БЮДЖЕТ ПАРЫСТАРЫН ӦСКІРЕР ПӦГІННЕҢ
14.10.2016
Хабарлар
Хакасияның Ӧӧркі Чӧп президиумы 12 октябрьда, теестегі чыылиин иртіріп, 10 артиинаң сурығны кӧрібіскен. Оларның пірсі транспорт налогына теелген. Республика законынзар кирілчеткен алызығларҷа аның синін ортымахти 26 проценте ӧскірібізері кӧрілче.
Чыылығны Ӧӧркі Чӧп кнезі Владимир Штыгашев апарған.
«Транспорт налогынаңар» республика законынзар алызығлар кирердеңер» закон проектінең Хакасияның финанстар министрi Семён Аёшин таныстырған. Хайди ол чарытхан, закон проекті республика бюджедінің парыстығ чардығын алғыдар пӧгіннең тимнелген. Чоох парча ат кӱзі 150-дең асчатхан двигательліг автомобильлердеңер, ол санда автобустардаңар. 150-ге теере ат кӱзі двигательліг машиналарға ӧзіс теелбес тіп ізендірген министр.
- Транспорт налогының ставказын алыстырғаны республика бюджедінің парыстарын 2017 чылда 6 миллион салковайға ӧскірібізер, - таныхтаан Семён Аёшин.
- Анзы юридическай лицолар аванстаң тӧлеен сылтаанда иділер. 2018 чылдаң пасти, парыстар 44 миллион артиинаң салковайға ӧс парарлар, олаңай кізілер 2017 чылның транспорт налогын 2018 чылда тӧлирін санға алза.
Олох туста, министрнің чооғынаң, транспорт налогы ӧскірілзе дее, пістің налог сині Сибирьдегі регионнар аразында иң тӧбін полар.
- Пістің транспорт налогының амғы ставказы 150-200 ат кӱзі двигательліг ниик автомобильлерге 25 салковайға тиңнелче, - искірген Хакасияның финанстар министрі. - Хызылчар крайында - 29 салковай, Кемеров облазында - 45 салковай. Ӧзіс соонаң пістің ол налог ставказы 29 салковай пол парар, Хызылчар крайының чіли. Ат кӱзі 200-ке теере двигательліг автобустарға пістің амғы налог ставказы - 15 салковай. Піс 20 салковайға теере ӧскір саларға чӧп кирчебіс. Таныхтирға кирек, Хызылчар крайында андағ автобустарға налог ставказы 25 салковайға тиңнелче, Кемеров облазында - 25 салковай, Новосибирск облазында - 50 салковай.
Оӧркі Чӧп президиумы пу чыылығда ідӧк Россияның Хазна Думазынзар закон сығарҷаң пастағнаң сығар сурығны кӧрібіскен. Хайди чарытхан Ӧӧркі Чӧптің аграрнай политикаҷа, ас-тамахча паза чир тузаланызынҷа комитедінің кнезі Пётр Воронин, федеральнай законнарзар кирілген алызығлар палыхтирға арендаа пирілген суғ объекттерінең тӱзімніг тузаланарға оңдай пирер. Ӧӧнінде чоох парча, ол суғ участоктарында палыхтирынаң пасха, ідӧк садыға палых ӧскірерге чарадардаңар.
Пу паза пасха даа сурығларны Ӧӧркі Чӧптің чағынғы сессиязы ӱзӱриине сығарарға чарат салғаннар. Сессия 26 октябрьда иртер тіп кӧрілче.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы