НАА ПРОГРАММА ЧУРТАСХА КИРІЛЧЕ
14.10.2016
Хабарлар
Хакасияның спорт министерствозында пресс-конференция ирткен. Анда араласханнар Хакасияның спорт министрі Валерий Денщиков, Россияның саналығ спорт федерациязының президенті Елена Вяльбе, РУСАЛ-ның кізізі Антон Савченко,
«En+Логистика» компанияның ӧӧн директоры Евгений Челтыгмашев. Тоғазығ Хакасияның спорт министерствозы, «РУСАЛ Саяногорск» АО паза «Эн+Менеджмент» ООО саналығ спортча пірге тоғынардаңар чӧптезігде хол салғанына чарыдылған.
Хайди таныхтаан Валерий Денщиков, саналығ спорт тилізі Хакасияда наа чолға сыхты. Программа хар кӧп чаапчатхан муниципальнай пӱдістерге кӧріл парған. Аны хоостыра андар материальнай полызығлар пирілер. Іди олғаннар саналығ спортха тартыларлар.
Валерий Васильевич паза Елена Валерьевна тренерлернің семинарында пол килгеннер. Ідӧк Елена Вяльбе Тӧӧ пазындағы трассаларда пол килген. Ол кӧңнінең ӱлескен:
- Хакасияда саналығ спортха улуғ хайығ салылча. «На лыжи» наа проекттеңер чоохтаза, РУСАЛ паза «Еп+» ол программаа кіргені уғаа ӧріндірче. РУСАЛ пастаанаң Хакасияда паза Сибирьнің ікі регионында саналығ спортха полызығ пирердеңер программа тоғынып пастаан. Хакасиядаң пасха программаа Хызылчар крайы паза Иркутск облазы кір парғаннар. Муниципальнай пӱдістерде тоғынчатхан тренерлер Омсктағы физическай культура институды иртірчеткен семинарда араласчалар. Оларны наукалар кандидаттары паза докторлары ӱгретчелер. Ідӧк таныхтирға сағынчам, РУСАЛ Россияның саналығ спорт федерациязының спонсоры полча. Экономикада сидіксіністер дее полза, Тӧӧ пазында иртчеткен проект тиліпче. Мин ізенчем, анда наа стадион пудіріл парар. Саналығ, роллерліг чӱгӱрҷең трассалар пӱдіріл парғаннар. Ізенчем, спортсменнер анда хаҷан даа чӱгӱрерлер. Пістің спонсорлар «РУСАЛ» паза «Еп+» компанияларға улуғ алғызым читірчем.
Антон Савченконың чооғынаң, РУСАЛ тоғынчатхан регионнарда чуртас сині кӧдірілче. Олғаннар спортнаң айғазарына компания улуғ хайығ салча. РУСАЛ саналығ чӱгӱрчеткеннернең улуғ палғалыс тутча. Аннаңар Тӧӧ пазында программа тоғынып пастаан. Ӧӧнінде ол олғаннарға кӧрілген. Ӧӧн пӧгіннернің пірсі олғаннарны 2022 чылдағы олимпиадаа тимнирі полча. Проект 40 млн салковайға кӧріл парған. Ноябрь тоозылғанҷа 5 млн салковайға обмундирование алылар. Пазағы чылда ӱс регионда олғаннар аразында марығлар иртер.
Евгений Челтыгмашевтің чооғынаң, «Еп+» компанияның тоғызы чонға кӧріл парған. Компания полған на проект хоостыра тоғынарға тимде. Аның акционері Олег Дерипаска Хакасияа улуғ хайығ салча. Аннаңар компания пу тоғысты мыннаң мындар апарар.
Пресс-конференцияны тоозып, Валерий Денщиков таныхтаан, палаларға тоғынары ӧӧн пӧгін полча. Аннаңар проектке прай кӱс саларға кирек. Ікі-ӱс чыл пазынаң тоғыстың салтарлары полар. Спортнаң айғасчатхан олғаннар саны ӧс парар.
Хайди таныхтаан Валерий Васильевич, спорт министерствозының сайты амды ідӧк хакас тілінең апарылча.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы