ААЛ ЧУРТАҒҶЫЛАРЫНА ИСТІГ ПОЛАР
11.11.2016
Хабарлар
Ағбан пилтіріндегі Калинин аал хыриндағы чазыда чонға чурт пӱдірінерге кӧп чир участоктогы пирілген. Анда ам наа туралар пӱдіріл парған, аның чуртағҷыларына трассазар чидіп аларға оой полбаан. Амды андағы Маршал Жуковтың орамазындағы чолның пастағы кизегін асфальтнаң чаап салдылар. Аны азарында Хакасияның пазы Виктор Зимин араласхан.
Мындағ танығлығ мероприятие андағы чон толдыра чыылыс парған. Соох чилде флагтар чалбырапчалар, чол хыриндағы ачыхта хакас ибіӌегі турча. Аның ізии алнында улуғ нимес кибіс тӧзелік. Хости столда - улуғ самовар, микроволновка, ізіг чей. Ибіӌектің тастында Калинин аалның схемазы паза Маршал Жуковтың орамазының мының алнындағы, пӱдіріг тузындағы паза амғы сомнары хызылых.
Виктор Михайлович килгенде, аны чон орыс кибірінең удурлаан. Аның холына пирілген микрофонны хыйа идіп, Хакасияның пазы, чыылысхан чон аразынзар кіріп, оларнаң чоох алысхан.
- Илееде тус сағаан чолның пастағы кизегі пӱдіріл парды, - теен Виктор Зимин. - Ам даа 1,5 километр пӱдір саларға кирек. Калинин аал халғанҷы туста чахсы тиліпче, прай тоғыстар план хоостыра апарылча. Мында иптіг чоллар пӱдірерге хайди даа кирек полар. Наа туралардағы олғаннарға школаа чӧрерге кирек, аннаңар чол хастада тротуарлар пӱдірілер. Прай тоғыстарны толдыр саларға 30 миллион салковай киректелер. Пазағы чылда пӱдіріг тоғыстары узарадылар, ікі чылға прай тоғыстарны тоос саларбыс.
Піске ам даа Тӧӧ пазынзар, Палыхтығ суғ аалзар чолларны пӱдірерге кирек, Пии аймаандағы чоллар иптелер. Ниме дее полза, чоллар пӱдірер бюджет хорадығлары хызырылбас. Молодёжнай поселокта чолларны ідӧк тыхтирға кирек. Калинин аал хыринда чурт пӱдірінерге тӧрт муң чир участотын пирері кӧріл парған. Пазағы чылда мында чол пӱдіриине читіҷе миллион салковай пирілер, хоза 500 - 600 метр чол асфальтнаң чабылар.
Ам хайдағ даа сидіксіністерге урунзабыс, прай пӱдіріг тоғыстарын узарадарбыс. Пу чылны iӌе чылы чарлап, перинатальнай кінні пӱдір парирбыс. Ол пістің ам иң кирек объектібіс. Iҷелер пала тӧрідерте пасха регионнарзар чӧрбезіннер, мында оларға чахсы оңдайлар пирілер. Андағы тоғыстарны 1-2 айға тоос саларбыс. 3-7 частығ палаларға олған садтарында орыннар пирер сурығны піс Сибирьде пастағызын пӧк салғабыс. Ипчілер, ам, хорыхпин, палалар тӧpiдіңер.
Чол кизіре тартылған чаламаны кизер ӱлӱс Виктор Зиминге, Ағбан пилтірі аймааның пазы Елена Егороваа паза Калинин аал пазы Иван Сажинге пирілген. Олар, хада полған олғаннарны алып, оларның холларына хыптыларны тутырып, чаламаны ӱзе кискеннер. Иван Сажин ибіҷек стенезінде хызылған схемада 240 орыннығ олған сады хайда пӱдірілерін кӧзіткен.
Хакасия пазының орынҷызы Ирина Смолина олған сады 2020 чылға пӱдіріл парардаңар искірген. Че Виктор Михайлович, олох схемада ручканаң пазып, олған садын 2018 чылда пӱдір саларға чахығ пирген, аның ӱчӱн нандырығлығ полар Ирина Геннадиевна.
Пу тоғазығда ідӧк хай пірее пасха даа сурығлар ӱзӱрілген.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы