че пірее туған-чағыннары чохтарның чатчатхан орыннары чылларнаң изелче, пірдеезі оларны кӧрбинче. Ачырғастығ, хомзыныстығ даа хайығ чох халғаннарның ӱчӱн. Аннаңар мин, ветераннарнаң хада чӧптезіп алып, город устағ-пастаанзар айланғам, ӧнетін хумартхы тас турғызарға, аның хыринда амыр чуртас ӱчӱн турысханнарны пip орында чыып турарға тіп. Минің айланызымны устағ-пастағдағылар чахсы оңарғаннар, тимненіс тоғызы пасталыбысхан. Город бюджедінең 24 муң салковай позыдылған. Грант 60 муң салковай алып алғабыс. Аннаң даа пасха полызығлар полғаннар. Пір чыл парған пу тоғыс. Пӱӱн сағынған сағызыбыс тол парды. Аннаңар прайзына, кем хозым иткен хумартхы тасты турғызарына, улуғ алғызым читірчем.
Илееде аалҷы, ветеран, город чуртағҷызы чыылысхан ол кӱн. Килген кізілер, чоох тудып, Абаза городтың ветераннар чӧбіне, аның кнезіне улуғ алғыстарын читіргеннер. Оларның санында полғаннар Абаза городтың пазы Николай Байбородов, Илбек Ада чаа араласчызы Владимир Басов. Ӧнетін Ағбаннаң килгеннер Хакас Республиканың культура министрi Светлана Окольникова, істеніс паза социальнай тиліс министрінің орынҷызы Ирина Кириллова.
- Чӱрееме толды, - тіпче городтың ветераннар чӧбінің кнезі Иван Легкун. - Пастап, киреебіс килiспес тіп, чочыныс полғанох. Че пӱӱн ол аар сағыстар соонда халдылар. Амды сын чирзер парыбысхан пістің ветераннарны прайзын пip орында чыып турарлар. Туғаннары чохтарының чатчатхан чирлері хайығ чох полбас.
Хумартхы тасты Абазадағы тигіриб абызы Вадим ада чарытхан.
Автор :
Георгий КУНУЧАКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы