ЧӰГӰРІКТЕР ЧАРЫСТЫЛАР
24.08.2016
Хабарлар
Орғах айының 20-ҷі кӱнінде Асхыс радиозы чӱгӱріктер мариин иртірген. Марығ Калининдегі культура туразының хыринаң пасталған. Аның алнында чӱгӱріктер, пічікке пазынып, номерлер алғаннар. Ол арада Асхыс аймааның пазы Абрек Челтыгмашев спортсменнерні, алғыстап, алғаан. Чӱгӱріктернің иттерін ізідерге тіп, музыка пастыра теелбектенерге хығырғаннар. Ольга Орешкова, тізең, оларнаң фитнес оңдайынаң айғасхан.
Мына прай чӱгӱріктерні стартха хығырчалар. Чарыс пасталыбысхан. Марығда ооллар, хыстар паза хай пірее частан парған иреннер кӧрінче. Минің танызым Аркадий Ултургашев - майыхпас, арғаастанмас оол - Асхыста иртчеткен чӱгӱріс марығларында сыбыра араласча. Марығҷылар алнында паза соонда ГИБДД машиналары парча. Марығ иртер орамаларда ідӧк полиция паза ГИБДД тоғынҷылары турча. Че піс, тізең, наа стадионзар маңзырапчабыс. Мында оларны сағыпчалар.
Ирткен чылларда чӱгӱріктернің азах мееді иргі «Сельхозтехника» хыринда полҷаң, пӱӱл стадионда полар. Ізе, піди уғаа маңат, стадионда спортсменнерге паза кӧрігҷілерге пір дее ниме харығ полбинча.
Мына ГИБДД машиназы кӧріне тӱсті. Аның соонда пір оол чӱгӱр килче. Ир табан чалғызан чӱгӱрче. Кинетін сағыс кір килген - пасхалары сыдаспиндырлар, че чох, соонда пip оол кӧріне тӱсті, аның соонда пазох пірсі. Прайзының алнында Денис Чертыков, илееде соонаң Григорий Чистанов, аны сала сӱре читпин, Антон Ахпашев килген. Пу ӱзӧлең азах меетке іди читкеннер.
Антон Ахпашевнең чоохтазарға маңнанғам. «Асхыс поселоктаңмын, - тіпче ол, - ниик атлетиканаң сигіс класстаң пасти айғасчам, ӧӧнінде 400 - 800 метрге чӱгӱрчем, мындағ ырах дистанцияларға чӱгӱрбеем, аннаңар аар арах пілдірче. Мин Томсктағы хазна университедінде ӱгренчем. Мағаа 20 час».
Пiс чоохтасчатхан арада, азах меетке хыстар читчелер. Хайдағ даа полза, оларның кӱстері анҷох нооза, Прайзының алнында читкеннер Лена Лихацкая, ікінҷізі Таня Таштандинова, ӱзінҷізі Лена Хохрова.
Оларның аразында Аркадий Ултургашев читкен. Частан таа парған полза, чииттернең тиңни чӱгӱрген. Сос пилтірінең килген Влас Тохтобин иң соонаң азах меетке читкен дее полза, аны махтирға кирек. Ноғадаң тиирзер? Влас - илееде частығ аға, ол узун азахтығ чӱгӱріктерге пip дее тӧӧй нимес. Че ол, позының сыдамағы ӱчӱн, анҷа ырах чӱгӱрген.
Марығ тоозылчатханда, Асхыс радиозының устағҷызы Вероника Межекова прайзын алғыстаан, анаң чоохты Абрек Челтыгмашевке пирген. Ол ветераннарға, Аркадий Ултургашевнең Влас Тохтобинге, сыйыхтар читірген.
Вероника Межекова чиңісчілерге медальлар паза Аарластығ пічіктер читірген. Иреннернің аразында пастағы орында Денис Чертыков (Чоғархы Киндірлігдең), ікінҷізі Григорий Чистанов (Оӧк пилтірінең), ӱзінҷізі Антон Ахпашев (Асхыс станциязынаң). Хыстарның аразында пастағы орында Лена Лихацкая (Асхыс станциязынаң), ікінҷізі Таня Таштандинова (Асхыстаң), ӱзінҷізі Лена Хохрова (Асхыс станциязынаң).
Оолларға пастағы орын ӱчӱн идінҷек Наталья Ким, «Спорттовары» пӧліктің ээзі, 5 муң салковай ахчалығ сыйых сыйлаан, ікінҷі орын ӱчӱн - 1 муң салковайлығ сертификат.
Хыстарға пастағы орын ӱчӱн «Диамант» ювелирлер пӧлігі 5 муң салковайлығ сертификат читірген, ікінҷі орын ӱчӱн «Самбыл» клуб 1 муң салковайлығ сертификат сыйлаан, «БутерОК» компания ӱзінҷі орын ӱчӱн сыйыхха чірчелер читірген. Ікі ветеран сыйыхха ідӧк чірчелер алған.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы