ПИРІКЧУЛ - ТӦӦ ПАЗЫ ЧОЛ ТЫХТАЛЧА
30.08.2016
Хабарлар
Пирікчул - Тӧӧ пазы чолға асфальт тӧзеп пастабыстылар. Асфальт тӧзир алнында улуғ тоғыс иділ парған. Чолны кӧдіріп, чалбах идібіскеннер. Анаң катоктарнаң матап ныхыбысханнар.
Асфальт тӧзеп пастабысханына Хакасияның транспорт паза чол хонии министрi Александр Егоров килген. Чол итчеткен «ДСП-11» ООО подрядчик пастыхтарнаң хада улуғ нимес чоох апарған соонда, министр чолзар сыххан. Кӧмес піснең чоохтасхан.
- Асфальт тӧзеліп пасталыбысты. Чолны идерге 180 млн салковай пирілген. 67 млн салковайны Хакас Республика позытхан, пасхазы -федеральнай ахча. Пӱӱл пу ахчаны прай тузаланыбызарға сағынчабыс. Пістің ооллар мында хар тӱскенҷе тоғынарлар. Чолны асфальтнаң 5400 метр тӧзебізерге сағыс пар. Хоза тоғыстар - тахталар салары. Пӱӱл ізестіг тоғыныбыссабыс, тігі чылға ахча оой позыдылар. Пу уғаа кирек чол, Тӧӧ пазынаң пасха, Палыхтығ суғ, Шора паза даа пасха ааллар пар нооза, оларны кіннең палғалыстырарға кирек. 2018 чылдаң пасти, Кемеров облазынаң пірігер чол пӱдірии пасталар. Кемеров облазынаң чӧптезіг пар.
Министр анаң техника хайди тоғынчатханын кӧрген. Асфальт тӧзирінде ӧӧн техника - асфальтоукладчик. Уғаа хыйға техника полтыр, панельінде кнопкалар толдыра, электроника нооза. Хай пірее ниме чаза пар сыхса, тоғынарға хынминыбысча. Ана аннаң устап чӧргісче пістің оол Александр Торбостаев. Ағаа полысча аның нанҷызы Сергей Федин. Ікі нанҷы хада чибіргі чылға чағын тоғын парирлар.
Чолдағы тоғысчыларнаң устап парча Илгар Вейсалов. - Асфальтты улуғ самосваллар «Сканияларнаң» Тазобадаң тартчабыс, чоохтапча ол. - Асфальтты машинаа таарлабысса, аның ізии 170-180 градус полча. Сооп парбазын тіп, асфальтты пологнаң чабысчалар. Пеер ізиинең читче. Асфальттың ізии 130-140 градус полза, андада тӧзепчебіс. Пеер ағылзалар, андағ температура полча. Сооп парған асфальт хат парча, анаң ол кизектерні тӧгерге килісче. Че пістің андағ ниме полбинча, асфальт сообазын тіп, пологтарнаң чаапчабыс. Пеер килзӧк, сах андох тӧзепчебіс. Піске асфальт кизектерін хыйа тастирға пір дее киліспинче, ол пістің ахчабыс нооза.
Піске дее Тӧӧ пазынзар, Палыхтығ суғзар чӧрерге килісче. Пирікчулдаң сыхсаңох, оймах-соғыллар пасталыбысча. Машинаңа айапчазың. Андағ чолда хайдағ подвеска сыдазар. Амды, 5 тее километр полза, чахсы чол полар.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы