КӦРІС ПІР ЛЕ - РЕСПУБЛИКАНЫ АННАҢ АНДАР ТИЛІДЕРІ
23.09.2016
Хабарлар
Хакасияның пазы Виктор Зимин республиканың финанстар министрі Семён Аёшиннең паза Россияның Хазна Думазының Хакасиядаң сығара депутады Надежда Максимованаң хада пу кӱннерде Россияның финанстар министерствозында тоғысчы тоғазығлар иртірчелер. Ӱзӱрҷең ӧӧн сурығлар санында - республикаа хоза ахчалығ полызығ пирері.
Таныхтирға кирек, пу чӧптезіглер Россия правительствозының кнезі Дмитрий Медведев регионнар пастарынаң хада иртірген чыылығда алылған чарадығлар хоостыра апарылча. Ол чыылығ август ортызында Псковта ирткен.
Регионнарға ахчанаң хабасчаң сурығлар октябрь ортызынзар федеральнай синде тӧстелген ӧнетін комиссияның чыылиинда ӱзӱрілер тіп кӧрілче. Аннаңар пӱӱнгі пӧгіннернің пірсі - республиканың чуртас-экономика тилізін паза чуртағҷыларының кирексіністерін арачылап, Россияның финанстар министерствозында азынада чӧптезіглер апарары.
Ол сурығлар ӱр ниместе Россияның финанстар министрінің орынҷызы Леонид Горниннең тоғасханда ӱзӱрілген. Тоғазығ соонаң Хакасияның пазы салтарларнаң ӱлескен:
- Кӧріс пір ле - республиканы аннаң андар тилідері. Киҷее ле піс прайзыбыс табығлар процезінде чуртаабыс. Пістің хазнаа, пістің республикаа хайдағ ӱлӱс таллиры - ол уғаа кирек сурығ. Амды, тізең, пар сурығларыбысты аннаң андар пӧгерге кирек. Оларның пірсі -республиканың кредиттіг обязательстволары. Минфинзер пу сурығҷа парарға мин азынада пӧгінгем. Анзынаң республиканың бюджеді, кізілернің чал ахчазы хайдағ полары, социальнай обязательстволар хайди толдырылары палғалыстығ. Піске прай пӱдіріглерібісті тимге сығарарға кирек. Піс пір дее нимені тастабинчабыс. Пӱӱн минфинде пістің республиканың кӧрізінең чарасханнар. Пірее сурығларҷа азынада чӧптезіглерге читкебіс. Пiсті исчелер, пісті оңарчалар, пістің саннарнаң чарасчалар, анзы чахсы,
Иң ӧӧні - піс тиңе чоохтас полчатханыбыс. Пістің производствобыстың ӧзізі - 105 %. Піс ахчаны олаңай «чіп салған» эрінҷектер нимеспіс. Пiс пӱӱл налогтар чыырынҷа теестегі ӧзіске чидерге пӧгінчебіс. Мына пу кӧзідімнер регионға хабазығ пирердеңер піске минфиннең хада чоохтасчаң право пирчелер. Пістің депутат Надежда Максимова мында улуғ тоғыс апарарын узаратча. Пу аның пӧгіннерінің пірсі, хайзын ол алында толдырҷаң, республикаа хабазып. Мағаа ӧріністіг, Хакасия чуртағҷылары табығларда ӱннерін пістің депутадыбысха пиргені ӱчӱн.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы