РОССИЯДА - КІЧІГ ПАРАЛИМПИАДА
09.09.2016
Хабарлар
Полар ниме пол парды. Амды нинҷе дее хомзын, ачырған, чарғылас, че орай. Рио-де-Жанейрода 7 сентябрьда пасталған чайғыдағы XV Паралимпиада ойыннары Россияның піріктірілген командазы чох иртче. Тӱдӱн чох ӧрт сыхпинча тіпчелер. Аннаңар хайдағ сылтағнаң пістің хазнаны марығларға кирбин салғаны хайди даа ілезіне сығарылар. Че Паралимпиада соонаң на.
Аннаңар Россияның президентi Владимир Путин орта чарадығ алыбысхан - хазнабыстың піріктірілген командазына кірген кинек спортсменнер аразында марығны ибде иртірібізерге. Пірдең Владимир Владимирович мындағ чарлағ иткен: Паралимпиада ойыннарында сыйыхтығ орыннарға сығып алған спортсменнер хайдағ медальлар аларлар, андағох сыйыхтарнаң таныхталарлар пістің мындағы спортсменнерібіс. Ағаа хоза, олар Рио-де-Жанейрода Паралимпиадада араласханнарнаң ахча тиң аларлар.
Іди 7 сентябрьда Москвадағы улуғ «Крокус Сити Холл» концерт залында тиксі Россия синіндегі азых спорт ойыннары пайрам кибірли азылған. Пістің хазнада иртірілчеткен кічіг Паралимпиадада 263 спортсмен араласчатханы чарлалған. Олар спорттың 18 аймах кӧрімінҷе марығлазарлар (ниик атлетика, теннис, волейбол паза даа пасхазы) - Рио-де-Жанейрода иртчеткен чайғыдағы Паралимпиада марығларында олох син спорт кӧрімінҷе арға-мӧрій иртче.
Тиксі Россия синінде иртчеткен азых спорт ойыннарында араласчатханнар кӧңнілерін тӱзірбинчелер, ибде дее маңат кӧзідімнерге чидербіс тіп ізендірчелер. Аның ӱчӱн оларны махтирға ла халча. Чуртас ідӧк тее оларға айабаан. Мында, тізең, улуғ марығларға позытпин салдылар. Че кинек спортсменнер махачы тудынчалар, Рио-де-Жанейрода кӧзіділген чидіглердең соона халбасха харазарбыс тіпчелер. Постары, тізең, андағы кӧзідімнердең ас парыбыс турарға парчан кӱстерін саларға тимделер.
Кинек спортсменнернің ӧӧн марығлары Москва хыриндағы иң чахсы «Новогорск» паза «Озеро Круглое» спорткомплекстерде иртчелер. Таныхтирға кирек, пу спорткомплекстерде Россияның піріктірілген командалары аймах марығларға тимненіс иртчелер. Аннаңар хайдағ даа спорт кӧрімнерінҷе арға-мӧрійлерні пӧзік синде иртірҷең чахсы оңдайлар пар тиирге чарир.
Россияның піріктірілген командазына кіріп, Рио-де-Жанейрозар парарға, чайғыдағы Паралимпиада ойыннарында аралазарға чир-суғҷыбыс Вадим Трунов тимненген полған. Ол - ниик атлетикаҷа чоннар аразындағы класстығ спорт узы, Россия чемпионы. Амды ол нанҷы-арғыстарынаң хада тиксі Россия синіндегі азых спорт ойыннарында араласча. Хайди искірче Хакасияның спорт министерствозы, Вадим Трунов марығларда аралазарға 205 номерліг санға алылған.
Тиктең нимес тиксі Россия синіндегі азых спорт ойыннары тіп таныхталбинча. Анда пасха даа хазналардағы кинек спортсменнер аралазар оңдайлығ полғаннар. Ағаа хоза, пістің хазнадағы даа кинек спортсменнер устарын сынирҷыхтар. Ол санда пістің республикадаң даа Москвазар парҷаңнарны санға алғаннар. Іди коляскада одырып, теннис ойнапчатхан спортсменнер пӱӱл Россия мариинаң алтын медальлығ айланғаннар. Теннис ойнирында Россия Кубогының мариинда чиңіс тутханнарох. Че оларны Москвазар апарарға, марығда араластырарға ахча табылбин парған - коляскалығ кинектерні ӱдес чӧрерге, кӧрерге кізілер киректелібӧкчелер нооза.
Амды чир-суғҷыбыс Вадим Трунов, ырахха чӱгӱріп, пірее медаль утып аларына ізенербістер.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде