ХЫРАҶЫЛАР ЧЫЛЫҒ ТУРАРЫН САҒЫПЧАЛАР
05.10.2016
Хабарлар
Хакасияда хар чаап парғаннаңар, хыраҷыларға комбайннарын тохтадарға киліскен. Республиканың пірее аймахтарында хар 15 сантиметрге теере чаап парған.
Ікі неделя чаған наңмыр паза хар тоңастығларны аларға харығ полчалар. Кӧбізі аймахтарда тоңастығларның ӧӧн чардығы кизіл парған, че Орджоникидзе аймаанда тоғыстарның 59 % ле толдырылған, Шира аймаанда - 42 %. Тиксі республикада тоңастығларны чыырынҷа тоғыс 58,1 %-ке толдырылған.
Хомай кӱннер турза даа, пӱӱлгі кӧзідіглер ирткен чылдағызынаң пӧзік, тамах таа чахсы алылары кӧрілче. Пӱӱнгі кӱнге пуғдай, ас паза кӧче 2015 чылдағызынаң 13 муң тоннаа кӧп алылған.
- Ӧӧні ӧскіріп алған культураларны чыып алары ла нимес, ідӧк хайраллап халары, - таныхтаан Хакасия пазы Виктор Зимин, позының орынҷызы Иван Вагнернең чоохтасчатханда. - Республиканың фермерлер хоныхтарында мал азии читкіҷе поларға кирек. Ирткен чылда пістің азыхнаң сидіксіністер полған, пӱӱл азых сурии турбасха кирек. Киртінчем, чахсы кӱннер турыбыссох, республиканың аграрийлері тоңастығларны ікі хати чапчаң чыырлар, тоғыстарны тузында тоозарлар.
Иван Вагнер хар тың чаап парған аймахтарда тоңастығларны чыырына прай кӱс салылар теен.
- Итсе, ӱрег чох киліспес, - чазырбаан Иван Эрвинович. - Андағ даа полза, піс, оларны хызырар ӱчӱн, прай кӱзібіс саларбыс.
Олох туста азых тимнирі чахсы салтарлар кӧзітче. Аал хонии предприятиелері паза фермер хоныхтары 146787 тонна от (ирткен чылдағызынаң 50 муң тоннаа кӧп), 79066 тонна сенаж (18 муң тоннаа кӧп), 36852 тонна силос (11 муң тоннаа кӧп) тимнеп салғаннар.
Гидрометцентрнің искіриинең, пу неделяда Хакасияда чылығ турары кӧрілбинче - ортымахти суткада ікі градус чылығ турар. Хар хайыл парар, аал хонии тоғыстары узарадылар.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде