КӰН АЛТЫНДА ЧАЛТЫРАП ТУРЧА
11.10.2016
Хабарлар
Чайғызын улуғ даа, кічіг дее аалларда палалар паза чииттер тол парчалар.
Студенттернің тынағ тузы пасталыбысча, іҷе-пабаларына полызарға чыылысчалар. Олғаннар, тізең, каникулларға сығып, аға-ууҷаларынзар городтардаң тисклепчелер. Палаларға аалда тынанып аларға, суға сомарға хандыра полчатпас па.
- Иирде клубха тол парчалар, піреелері библиотекада одырғлапчалар, пасхалары теннис ойнапчалар. Тасхар футбол даа тепклеп пастабысчалар, - чоохтапча Таштып аймаандағы Индіркі Мадыр аалның клуб устағҷызы Софья Кузургашева.
Софья Олеговна, Токпешевтер хызы, мында 10 чыл артиинаң тоғын парир. Аның иң улуғ ӧрінізі - аалдағы клубты нааҷыли тыхтап пиргеннері. Иргізі пір дее кӧрімі чох турҷаң осхас. Андағ орынзар чон даа чыылызарға хынмаҷаң. Ӱгренҷілер алай улуғ частығлар библиотеказар ла кил парҷаңнар. Олғаннар уроктарға тимненерге пірее чапсых книга сурастырғлап пастабысчалар.
Аалдағы библиотека тоғынҷызы Наталья Григорьевна Казыгашева кемге хайдар книга киректелчеткенін
азынадох піліп-сизініп одырча, Пу тоғыста ол ӱр ниместең дее тоғынза, аны алыстырарға сағынминча. Уламох пілізін кӧдірерге чарадыбысхан, Минсуғдағы ӱгретчілер училищезінің библиотека тоғынҷыларының пӧлиинзер кірібіскен. Ол библиотеказын, книгалар хоостыра кӧр килзе, хомайлар санына кирерге сағынминдаача. Тоғызын чахсыландырарға харазып, аймах-пасха кӧзідіглер, тоғазығлар иртірче.
- Пӱӱл часхызын иртірген книгалар кӧзідии аал чур-тағҷыларының кӧңнілеріне тың кірген. Библиотеказар удаа чӧрчеткен кізілер дее аны чапсырхап кӧрчеткеннер, - чоохтапча Индіркі Мадыр аалның клуб устағҷызы Софья Кузургашева.
Пістің республиканың устағ-пастаа кічіг паза ыраххы аалларны хайраллирына, мыннаң мындар тилідеріне улуғ хайығ айландырчатханы прайзының кӧңніне кірче. Ағаа хоза, Индіркі Мадыр ікі аймах кӧстегліг программаа кіріп алар оңдайлығ. Пастағызы, анзы тиксі Россия синіндегі кӧстегліг программа, хазнабыстағы ас саннығ чон чуртапчатхан орыннарға ӧнетін хайығ айландырары, полызығ пирері. Пу аалда ӧӧнінде ас саннығ шор чон чуртапча. Ікінҷізі, кічіг паза ыраххы аалларны хайраллап халар паза тилідер кӧстегліг программа. Индіркі Мадыр Таштып аймаандағы ыраххы ааллар санына кірче.
Ол кӧстегліг программаларны тузалан халарға сағынып, иргі клубты нааҷыли тыхтадып алардаңар сурыныс пічиин тимнебіскеннер. Анҷа-мынҷа сағаан соонда, Индіркі Мадырдағы иргі клубты нааҷыли тыхтирына 2,5 млн салковай позыдылчатханнаңар сағба килген. Анзына хайди ӧрінмес. Мадыр аал чӧбінің пазы Семён Чебодаев тыхтағ тоғыстарынаң айғазар пӱдірігҷілер кӧрглеп сыххан. Асхыстағы «Атлант» пӱдіріг ӧмезі ол тоғысха сыданған. Амды тайға пори аалдағы наа кӧрімніг клуб кӱн алтында чалтырапча, ай алтында чарыпча, прайзының хайиин тартча.
- 2015 чылның декабрь айында пеер кіргебіс. Наа чылны удурлирға, пістіңнер ле нимес, хонҷых ааллардағылар даа чыылысханнар. Піске аймах сыйыхтар читірілгеннер, - ӧрінізін чазырбинча клуб устағҷызы.
Софья Олеговнанаң хада Индіркі Мадыр аалның кічіг частығ чуртағҷылары матап ӧрініскеннер. Клуб хыринда олған площадказы тимге сыххан. Анда палаларға кӧп тее ниме иділбеен полза, кічіглерге, пеер чыылызып, маң туста майыхханҷа ойнап аларға чарапча. Ӧскен сыннары хоостыра турнигестерде тартынып алар оңдай пар. Алай ба пасхысча, сығып, тӱс чӧрерге чарир. Саңай пас айланғанҷа кірлектеніп алҷаң орын парох. Че иң не ӧӧні - чабығлығ «мискеҷек». Хынығ ойынға саңай сабыл парыбызып, наңмырға пастыр салзалар, кӧмес тее хорыхпинчалар, чалбах «мискеҷек» алтында чыылыс парчалар, хынығ чоохтазығ пастапчалар. Олғаннарның постарының даа сағыссырастығ сурығлары табылчатпас па.
- Амды тоғынарға чахсы паза истіг. Пір ле хыйал - аал чӧбі тузаланған электричество ӱчӱн тузында ахча тӧлебин салза, чарытхы чох халчабыс. Итсе, мындағ хыйал пістің аймахтағы прай даа аалларға теелчеткен осхас - ӱлесче позының сағыстарынаң клуб устағҷызы.
Чайғызын, чарытхы чох пол парза, чалахай иирлерні ойыннарны, дискотеканы тасхар иртірҷеңнер. Чииттернің кӧрізінең, уламох хынығ пілдірчеткен осхас. Чарытхы клубта ла чоғыл нооза. Хонҷых туралар чол кизіре ле. Ол санда Софья Олеговнаның туразы. Аннаңар чииттер ниме ле сағын таап албинчалар. Хысхаҷахти чоохтаза, Таштып аймааның ыраххы аалына саналчатхан Индіркі Мадырда культура тоғызы хомай нимес апарыл турған чайғы тооза.
Амды клуб устағҷызының алнында турчатхан ӧӧн пӧгіннернің пірсі - шор чонның саблығ оолғы, писатель паза просветитель Иван Штыгашевтің ноябрь айда 155 чазын турыстығ таныхтирында ӧткін аралазары, ағаа чахсы тимнен салары. Прайзы пілче, ӧӧн пайрам Мадыр аалда иртер. Че оларға даа андағ танығлығ кӱнге маңат тимнен саларға киректелче. Иван Матвеевич, миссионер тоғызын апарып, прай хонҷых аалларда ӧткін хайынҷаң полбас па. Анзын библиотекада тимнелчеткен кӧзідігде хайди даа таныхтап саларға пӧгін тутчалар культура тоғынҷылары.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы