ХАКАСИЯДА РОССИЯ КУБОГЫ ИРТТІ
22.11.2016
Хабарлар
Халғанҷы туста пістің республикада спортча Россия синіндегі дее улуғ марығлар иртірілче. Меспектіг хоккейні алза, Хакасияда чоннар аразындағы турнирлер иртірілчеткеніне пістің спорт «ағырығҷыларыбыс» кӧнік тее парғаннар. Республикада спорт объекттері кӧп пӱдірілчеткені мында спорттың аймах кӧрімнерін тилідеріне чахсы хабасча. Тӧӧ пазында саналығ спорт кіні пӱдіріл парир, Ағбанда айдас спорткомплекс тимде, аның ниик атлетика залын на читіре пӱдір саларға кирек. Спорт тилізіне регионда мындағ хайығ салылчатханда, Россияның алынҷа спорт кӧрімнерінӌе федерациялары постарының хайиин республиказар айландырчалар.
Амды Россияның дзюдоӌа федерациязы пу спорт кӧрімінҷе хазна Кубогын Ағбанда иртірче. Анзы Хакасияда дзюдоны пӧзік синге кӧдіреріне, олған-узахты, чииттерні пу кӱреснең айғазарға тартарына хабазар. Россияның кӱстіг кӱресчілері Ағбанзар килгеннер.
ПРЕСС-КОНФЕРЕНЦИЯ
17 ноябрьда «Ағбан» спорткомплекстің конференц-залында марығлар пасталар алнында журналисттерге пресс-конференция иртірілген. Анда Хакасияның спорт министрі Валерий Денщиков, Россияның дзюдоҷа иреннернің піріктірілген командазының улуғ тренері Виталий Макаров, Россияның дзюдо федерациязының толдырығ директоры Валентин Хабиров паза марығларның ӧӧн чарғыҷызы, чоннар аразындағы категориялығ чарғыҷы Владимир Востриков араласханнар.
Валерий Денщиков, прайзына чолабит читіріп, марығлар пасталчатханынаң алғыстаан. Хакасияда хайдар спорт объекттері пӱдірілчеткенінеңер паза хайдағ улуғ спорт мероприятиелері иртірілчеткенінеңер искірген. Аның чооғынаң, чағынғы туста Хакасияда дзюдоӌа Россия чемпионады даа иртірілер. Андағ марығлар иртірерге прай ниме тимде. Республикада спортты, ол санда дзюдоны, тилідерге прай оңдайлар пар.
Хайди искірген Валентин Хабиров, улуғ спорт марығларын иртірер география алғыпча, амды пастағызын на дзюдоҷа Россия Кубогы Ағбанда иртер. Хакасияда спорт тиліпчеткені ӧріндірче, марығларда аралазар спортсменнер прай килгеннер, оларны соох таа чалтандырбинча. Марығларда тилекей, Европа, Россия чемпионнары аралазарлар, пір олимп чемпионы даа пазын салған. Кӱстіг спортсменнер толдыра. Пу марығларда Россияның піріктірілген командазына кір полар кӱресчілер сығысса, чахсы полар.
Виталий Макаровтың чооғынаң, пу марығларда спортсменнерге постарының устарын кӧзіт пирерге оңдай пирілче. Аннаң андар олар улам улуғ марығларда аралас поларлар. Олимп чылы пӱӱл ам даа тоозылбаан. Хакасиязар килӌең чолны ырах тиирге чарабинча, спортсменнер прай нимее кӧнік парғаннар. Полғаны ла ам позының амғы тустағы узын кӧзідер. Спортсменнің чазынзар кӧрерге кирек чоғыл. _
Кӧзідімге, Италияның 22 частығ дзюдоизі, халғанӌы туста хазнаның піріктірілген командазына чадап ла кіріп алып, Рио-де-Жанейро-да олимп чемпионы полыбысхан. Амды ол Италияда иң саблығ кізі полча. Ағбаннаң даа чиит спортсменнер улуғ марығларға сығарлар. Сірер хонҷых Минсуғзар кӧріңер, анда дзюдо-ҷа хайдағ чиңісчілер ӧскірчелер.
Владимир Востриков дзюдоӌа чоннар аразындағы федерацияның правилоларына хай пірее алызығлар кирілчеткеннеңер чоох апарған. Пу марығларда чарғыҷылар ам тоғынчатхан правилоларҷа тудынарлар. Прай чарғыҷылар Ағбанзар читкеннер. Аның чооғынаң, олар, ам коллегияа чыылызып, марығларда хайди тудынарын ӱзӱрерлер. Ниме дее полза, прай чиңісчілер сын оңдайнаң чиңіс тударлар.
Валерий Денщиков, прайзын алғыстап, марығлар чахсы иртсін тіп алғаан.
«ХАДЖИМЭ», «ИППОН»...
Россия Кубогына марығлар пасталыбысты. 11 часха «Ағбан» спорткомплекс алнында автомобильлер тығылысча. Кӧрігӌілерні залзар, имнег туразындағы чіли, азахха бахиллар кизіртіп, позытчалар. Трибуналарда чон ідӧк толдыра. Нинӌе спортсмен турнирде аралазар сурыға пастағызын 500-че сан адалған, соонаң ол 400-ке хызырыл парған, анаң - 260. Хакасиядаң марығларда 12 кізі араласча, че олар прайзы чииттер, улуғ марығларда араласпаан спортсменнер.
Кӱресчең залда ӱс нап-наа татами тӧзелік, пір саңай ӱс татамиде кӱресчеткеннерні чахсы кӧріп аларға оой нимес. Аннаңар сіліг кӱресчеткеннерні ле паза Сибирьдегі федеральнай округтың (СФО) спортсменнері кӱресчеткеннерін не кӧріп аларға харасчам. Чоохтирға кирек, марығларда Россияның прай федеральнай округтары араласчалар, ол санда Крымның паза Севастопольның спортсменнері. Олар Устӱнзархы федеральнай округталар.
Японияда тӧреен кӱресте чарғыҷыларның япон тілінең пирілчеткен командалары истілче. Кӱрес пастирға арбитр «хаджимэ» команда пирче, тохтадыбызарға - «матэ», кӱрес тоозылғаннаңар - «соро-мадэ». Микелер паалалчалар: «иппон» (чиңіс) - 100 баллға тиңнелче, «вазари» (чарым чиңіс) - 10 баллға, ікі «вазари» чиңіске ағылча, «юко» - 1 баллға. Хайдағ мике ӱчӱн хайдағ паалар пирілчеткенін чоохтирға ӱр полар, анзын посха кӧрерге кирек, анда ол пілдістіг полар. «Шидо» сӧс сизіндіріг полча.
Пастағы кӱнде иреннер 60 паза 66 килограммнарға теере кӧдірімнерде кӱстерінең сынасханнар, ипчілер - 48 паза 52 килограммнарға теере кӧдірімнерде. Азынада чоохтаза, пістің дзюдоисттерібіс пастағы хабыстардох, утырып, марығлардаң сығыбысханнар. Дмитрий Кулумаев пастағы хабыста Уралдағы федеральнай округтың кӱресчізін «иппон» паалағнаң чиңіп алған, че ікінҷі хабыста Алтынзархы-Кидеркі федеральнай округтың спортсменке утыр салған. Іди дее полза, пістің спортсменнерібіс ӱчӱн трибунадағы кӧрігҷілер, хысхырып, чоо «ағырғаннар», чахсы мике итселер, айа сабызы тохтабинчатхан.
Дзюдоисттер уғаа чапчаңнар. Піреезі, микеленіп, «ыырӌызын» тастаза, сағыпчазың - амох учазына чапли халар, «иппон» полар. Чох, тастатхан кӱресчі кииҷе учухчатхан туста, хоосха ла чіли кірлектеніп, хол-азахха татамизер тӱсче. Кӧрерге хынығ. Москваның дзюдоисттері чахсы тимненіп килтірлер. Оларның кӱресчізі Яго Абуладзе сіліг кӱресчеткен, прайзын хыра утчатхан, че ӱзінч,і кругта Санкт-Петербургтың спортсменінең пір дее ниме ит полбин, утыр салған. Утхан Толиб Джебов пазағы хабыста позы утырған.
Иң сіліг кӱрес кӧзіткен Москва командазы ӱчӱн кӱресчеткен Михаил Алдын-оол. Тува оолғы полар тіп сағын салғам. Михаил, прайзын хыра «иппон» паалағларнаң утып, 60 кг теере кӧдірімде чиңісчі полыбысхан.
Ипчілернің кӱрезін кӧрерге мағаа хынығ полбаан. Олар тың сӧӧ тартылчалар, толғалчалар, ээлчелер, тың тастас полбинчалар. Минің кӧңнім санға алылған полза, ипчілерні кӱснең тузаланчатхан спортха (кӱрестің прай кӧрімнеріне, боксха, штангаа паза даа пасхазына) пір дее позытпасчыхпын. Пістің пастағы кӱнде Наталья Малюкова араласхан, че утыр салып, марығлардаң сығыбысхан.
Иреннер аразында, 60 кг кӧдірімде чемпион Михаил Алдын-оол полыбысхан, ікінҷі орында - Заур Калашаов (Краснодар крайы), ӱзінӌі орында - Бахриддин Муминов (Иркутск облазы) паза Магомед Соломгериев (Ленинград облазы), 66 кг: пастағы орында - Иван Спирин (Пермь крайы), ікінҷі орында - Андраник Курдян (Тюмень облазы), ӱзінӌі орында - Евгений Романча (Москва облазы) паза Пайлак Галоян (Хызылчар крайы).
Ипчілер аразында, 48 кг: пастағы орында - Аида Бикбова (Татарстан), ікінӌі орында - Ольга Тарасова (Москва), ӱзінӌі орында - Ксения Тугуши (Вологда облазы) паза Оксана Агазаде (Москва облазы), 52 кг: пастағы орында - Ольга Гагарина (Москва), ікінӌі орында - Антонина Кириевская (Брянск облазы), ӱзінӌі орында - Анастасия Коваленко (Оренбург облазы) паза Марина Гюнтер (Хызылчар крайы).
МАРЫҒЛАР АЗЫЛҒАН
Иирде 17.00 часта Россия Кубогына дзюдоҷа иреннер паза ипчілер аразында марығлар пайрамнығ азылған. Театрализованнай кӧзідіг полған. Марығларны пайрамнығ азарында араласханнар: Хакасияның пазы Виктор Зимин, спорт министрі Валерий Денщиков, Россияның дзюдо федерациязының толдырығ директоры Валентин Хабиров, департамент устағӌызы Анатолий Ларюков, Ағбанның пазы Николай Булакин, Хакасияның дзюдо федерациязының президенті Вячеслав Лесков, марығларның ӧӧн чарғыӌызы Владимир Востриков паза марығларны иртірерге хабасхан предприятиелернің устағӌылары.
Виктор Зимин, чоох тудып, Россияның дзюдо федерациязын мындағ улуғ марығларны иртірерге Хакасияны таллап алған ӱчӱн алғыстаан, республикада спортты тилідеріне хайдағ тоғыстар толдырылғаннаңар искірген, спортсменнерні пӧзік чидіглерге алғаан. Хай пірее улуғ аалҷыларға сыйыхтар читірген. Ідӧк хакас хыстар аалҷыларны айраннаң сыйлааннар.
Россияның гимні толдырылған, Хакасияның гимнін аның авторы, саблығ артизібіс, ырӌыбыс Герман Танбаев толдырған. Валерий Денщиков дзюдоӌа Россия Кубогына марығлар азылчатханнаңар чарлабысхан.
Виктор Зимин паза пасха даа устағӌылар чемпионнарны паза призёрларны сыйыхтирында араласханнар.
АЙДАС ТУВА ООЛҒЫ
19 ноябрьда «Ағбан» спорткомплексте дзюдоҷа марығлар узарадылған. Иреннер 73 паза 81 кг теере кӧдірімнерде кӱстерінен, сынасханнар, ипчілер - 57 паза 63 кг теере кӧдірімнерде. 73 кг кӧдірімде Хызылчар крайының спортсменнерін таныхтирға чарир. Пу хонӌых регионның ікі кӱресчізі сыйыхтығ орыннарға сыххан. Ондар Саян, Тува паза Хызылчар крайы ӱчӱн кӱрезіп, прайзын хыра утып, чиңісчі полыбысхан. Пуох кӧдірімде Хызылчарның кӱресчізі Аламшо Исроилов хола медальны холға кирген. Владислав Михалин (Брянск облазы) кӱмӱс медальнаң паза ікінҷі хола медальнаң Роман Токарев (Воронеж облазы) сыйыхтатханнар.
81 кг кӧдірімде пьедесталға сыххан прай ооллар Кавказтаң полғаннар. Чечняның дзюдоизі Умар-Хажа Сулейманов, ізестіг кӱрес кӧзідіп, финалда Заур Киятовты «иппон» паалағнаң утып, пастағы орынға сыххан. Киятов Краснодар крайы ӱчӱн кӱрескен. Хола медальларны алғаннар Тамаз Болоташвили (Ямало-Ненецкай автоном округы) паза Магомед Абдулкагиров (Ставрополь крайы).
Пу ікі кӧдірімде Хакасияның тӧрт спортсмені кӱрескен. Че Матвей Нам, Михаил Фролов, Савелий Тишкин паза Николай Колесниченко пастағы хабыстарны ирт полбааннар.
Ипчілер сыйыхтығ орыннарда піди турыбысханнар: 57 кг кӧдірімде - 1. Екатерина Доценко (Пермь крайы), 2. Алёна Нефёдова (Хызылчар крайы), 3. Татьяна Казенюк (Краснодар крайы) паза Эльвира Бибарцева (Пермь крайы); 63 кг кӧдірімде - 1. Екатерина Оноприенко (Пермь крайы), 2. Яна Полякова (Свердловск облазы), 3. Татьяна Задорожная (Ставрополь крайы) паза Александра Миловзорова (Москва).
Пу кӧдірімнерде Пермь крайының кӱресчілерін таныхтирға кирек. Медальлар алған сигіс спортсменнің ӱзі - Пермь крайынаң.
ХАЛҒАНҶЫ ЧИҢІСЧІЛЕР
Марығларның халғанҷы кӱнінде иреннернің 90, 100 паза 100 кг азыра кӧдірімнерінде, ипчілернің 70, 78 паза 78 кг азыра кӧдірімнерінде чиңісчілер паза призёрлар табылған. 90 кг теере кӧдірімде иреннер аразында Александр Федосов (Курск облазы), ізестіг чиңіс тудып, Россия Кубогын холға кирген. Ағаа финалда Дмитрий Довгань (Ханты-Мансийскай автоном округы), утыр салып, кӱмӱс медаль алған. Пьедесталда ӱзінҷі орынға сыхханнар Алико Джиландзе (Самара облазы) паза Евгений Иванов (Хызылчар крайы). Иванов ідӧк Хакасия ӱчӱн кӱресче тіп чарлаан диктор.
100 кг теере кӧдірімде сыйыхтығ орыннарға саңай ла чоннар аразындағы класстығ спорт устары сыхханнар. Пастағы орынны Сергей Самойлович (Калининград облазы) холға кирген, ікінҷі орында Михаил Косяшников (Ставрополь крайы) пол парған, хола медальларнаң
Асхаб Костоев (Курск облазы) паза Николай Коваленко (ХМАО) сыйыхтатханнар.
100 кг азыра кӧдірімде спортсменнер піди пьедесталда турыбысханнар: 1. Филипп Иванов (Хызылчар); 2. Никита Дибрин (Тюмень); 3. Роман Бобиков (Тверь), Владимир Молодых (Белгород).
Ипчілер аразында чемпионнарны ла кӧзіт саларбын: 70 кг кӧдірімде - Таисия Киреева (Челябинск облазы); 78 кг - Ольга Артошина (Хызылчар крайы); 78 кг азыра кӧдірімде -Александра Хомын (Санкт-Петербург).
Мыннаң Россия Кубогына дзюдоӌа марығлар тоозылған, аның араласчылары, Россияның дзюдо федерациязы марығларны иртірген оргкомитетке, Хакасияның правительствозына, Ағбанның паза спорт комплекстің администрацияларына, мындағ улуғ спорт мероприятиезін чалтырама иртірген ӱчӱн, алғыстарын читіргеннер.
Автор :
Николай СУЛТРЕКОВ Сомнар Максим АХПАШЕВТИ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы