ПРОМЫШЛЕННОСТЬ ТИЛІЗІ ЧАРЫТХАА ТАРИФТЕРНІ ТУДАР
15.11.2016
Хабарлар
Республиканың экономика тилізінең чарытхаа тарифтер ӧзізін тохтадарында тузаланарға кирек. Андағ пӧгін турғысхан Хакасияның пазы, республика правительствозының экономика блогынаң чыылығ иртіріп.
Чыылығ «Хакас Республика промышленнозының кӱзін 2030 чылға теере тилідері» проектті ӱзӱреріне чарыдылған. Ол нинҷе-де инвестиция проектін піріктірче. Ол санда Пиидегі хара тас кластерін тӧстирін, Абазадағы паза Тӧӧ пазындағы рудниктер базазында металлургия производствозын тилідерін, Тойымда электролитическай тимір марганец сығарӌаң завод пӱдірерін, «Ағбанвагонмаш» предприятиенің базазында тыхтағ-логистика кінін тӧстирін паза аннаң даа пасхазын.
Хакасияның правительствозы пу стратегическай проектче нинҷе-де ай тоғын парир. Регионның экономика тилізінің кӧстеглерінеңер Хызылчардағы экономика форумында искірілген, ол искіріг позынзар улуғ хайығ тартхан. Соонаң Виктор Зиминнің чахиинҷа федеральнай министерстволар устағӌыларынаң хада чӧптезіглер апарылған. Чағынғы туста регион ӱлгӱлері, презентация иртіріп, оларны Хакасия промышленнозының кӱзін тилітчең проектнең таныстырарлар.
Тимнегліг тоғысха паалағ пирер туста Виктор Зимин паза пip пӧгінні таныхтаан, хайзына правительство, проектті чуртасха кирчетсе, алынӌа хайығ саларға кирек. Чоох парча чарытхаа тарифтер тӧстирінде республиканың кирексіністерін арачылирдаңар. Пӱӱнгі кӱнде Хакасиядағы тарифтер Сибирьде ле нимес, тиксі хазнада иң тӧбіннернің пірсі полча. Чарытхаа тарифтер тӧбін полғаны иң туза ағылча республиканың чуртағӌыларына.
Регион пазының ол алыспас кӧрізі: республика чуртағҷыларының паза бизнезінің кирексіністерін арачылап, тӧбін тарифтер ӱчӱн тӧреміл кӱрезері.
- Пу проектті чуртасха кирері хоостыра республика хоза чарытхы кирексіпчеткен наа производстволар тӧстир. Іди пістің чарытхаа тарифтерні тӧбін идер чӧпнең айланар сылтағлар пар. Чарытхы сині ӧс парар нооза. Республикаа ол тӧбін тарифтерні хайраллап халҷаң оңдай. Сойан-Сус ГЭС пістің чирде орныхчатханы андағ правоны піске пирче. Аннаңар піс партнерларнаң хада пір чӧпке килербіс тіп тың ізенчебіс, - чарытхан пос кӧрізін Виктор Зимин.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы