«ХАРААҒЫ ПОЛИЦИЯ» ТОҒЫЗЫН ТООС САЛДЫ
23.09.2016
Хабарлар
Киҷее Хакасияҷа МВД-да ӱр нимеске тӧстелген «Хараағы полиция» пӧліктің тоғыс салтарларына чарыдылған брифинг ирткен. «Хараағы полицияның» пастығы полған полиция подполковнигі Александр Тюнин паза МВД-ның пресс-служба устағҷызы полиция подполковник Сергей Кузнецов журналисттернің сурығларына нандырғаннар.
Мында чоохтирға кирек, Александр Тюниннің тӧреміл тоғызы - Хакасияҷа МВД-ның чонның амырын хадарарынҷа пӧлік пастығының орынҷызы. Ол чайғы тусха тӧстелчеткен «Хараағы полиция» пӧліктің пастығына турғызылған. «Хараағы полиция» 2011 чылда тоғынып пастаан, пӱӱл ол 20 майдаң 20 сентябрьға теере тоғынған.
Хайди искірген Сергей Кузнецов, чылығ кӱннер пасталыбысса, чон городсар сыхча, орамаларда орайға теере полча, піреезі хараа тооза даа чӧрче. Прай ла кізілер иптіг тудынминчалар, піреезі, ізілік полып, чонның амырын сайбапча. Тың суум-саамнығ орыннарда полиция посттарын дежурстваа турғызарға килісче. Анзына чуртағҷыларның искіріглері чахсы хабасча. Руль кистіне изірік одырыбысчатхан кізілер кӧп сайбағлар ит салчалар. Ідӧк хараазын пірее садығ туралары, закон сайбап, харанға араға сатчалар, улам чазы читкелек чииттерге. Андағ искіріглерҷе хайди даа сыныхтағлар апарылча.
Александр Тюниннің чооғынаң, пӱӱл Хакасияҷа МВД министрі Илья Ольховский «Хараағы полициянаң» устирға аны турғыс салған. Ӱр нимеске тӧстелчеткен пӧлік Ағбанда ла тоғынча. Пылтыр хараазын чонның амырын хадарарға ӧӧнінде чазағ полицейскайлар сыхчаң полза, пӱӱл ӧӧнінде мобильнай нарядтар тоғынғаннар. Пӧлікке аймах службаларның полицейскайлары кірчелер. Пӱӱл «Хараағы полицияда» 27 кізі саналған, куннің сай службаа 15 кізі сыхчаң. Полиция тоғынҷыларына, кирек полза, ГИБДД-ның ДПС инспекторлары паза ОМОН полысча. Мының алнында пӧлік 4 час иртенге теере тоғынҷаң полза, пӱӱл 6 часха теере тоғынған.
Хараазын даа чонның амырын сайбапчатхан кізілер удаа тоғасчалар. Піреезі 3-5 час хараада рестораннаң сыхча, тынағдаң ибзер айланча. Изірік кізілер ниме итчеткеннерін постары даа пілінминчелер.
Мының алнында чииттер удаа город орамаларында, ӧӧнінде Лениннің проспектінде, пиво ізіп, тутырҷаңнар. Ам андағ киректер кӧп таныхталбинча. Ол пістің не тоғызыбыс сылтаанда полбас. Пу кӧстегҷе патруль-пост службазының полицейскайлары, участковай уполномоченнайлар тоғынчалар. Чон ам тасхар, орамаларда, парктарда араға ізерге чарадылбинчатханын оңарып пастабысхан.
Машина двигательлерін тың аахтадып чӧрчеткен водительлер чонны ӧкпелендірчелер. Оларнаң ГИБДД тоғынҷылары тоғыс апарчалар. Хайди оларны хатығлиры законнарда чахсы кӧзіділбинче. Ам хати-хати руль кистіне изірік одырған водительлер уголовнай нандырыға тартылчалар. Пӱӱл 174 водитель руль кистінде изірік тутырған, 34 водительдең тоғыр уголовнай кирек азылған. «Хараағы полиция» пасха службаларнаң хада 20-ҷе изірік водительні тутханнар. ГИБДД тоғынҷылары городтың пірее орамазында, рейд иртіріп, прай водительлерні сыныхтаҷаңнар, че андағ сыныхтағлар прайзының кӧңніне кірбинче, аннаңар ам андағ тоғысты алыстырарға киліскен.
Сибирьде «Хараағы полиция» осхас пӧлік Ағбанда ла тоғынча. Пасха регионнардаң опытнаң ӱлезерге айланчалар. Пӧлік пӱӱл 200-че административнай сайбағ ілезіне сығарған, 100-че кізіні орамаларда араға алай пиво ісчеткен ӱчӱн тутхан. Сайбағларны ілезіне сығарарға чуртағҷылар полысчатханы ӧріндірче. Изірік кізі руль кистіне одырчатханын кӧрзелер, полицияа искірібісчелер.
«Хараағы полицияны» чыл тооза тоғындырза, аның улуғ тузазы чох полар. Ол чылығ туста ла тоғынарға кӧстелче, хаҷан кӧп чон орамаларҷа чӧрче. 24 час соонда ам город орамаларында кізілер халбинча. Анҷа кӧп полицияны хараазын тоғындырарға кирек чоғыл. Городтың полициязы позының графигінҷе тоғыс апарча, «Хараағы полиция» оларға хоза полызығ оңдайынаң тӧстелче.
Чазы читкелектердеңер чоохтаза, олғаннар хараа удаа тоғаспинчалар. Комендантскай час тоғынча нооза. Ибдең тискен палалар ла пірееде учурапчалар. Пірееде 14-15 частығ саарбахтар, постарын улуға санап, араға пастағызын на іскен полчалар. Че полициянаң тоғассалар, олар паза андағ ниме хаҷан даа итпеске молҷапчалар, сӧс пирчелер.
Полиция тоғызында ӧӧні - профилактика, сайбағлар полдыртпазы. Полицейскайны кӧр салза, сайбағ даа идерге сағыс чіт парча полар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы