ХАКАСИЯДА - СПОРТ «ЧЫЛТЫСТАРЫ»
21.09.2016
Хабарлар
ПІСТІҢ ЧИРДЕ ОЛИМП ОЙЫННАРЫНЫҢ ЧЕМПИОННАРЫ АЛАЙ АРАЛАСЧЫЛАРЫ ПОЛБИНЧАЛАР ТИИРГЕ СИДІК. ПОСТАРЫБЫСТЫҢ ДАА АНДАҒ ЧИР-СУҒҶЫЛАРЫБЫС ПАР ПОЛҒАН. КӦЗІДІМГЕ АЛЗА, ОЛИМП ОЙЫННАРЫНЫҢ ІКІ ХАТИ ЧЕМПИОНЫ ИВАН ЯРЫГИН, МОСКВАЗАР ДАА КӦС ПАРЫБЫСХАН ПОЛЗА, ХАКАСИЯДА УДАА ПОЛҶАҢ.
СЕУЛДАҒЫ ОЛИМП ОЙЫННАРЫНДА ХОЛА МЕДАЛЬ УТХАН СЕРГЕЙ КАРАМЧАКОВ АҒБАНДА ЧУРТААН, ПРАЙЗЫНАҢ ТОҒАСЧАҢ, ЧООХТАСЧАҢ. ОЛИМП ОЙЫННАРЫНЫҢ ІКІ ХАТИ ЧЕМПИОНЫ, РОССИЯНЫҢ САНАЛЫҒ ЧӰГӰРЕРІНҶЕ ФЕДЕРАЦИЯЗЫНЫҢ ПРЕЗИДЕНТІ ЕЛЕНА ВЯЛЬБЕ ХАКАСИЯДА ЧЫЛДА НИНҶЕ-НИНҶЕ ХАТИ ПОЛ ПАРАДЫР, ТОҒАЗЫҒЛАР ИРТІРЧЕ.
ЧЕ МЫНҶА КӦП ААРЛЫҒ ААЛҶЫ ПІСТІҢ ЧИРЗЕР ПАСТАҒЫЗЫН НА КИЛДІ ПОЛАР. 9 КІЗІ - ПРАЙЗЫ ДАА ОЛИМП ОЙЫННАРЫНЫҢ АЙМАХ ЧЫЛЛАРЫНДАҒЫ ЧЕМПИОННАРЫ.
Кӱресчі Владимир Чебоксаров ла Олимп ойыннарында кӱмӱс медаль утхан. Олох арада Татьяна Сарычева - Олимп ойыннарының ікі хати чемпионы.
Олар республиканың спорт министерствозында хабарҷыларнаң тоғасханнар. Хайзы даа позының чуртас чолынаңар, спорттағы чидіглерінеңер хысхаҷахти чоохтап пирген. Саблығ кізілерні истерге хынығ паза тузалығ. Улуғ спортнаң хаҷанох анымҷохтасхан даа ползалар, халых-чарыдығлығ тоғыста, аймах тоғазығларда ӧткін араласчалар, чииттерге кӧзідім полчалар, постарынаңар чоохтапчалар. Олимп ойыннарының чемпионнары хаҷан-да постары даа кічіг полғаннар, спорттың хынчатхан кӧрімінең айғазып, пастағы сыйыхтарына матап ӧрінҷеңнер.
- Пістің программаа пӱӱл 25 чыл толча. Ол «Олимп ойыннарының саблығ кізілері - Россияның олғаннарына паза чииттеріне» адалча. Аның ӧӧн пӧгіні - Олимпиада чӧрімін палалар паза чииттер аразында тарадары, - чоохтапча делегация устағҷызы Наталья Боярская.
Наталья Николаевнаның сӧстерінең, Хакасиязар килген саблығ спорт устары Россияның читі аймах регионынаң чыылысханнар. Оларның алтызы пу чӧрімде пастағызын на араласчалар. Пу халых-чарыдығлығ программаның пастағҷылары Олимп ойыннарының чемпионнары полғаннарны прай санға алғаннар. Пістің хазнабыста Олимпиада чемпионнары муңарлап саналчалар. Аннаңар, оңдай киліссе, чорыхха тимненчетсе, аймах регионнардағы саблығ спортсменнерні піріктіріп аларға пӧгін тутчалар.
- Пеер килер алнында Сочиде полғабыс. Хайдағ хайхастығ тоғазығлар полдылар анда. Оолағастар паза хызыҷағастар пісті матап хооп чӧргеннер. Прайлары даа хайдағ-да спорт кӧрімінең айғасчалар. Оларны чиңістер тударға кӧӧктіріп, Олимп ойыннарының чемпионнары полардаңар сағыс тударға кӧстепчебіс, - чоохтапча делегация устағҷызының орынҷызы Виктор Исайченков.
Виктор Николаевичтің кӧрізінең, пу чӧрім пістің хазнада улуғ халых-чарыдығлығ тоғыс апарча. Ол - отставкадағы генерал-лейтенант, чиит тӧл хайдағ кӧріс-тимненістіг ӧсчеткені аны тың сағыссыратча. Палалар компьютердең хыйа парбинчатханы, анда аймах ойыннарнаң, ол санда спорт марығларынаң айғасчатханы улуғ частығ кізінің кӧңніне пір дее кірбинче. Пархаҷахтары Интернетте хайдағ-да хорғыстығ киборг-мохыйахтарны марыға сығарчатханы аны чочындырча - андағ ойыннар соонда палалары хайди истіг узуп аларлар.
- Пеер килер алнында Хызылчар крайының хай пірее орыннарында полғабыс, чиит спортсменнернең тоғасхабыс. Паза ла сизінзем, минің холымны кем-де тут салтыр. Кӧрзем, хызыҷағас чалахай кӱлімзірепче, ӧзіп алзам, сірерге тӧӧй поларға харазарбын тіпче, - чоохха хозылча Олимп ойыннарының чемпионы Татьяна Лебедева, ниик атлетикаҷа саблығ спорт узы.
Татьяна Романовна андағ хайығны уғаа пӧзік паалапча, мындағ тоғазығлар тикке парбинчатханын таныхтапча. Ол хызыҷахтың ӧрчіліг харахтарын табырах ундут полбаспын тидір. Итсе, позы даа кічіг туста андағ хылыхтығ полтыр - секцияа чӧрчеткенде, саблығ спортсменнернің хыринда поларға, олардаң ӱгренерге хынҷаң. Амды позына андағ ӱлӱс тӱсті - пасхазына кӧзідім полча.
Кӱресчі Владимир Чебоксаров Тюменьнең, мындағ чорыхта пастағызын на араласча. Оңарылыстығ, грек-рим кӱрезінең айғасхан саблығ спорт узы иң пастап кӱрес секцияларының тоғызына хайығ айландырча, чииттернең хынып тоғасча.
Хабарҷыларнаң чоох алысхан соонда, аалҷылар Ағбандағы олимп резерві училищезінің студенттерінең тоғазарға парыбысханнар. Олар Хакасияда 24 сентябрьға читіре поларлар, уғаа алғым программалығлар. Республиканаң анымҷохтазар алнында олар хабарҷыларнаң пазох тоғазарлар, сағыстарынаң ӱлезерлер.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы