ТІЗЕККЕ ТӰЗІРЕРГЕ ХАРАСЧАЛАР
26.08.2016
Хабарлар
Рио-де-Жанейрода чайғыдағы XXXI Олимп ойыннары тоозыл пардылар. Россияның піріктірілген командазына анда хайдағ хайығ салылғанын прайзыбыс пілчебіс. Аннаңар пасха хан чирлерінің халыхтар пірігістерінің ӧткін араласчыларының піреелері Германияны, Великобританияны, Францияны паза даа пасха хай пірее хазналарны, США-ның кӱҷӱгестері полып, Россияа матап «ыыран» халдылар тіпчелер. Анзы уғаа нымзах паалағ тиирге чарир.
Пасха даа тиңнестіріглер пар. Че минің кӧңніме мындағ тиңнестіріг артых кірген: Россияның оң холын пиліне чаба палғап салып, сол холнаң на марығлазар оңдай пиргеннер, андағ даа полза, утыр салғаннар, удур-тӧдір чоо тӱкӱрініс чӧрчелер.
Амды 7 сентябрьда Рио-де-Жанейрода Паралимпийскай ойыннар пасталарлар. Андар Россияның піріктірілген командазын пӱкӱлее кирбин салдылар. Ол сылтағнаң МОК (Чоннар аразындағы Олимп комитеді) спорт чӧрімін политикаа айландырарға харасчатханын іле кӧзіт салды. Хаҷаннаң сығара спорт паза политика алынҷа полҷаңнар.
Ӧткін хылыхтығлар пу киректе кӧні США-ны пыролапчалар, Россияның піріктірілген командазынаң хорығып, МОК-ты килкім ахчаа садызып алған тіп найнапчалар. Халғанҷы туста ирткен Паралимпийскай ойыннарда пістің хазна сыбыра пастағы орында полҷаң. США, тізең, анзын кӧңніне албинча, пасха хазналарны чіли, Россияны тізекке тӱзіріп аларға харасча. Мында иң оой чол - Россияның піріктірілген командазын марығларда араластырбасха.
Паралимпийскай ойыннарда кинектер араласчалар. Кӧрерге айастығлар. Олох арада андағларға тың поғдархапчазың - чуртастың сидіксіністері алнында тӧдір пазынмааннар, хазых кізілерге айдас кӧзідім полчалар. Хайдағ пус осхас соох чӱректіглер андағ чарабас чарадығ алыбыстылар - пір хазнаның командазын спорт пайрамында араластырбасха?
Россияның піріктірілген командазына кіріп, Паралимпийскай ойыннарда аралазарға кирек полған чир-суғҷыбыс Вадим Трунов. Ол - ниик атлетикаҷа чоннар аразындағы класстығ спорт узы, Россияның нинҷе-нинҷе хати чемпионы. Таныхтирға кирек, хаҷан хазнабыстың піріктірілген командазын андағ улуғ спорт мариинда араластырбинчатханын піліп алғанда, хомзыныс паза ачырғас улуғ полған. Хаҷан чир-суғҷыбыстаңар сағын килзе, ӧкпеленіс ікі-ӱс хати ӧс парыбысханға тӧӧй пілдірче. Ирік чохта, пістің ӧбекелерібіс чіли, МОК членнеріне перінер сағыс тӧріпче: «Тас пастарыңа чоон тастар тӱссін, соолғаннар».
Ӱр ниместе ирткен Физкультурник кӱнінде Хакасияның пазы Виктор Зимин, Вадим Труновха ахчалығ сыйых читірчедіп, чӱреен пазын полбин, махачы хылыхтығ оолны кӧксіне чаба тудып, кӧңнін кӧдірерге харасхан. «Піс синнең хадабыс, Вадим! Спортты политиканаң путхапчатханнары улуғ алҷаас», - теен Виктор Михайлович тітірепчеткен ӱнінең.
- Мин теестегі тренировкаларны тохтатпинчам, кӱннің сай чӱгӱр чӧрчем, - нандырған Вадим Трунов.
Ачырғастығ, хомзыныстығ, че чарғы чарадиинаң азыра алтап полбассың. Рио-де-Жанейрода иртер Паралимпийскай ойыннарда Россияның піріктірілген командазына орын табылбин парды. Анзы кемге-де ӧрініс ағылды, піске - хомзыныс. Уламох кинек спортсменнерібіске. Хайди матап тимненділер, хазнабысты махтаға сығарарға сағынғаннар. Киліспин парды.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы