ТИГІРИБ АЗЫЛДЫ
18.11.2016
Хабарлар
Сын киртіністіг христианнарның танығлығ кӱні полды. Ирткен позырахта Асхыс аймаандағы Апчинай аалда тигіриб азылған. Тигірибні азарға Хакасияның паза Ағбанның иң улуғ абызы архиепископ Ионафан килген. Ол позынаң хада полысчыларын паза тигіриб ырҷыларын ағылған. Аалдағыларға уғаа ӧріністіг, поғдархастығ полған. Архиепископ Ионафан аалларҷа тилем чӧрбинче.
Тигіриб тастал парған аал клубының орнында турғызылған. Аны пӱдірерінде улуғ тоғыс апарған Андрей Серафимович Асочаков. «Піске аалда тигірибні турғызарға іӌе-пабам чахаан, анаң ол сурығны пістің род чыылиинда кӧдіргем, чоохтапча ол. - Пір дее кізі тоғыр полбаан. Пӱдіріг тоғызы оой нимес, пастап ӱлгӱлердең чарадығлар кирек, тигіриб устаанаң. Амды кӧрчезер, тигіриб турча. Чонға киртініс кирек, амғы туста уламох».
Кӧп тоғыс иділ парған, ӧӧнінде тигіриб істінде чарых, обрастар турғызылых. Че ам даа итчең тоғыс кӧп, ӧӧнінде тигіриб тастын, сыбап, хазарт саларға кирек.
Че пазох тигірибні асчатханына айланалар. Литургия уғаа ӱр иртче, кӧп молитва хығырчалар. Тигірибні істінең чарыдып пастааннар. Аның соонда тасхар сыхханнар. Архиепископ кізілерінең хада, оларның соонда Худайға киртінчеткен улус тигірибні ибіре кірестіг чӧріс иртіргеннер. Анаң, ізік алнында пазох молитвалар хығырып, тигіриб істіне кіргеннер.
Православнай киртіністіг кізілерге пу сыннаң даа уғаа танығлығ кӱн полча. Асхыста даа ӧнетін тигіриб чоғыл. Олаңай тураларны тигірибге тимнеп, анда пазырчалар.
Апчинайдағылар пу киректе прайзының алнындалар. Мының алнында, хан тузында, Асхыс чирінде ікі тигіриб турған: Асхыста паза Ис пилтірінде. Ол туста Асхыс паза Ис пилтірі улуғ аалларға саналӌаңнар. Тигіриблерні улуғ ла аалларда турғызарға чарадылҷаң полтыр.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы