АЗЫРАЛ ПИЛЕТИРІНЕ УЛУҒ ХАЙЫҒ САЛЫЛЧА
13.09.2016
Хабарлар
Пу кӱннерде Хакасия пазы орынҷызының тоғызын толдырчатхан Иван Эрвинович Вагнер «Хакасия» газета редакциязындағы актовай залда хабарҷыларнаң тоғасхан. Иван Эрвинович аал хонии киректерінҷе нандырығлығ полча, аннаңар чооғын хыра тоғызынаңар, мал азии пилетелчеткеннеңер апарған.
Пӱӱл, июль паза август айларда наңмырлар удаа чаап, оттар паза хыралардағы ӧзімнер маңат ӧс парғаннар. Аннаңар ол саринаң кирек хомай нимес парча. Улам, хаҷан сентябрь айның пастағы кӱннерінде айас полчатханда.
Пылтыр паза алындағы чылларда, соох хысхы полып, ідӧк чайғыда хуруғ кӱннер полып, малға азырал читкіҷе тимнелбин парған. От паза силос нимені пасха регионнардаң, садызып, ағыларға киліскен. Ол кирекке ахча кӧп парыбысхан.
Пӱӱл малға азырал тимниріне улуғ хайығ салылча. Аал хонии тоғынҷылары постары даа оңарчалар, ас-тамахты тузында чыып полбаза, хысхызын пазох хатығ чуғар. Сағам от пу тусха теере 110 муң тонна пилетел парған. Пылтыр прай 115 муң тонна тимнелген полған, че ол, хысхы тоозылғанҷа, читпин парған. Силос сағам 50 муң тонна тимнелген паза ол тоғыс ам даа парча. Пылтыр, тізең, прай 7 муң тонна ла тимнелген. Аннаңар аны хонҷых Хызылчар крайынаң садызып аларға киліскен. Пӱӱл, чир сығызы манат полар ӱчӱн, хыраларда удобрениелерні, пылтырғызынаң тиңнестірзе, ікі хати кӧп чайғаннар.
Пӱӱл республиканың аймахтары ідӧк тамах пилетирінде кӱстен парчалар. Пылтыр, азырал малға читпин парғанда, Ағбан пилтірі, Асхыс паза Боград аймахтарындағы аал хонии предприятиелеріне паза фермерлерге полызарға киліскен. Амды полған на фермерге нинҷе азырал тимнеп салардаңар пӧгіннер турғызылғаннар. Олар, мал-хус тудып, республикаа парыс итчелер нооза. Хай пірее аал хонии предприятиелері паза фермерлер кӧрілген синнең артых азырал тимнеп салғаннар. Аннаңар олар, аны садып, постарына парыс идерлер.
Иван Эрвинович Вагнер
Тамах киреен алза, ол республикада Орджоникидзе аймаанда ла маңат ӧсче. Піди пӱкӱлее 121 муң гектар хыралар кизіл парғаннар. Кизіл парған хыраларны паза ӧртебестер, итпезе, пазох улуғ ӧрттер сых парарға айабас.
Пӱӱл пістің республика ас-тамахнаң хызылбасха кирек. Итсе-де, республикада, пылтыр улуғ ӧрттер полған соонда, прай ла аал хонии предприятиелері паза фермерлер хоныхтары азахха турғалахтар. Пірее хоныхтарның пилетелген оттары паза маллары прай кӧй парған полғаннар. Че олар амды аринҷа кӱс алынчалар.
Сағам пістің республика ас-тамахнаң позына сыданча. Пасха хазна чирлерінең кӧп ас-тамах албинча. Итсе-де, республикада сосхалар паза таңахтар ӧскірчеткен килкім комплекстер чох пол парғаннар. Кӧзідімге алза, пылтыр Кӧк хайа аал хыриндағы хус фабриказы, ӱреге кіріп, тоғынминча. Амды республикада сосха паза таңах кӧп арах ӧскірерге тың на парыстығ нимес. Хонҷых регионнарда андағ кӱстіг комплекстер парлар паза олар иттерні, нымырхаларны ниик паанаң сатчалар. Аннаңар піске оларнаң тиңнезерге сидік. Піс тее постарыбыстың артых чир тамаан паза мал идін хонҷых регионнарға садып одырчабыс.
Пістің республикада чир тамаан паза мал идін хайраллаҷаң улуғ складтар, ідӧк консервалар сығарҷаң заводтар чох полғаны сағыссыратча. Оларны республикада пӱдірерге пӧгіннер пар, че мында инвесторларны таап алҷаң сурығ турча. Сағам фермерлер паза аал хонии предприятиелері ӧскіріп алған чир тамаан, иттерні хонҷых регионнардағыларға садыбысчалар, олар, тізең, аннаң консервалар тимнеп, піскеӧк аарлығ паазынаң сатчалар.
Сағам республикада азырал пилетирі хыызында парча. Чыл тоозылғанҷа, хомай нимес чидіглерге чидеріне ізенчебіс.
Автор :
Илья ТОПОЕВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде