РЕСПУБЛИКА ТИЛІП ОДЫРЧА
26.08.2016
Хабарлар
Хакас Республиканың 2016 чылның пастағы чарым чылының социальнай паза экономика тилізінің салтарлары тимнелгеннер. Хазна экономиказында сидіксіністер полза даа, республиканың тилізі тохтабинча.
Хакасияның экономика министерствозы, істезіг иртіріп, мындағ салтарларға килген: пӱӱл алты ай аразына промышленность тоғызы, 2015 чылның олох тузынаң тиңнестірзе, 103.6 % тиңнелче (Россияҷа ортымахти 100,4 %). Чир ис-пайын аниры - 1077 %. Чарытхы сығарызында паза чылығ пирерінде ӧзіс таныхталча. Алты айға предприятиелер 12721,1 ГВт.ч чарытхы сығарыбысханнар (2015 чылда
- 108,3 %), чылығ пирері - 2524,2 муң Гкал (114,2 %).
Пӱдіріг тоғызының сині 118,5 % тиңнелче, 2015 чылның пастағы алты айынаң тиңнестірзе. Пӱдіріге 5,2 миллиард салковай хорадылған. Пӱӱл алты ай аразына тиксі 42,1 муң кв. метр чурт пӱдірілген. Таштып, Шира паза Пии аймахтарында ӧзіс таныхталча.
Абазадаң пасха республиканың прай муниципальнай пӱдістерінде кічіг паза ортын организацияларның промышленнай ниме-ноо сығарызы хозыл парған. Боград паза Шира аймахтарында кічіг паза ортын бизнеснең айғасчатханнарның саны хозыл парған. Чурт паза гостиница полызығларының сині 101,7-102,6 % ӧс парған.
Чурт-коммунальнай хониинзар инвестицияларны тартарынҷа тимде полчатханы хоостыра Хакасия ӱзінҷі орында. Пу рейтинг полған на ӱс айда тимнелче, істезігде Россияның 85 субъекті араласча. Пістің регионға инвесторлар ахчазын хозар оңдайлар 12 ӧӧн кӧзідімҷе паалалча. Кӧзідімге, пасха регионнарнаң хада ЖКХ сурығларын пӧгері.
Аал хониинда мал-хус саны ӧскені таныхталча. Інектернің саны 185 муң пас саналча (102,9 %), сосхаларның саны - 55,6 муң пас(103,4 %), ӧскілернің паза хойларның саны - 312.7 муң пас (105,9 %), хус саны - 604,5 (100,7 %), аттарның - 36 муң пас.
Республикада алты ай аразына аал хонии ас-тамаа 4012,3 салковайға сығарылған. Сӱт саарында ӧзіс пар. Иң кӧп сӱт Шира (пір кізее 41,3 кг сӱт килісче), Орджоникидзе (36 кг) паза Пии (24,9 кг) аймахтарында саалча.
Хакасияда палалар тӧріпчеткені таныхталча. Чахсы кӧзідіглер Сорығда, Алтай, Пии, Таштып, Шира паза Ағбан пилтірі аймахтарында. 3-7 частығ олғаннарға школа алнындағы ӱгредігні алар оңдай 100 % тиңнелче.
Автор :
Хакасияның экономика министерствозы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы