ХАКАСИЯ КОЛУМБИЯА ТӦӦЙ
24.08.2016
Хабарлар
Мин Виктория Чебодаева-Вальдерраманаң паза Колумбиядаң килген Икаро Вапьдерраманаң хаҷанох, тоғазып, чоохтазып аларға сағынғам. Икароны пістің аймах мероприятиелерде кӧрҷеңмін, Викторияның ырлаанын «От ыры» мариинда исчең полғам.
Ӱр ниместе, ӧнетін чоохтазып алып, «Хабар» газетаның редакциязында тоғазып алғабыс. Пастап позынаңар чоохтап пирген Икаро Вальдеррама:
- Мин Латин Америкадағы Колумбия хазназынаң килгем. Тӧреем мин ӧӧн город Богота хыриндағы Касанари городта. Пабам Эктор Вальдеррама чарғыҷы полып тоғынған. Амды тынағда. Іҷем Зорайда Ортиз пастап медсестра полған, анаң пос киреенең айғасхан. Амды ідӧк тынағда.
Мин Богота городта Колумбийскай университетте философ специальностьха ӱгреніп алғам. Ол тустох чоныбыстың пурунғы кибірлерінең айғас сыххам. Пірсінде тың ағырыбысханымда, пістің хамнар мині имнебіскеннер. Анан, мин «шаманизм» киртіністі істескем. Асхынах саннығ пасха даа чоннарның кибірлерін ӱгрен сыххам.
Іди мин 2010 чылда Россиязар ӱгренерге килгем. Башкириядағы Уфа городта университетсер ӱгренерге кірібіскем. Алты айҷа тимнегліг пӧлікте ӱгренгем. Литератураа сабылҷаң полғам. Че пірсінде мин, Сибирьзер киліп, Байкал кӧл хазында пол килгем. Андада мағаа пу чирлернің сілии азыл парған. Нандыра парарым килбинібіскен. Мин Хызылчар городта чуртап сыххам. Туваҷа, Хакасияҷа чӧрглеем. Хайлирға ӱгренгем.
2014 чылда Хакасиядағы хазна филармониязы мині чон кӧг инструменттерінің лабораториязынзар хығырған. Аймах хазналардаң музыканттар килглееннер. Мин мында хайҷы паза ус кізі Сергей Чарковнаң танызып алғам. Ол мині хайлирға паза чатханнаң ойнирға ӱгреткен. Соонаң піс Ағбан городта филармонияның улуғ залында ойын кӧзіткебіс, хакас сарыннарын сарнаабыс.
Виканаң піс 2014 чылда Тувада Устуу-хурэ кӧг фестивальында танызып алғабыс. Соонаң хон салғабыс. Пiстің оолғыҷаабыс пар, ағаа алты ла ай. Ады ідӧк - Икаро, хайди чоохтирға, ол - Россия гражданинi Икаро Икарович Вальдеррама.
Сағам піс Виканаң Ағбанда чуртапчабыс. Мин частнай оңдайнаң кізілерні испан тіліне ӱгретчем. Вика ідӧк испан тілін ӱгренче, минің тілбесчім полыбысча. Вика Интернет пастыра паба-іҷемнең чоохтазыбысча. Палабыс кӧмес ӧс парза, Колумбиязар ааллап пар килербіс. Сағам піс Виканаң позыбыстың кӧг ойынын тимнепчебіс. Анаң, тимнеп алзабыс, чон алнына ол ойыннаң сығарбыс...
Анаң позынаңар чоохтап пирген Виктория Вальдеррама:
- Минің пабам Сергей Семёнович Чебодаев Асхыс аймаандағы Оңхак аалдаң, аннаң хости Хуртуйах тас музейі орныхча. Пабам кӧп чыллар шофер полып тоғынған, сағам ол тынағда. «Хабар» газетазар статьялар пазыбысчаң. Іҷем Лидия Иннокентьевна Мамышева Индіркі Тӧӧ аалдаң. Сағам іҷем хазых нимес, ӱреен. Пиҷем Александра Чебодаева Топановтың адынаң хакас драма театрында актриса полып тоғынча.
Мин пастап Ағбандағы музыка колледжінде ӱгренгем. Ол тустарда піс «Пахпыр» этногруппа тӧстеп алғабыс. Ӧменең Аркадий Угдыжеков устаан. Пістің концерттерге хынып чӧрҷеңнер, кӧбізін - чииттер. Анаң мин Хызылчар городсар парыбысханымда, минің орныма Александра пиҷем ӧмеде ырлаан. Ол туста ӧме «Айго» адалған. Амды ол «Иренек хан» полча. Мин, тізең, Хызылчарда ӱгретчілер колледжінде музыка пӧлиинде ӱгренгем. Андада піс «Отамай» этногруппаны тӧстеп алғабыс. Аймах фестивальларға чӧргебіс.
Амды мин кічіг паланаң одырчам.
Автор :
Илья ТОПОЕВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде