ХАКАСИЯДА ЧУРТАСТЫ АРАЧЫЛИРҒА ӰГРЕДЕРЛЕР
19.10.2016
Хабарлар
Хакасияның пазы Виктор Зимин «Россия МЧС-ының экстреннай психологическай полызығ кінінің» Сибирьдегі пӧлиинің пастығы Валентина Заборовскаянаң тоғасхан. Тоғазығда ідӧк Хакасия пазының орынҷызы Владимир Крафт паза Россия МЧС-ының Хакасияҷа ӧӧн устааның пастығы Александр Мулл араласханнар.
Регион устағҷызы иң не пастап Валентина Григорьевнаа оларның ведомствозы Хакасия чуртағҷыларына сағыбаан саайлар тузында полызығ пирген ӱчӱн алғызын читірген.
- Регионның адынаң алғыс сӧстерін читірчем прайзына, кем сидік туста республикада службазын апарған, - теен Виктор Зимин.
Валентина Заборовская аның Хакасиязар чорығы «Чуртасты арачылирға ӱгреніп ал» проектнең палғалыстығ полчатханын таныхтаан. Проектті ирткен чылда «Россия МЧС-ының экстреннай психологическай полызығ кіні» паза Россияның хазых хайраллаҷаң министерствозы чуртасха киріп пастааннар. Аның ӧӧн кӧстее - чобаға кір парған кізілерге полызарына паза психология саринаң хабазарына чуртағҷыларны ӱгредері.
- Хайдағ даа кізі, хыйалға кірген кізінең хости полза, имнег тоғынҷылары килгенҷе, ағаа полыс пирер оңдайлығ, - теен Валентина Заборовская.
Проектті чуртасха кирері хоостыра пастағы полызығ пирерінҷе пособие чарыхха сығарылған. Ол пособие Сибирьдегі федеральнай округта чуртапчатхан орындағы чоннарның тіллеріне, ол санда хакас тіліне, тілбестел парған.Таныхтирға кирек, хакас тілінең сығарылған пособиені Валентина Заборовская Хакасияның пазына мындох сыйлап пирген.
Че «Чуртасты арачылирға ӱгреніп ал» проекттің чӧрімі пособие сығарарынаң тоозылбинча. Тоғазығда чағынғы туста Хакасияның ӱгредіг заведениелерінде паза предприятиелерінде пастағы имнег полызиин пирҷең сурығларға чарыдылған уроктар паза презентациялар иртірерге чарадығ алылған. Олох туста Хакасияның пазы Виктор Зимин проектте кӧп арах чуртағҷыларны араластырар сурығҷа тоғыныбызарға чахығ пир салған. Андағ тоғысха инструкторларны тимнирін Россия МЧС-ының экстреннай психологическай полызығ кіні позына алып алар.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы