ХАҶАН ДАА ПАЛАЛАР ТӦРІЗІН
26.08.2016
Хабарлар
Город кӱнінде, 20 августа, Ағбанда ах чарыхха сигіс ыңааҷах тӧреен - ікі оолағас паза алты хызыҷах.
Андағ іҷе-пабаларны кибірли республикадағы пала тапчаң турада «Город кӱнінде тӧрееннер» акция хоостыра чеестепчелер. Ағбан городтың культура, спорт паза чииттер устанызының пастығы Елена Закатова чиит іҷе-пабаларға город пазы Николай Булакиннің адынаң алғыс-тас пічіктерін читірген. Сыйыхха «Малинники» садығ туразынаң тадылығ ас-тамах аларына 500 салковайға сертификаттар пирілген. Ідӧк полған на сӧбірее иб аразына мебель аларға 4500 салковайға сертификаттар читірілген. Сыйыхтарны Ореховтар, Кайнаковтар, Барановтар, Мамышевтер паза пасха даа сӧбірелер алғаннар.
- Ах чарыхха тӧреен «кӱніҷектерің» хаҷан даа хазых, часкалығ, хыйғаҷах ползыннар, - алғаан Елена Закатова. Ипчілері часка сыйлап пирген пабалар кибірли прайзының алнында сӧс пиргеннер: хаҷан даа хынарбын, ибде хайынарбын, садығ туразынзар чӧрербін, паланы кӧрербін, аннаң ойнирбын...
Надежда паза Евгений Мамышевтернің ах чарыхха хызыҷах тӧреен. Ол оларның ікінҷі палалары полча. Чиит сӧбіре Алтай аймаандағы Сартых аалда чуртапча.
Чиит іҷе Надежда Евгеньевна хызыҷаа 16 августта тӧрирін сағаан. Че палазы 20 августта, Ағбан город кӱнінде, 18.30 часта ах чарыхха тӧреен.
Мамышевтер сӧбірезінің пастағы хызыҷаа Анна - ікі частығ. Ыңааҷахха, тізең, пӱӱн ибзер читсебіс, ат пирербіс тіп чоохтаан іҷе-паба. Сыйыхтар аларға оларнаң хада Евгений Игоревичтің іҷезі Анжела Георгиевна Настя хызыҷаанаң кил парғаннар. Олар ӧрінізін чазырбааннар, хайди за, Анжела Георгиевна ікінҷі хати ууҷа полыбысты, Настяҷахтың, тізең, чеені тӧреен.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы