СПОРТ ТИЛІЗІНЕ ХОЗЫМ ИДЕР
21.09.2016
Хабарлар
Ирткен неделяда Алтай аймаандағы Кӧк хайа аапда футбол ойнаҷаң наа чазы пайрамни азылған. Аны азарында Хакасия пазы Виктор Зимин, Россияның Хазна Думазының депутады Надежда Максимова, Хакасияның спорт министрі Валерий Денщиков, Алтай аймааның пазы Владимир Пономаренко араласханнар.
Пiс стадионзар читкенібісте, футбол чазызында ДЮСШ ӱгренҷілері ойынға тимненчеткеннер: Кӧк хайа аалның паза Ағбан городтың футбол командалары. Кӧк хайа командазының тренері Евгений Тудвасов, Ағбан командазының тренері Иван Кунстман полғаннар. Че иң пастағызын, футбол чазызын азып, алғыстас сӧстерін чыылысхан чонға Хакасия пазы Виктор Зимин читірген.
- Аарлығ чир-суғҷыларым! - чооғын пастаан Виктор Михайлович. - Прай чӱреемнең Алтай аймааның Кӧк хайа аал чуртағҷыларын паза республиканың спортха хынчатхан прай чонын пу танығлығ кӱннең алғыстапчам. Пӱӱн піс футбол чазызын асчабыс. Ағбандағызынаң, Харатастағызынаң, Саяногорсктағызынаң, Асхыс аалдағызынаң хада пу пизінҷі улуғ футбол чазызы полча. 2009 чылдаң сығара футбол ойнаҷаң кічіг чазыларнаң хада - арған чабығлығ пу 14-ҷі площадка. Анда да Хакасияда мындағ чазы чох полған. Спорт объекттерін пӱдірҷең проекттер «Единая Россия» партияның кӱстенізінең тоғынып пастааннар. Піс ахчаны федеральнай министерстволардаң паза ведомстволардаң алчабыс. Піске Хазна Думазының депутады Надежда Сергеевна Максимова улуғ хабазығ иткен. Пірге тоғынып, піс чахсы салтарларға читкебіс. Читі чылға республикада 100-че спорт объекті пӱдіріл парған. Ол санда Тӧӧ пазындағы спорт кіні. Аны хоостыра пістің республиканың полған на тӧртінҷі чуртағҷызы спортнаң айғасча. Пу футбол чазызында олғаннар даа, улуғлар даа ойнирлар. Ідӧк, мин ізенчем, мында пістің «Саяны-Хакасия» профессиональней командабыс ойнир. Мында аймах синдегі марығлар иртер. Пу спорт площадка мыннаң мындар тилізін, спортсменнерге, «ағырчатханнарға» туза ағылзын.
Пайрамда чоох тутханнар Хакасияның спорт министрi Валерий Денщиков, Россияның Хазна Думазының депутады Надежда Максимова паза Алтай аймаа пазы Владимир Пономаренко, Алғыстас сӧстері тоозылғанда, кибір хоостыра меспекті пастағызын тебер кізілер сыхханнар. Пу нандырығлығ пӧгінні Виктор Зимин, Валерий Денщиков, Надежда Максимова, Владимир Пономаренко паза ДЮСШ ӱгренҷізі, Кӧк хайа аалның футбол командазының капитаны Кирилл Батыченко толдырыбысханнар.
Наа чазыда пастағы ойынны ДЮСШ ӱгренҷілері иртіргеннер, олар - Кӧк хайа аалның паза Ағбан городтың командалары. Ойын уғаа хынығ ирткен. Олғаннар тактиканы чахсы пілчеткені харахха тасталған. Удур-тӧдір пас пиріп, олар «ыырҷаа» гол кирібізерге кӱстенгеннер. Че Кӧк хайа аал командазының тимненізі пӧзік арах пілдірген. Пастағы таймдох олар «ыырҷының» хаалхазына ӱс гол кир пиргеннер.
- Піс спорт мероприятиелерін кӧптең кӧп иртірчебіс, - таныхтаан Хакасияның спорт министрі Валерий Денщиков. - Чахсы салтарлар парох. Хакасияның спортсменнері Россияның піріктірілген командазына кірчелер. Ӱр нимеете пістің теннисист-«колясочниктер» Россия хазна чемпионадын паза хазна кубогын утып алғаннар. 2009 чылда хазнаның піріктірілген командазына Хакасияның читі спортсмені кірген, амғы туста - 43 кізі. Таланттығ чииттер пістің уғаа кӧп. Пӱӱл піс Рио-де-Жанейрозар пар полбаабыс, че пістің кӧп таланттығ спортсменнер пар. Республикада олғаннарға паза чииттерге спортнаң айғазарға прай оңдайлар тӧстелче. Хакасияда спорт тилібеен полза, республикада ЦСКА школазы азылбасчых таа.
Минің кӧрізімнең, пу орта сӧстер. Хакасияда спорт тилізіне пу наа футбол чазызы улуғ хозым идер, Мында трибуналар сағам чоғыл, че, ӱр дее полбаза, футбол чазызы улуғ стадионға ӧс парарына ізенчебіс.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде