ТОНАСТЫҒЛАРНЫ ЧЫЫРҒА ПАСТАБЫСТЫЛАР
26.08.2016
Хабарлар
АЛТАЙ АЙМААНДАҒЫ «АЛТАЙ» ООО-ДА ПӰӰЛ 1755 ГЕКТАР ТОҢАСТЫҒЛАР САЛЫЛҒАН. ПӰӰНГІ КӰНГЕ ТОҢАСТЫҒЛАРНЫҢ 28 % АЛЫЛҒАН. ТОҢАСТЫҒЛАРНЫҢ ОРТЫМАХ СЫҒЫЗЫ-12-ҷе ЦЕНТНЕР ПІР ГЕКТАРДАҢ. 25 АВГУСТТАҢ СЫҒАРА ПРЕДПРИЯТИЕ ТОҢАСТЫҒЛАРНЫ ЧЫЫРЫН УЗАРАТХАН.
ПУ ААЛ ХОНИИ ПРЕДПРИЯТИЕЗІНІҢ УСТАҒҶЫЗЫ ЛАРИОН АЛЕКСАНДРОВИЧ ТОРОКОВ ПОЛЧА.
Устағҷының чооғынаң, олар октябрьның пастағы кӱннеріне теере хыра тоғыстарын тоозыбызарға сағынчалар. «Пістің тоғызыбыс чир-чайааннаң тың палғалыстығ. Наңмырлар удаа чағаннаңар, тоңастығларны чыыры ӱс неделяа тохтадылған», - теен ол.
«Алтай» ООО-ға, малларын хыстат парыбызар ӱчӱн, 800 тонна от киректелче. Сағам 555 тонна от пилетелген. 1500 гектар чирде сенаж тимнеҷең от салылған. Наңмырлығ кӱннер турғаннаңар, сенажтың 10 проценті ле тимнелген. «Алтай» ООО-да хыра тоғызында тоңастығларны чыыпчатхан, мал азиин тимнепчеткен ікілер комбайн паза читі трактор тоғынча. Хыра тоғызында 25 кізі істенче. Ӧӧн сидіксініс - техника оодылза, кирек запчастьтар таап алары. Предприятиенің техниказы 5-7 чыл мының алнында алылған.
Аал хониинаң айғасчатханнар айас кӱннер поларына ізенчелер. Хакасияда пуғдайны чыып пастабысханнар - ол 300 гектардаң Пии паза 470 гектардаң Алтай аймахтарында алыл парған. Республиканың пасха аймахтарында тоңастығларны алып пастаалахтар.
Сағам 1 гектардаң пуғдайның сығызы 16 центнердең аспинча. Тиксі республикаҷа 1118 тонна пуғдай сабылған. Алтай, Пии аймахтарында 1704 тонна кӧче, 1835 тонна сула алылған. Алтай аймаанда 350 гектар чирдең гречиха сабылған. Пӱӱл мал азии пылтырғызынаң табырах арах тимнелче. Пӱӱнгі кӱнге республикада 85588 тонна от пилетелген, пылтырғызынаң 30 муң тоннаа кӧп. Оттың ортымах сығызы - 11 центнер гектардаң. 26949 тонна сенаж тимнелген.
Орджоникидзе аймаанда силос тимнеп пастапчалар. Пӱӱнгі кӱнге 222 гектар чирдең силос сабылған, 2243 тонна тимнелген. Силостың сығызы пір гектардаң 168,4 центнер. Пу чағында, чахсы кӱннер турза, Пии аймаанда кукуруза алып пастирлар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде