ПАЛА - ӀҶЕНІҢ ЧАСКАЗЫ, ӦРІНІЗІ, ПОҒДАРХАЗЫ
30.11.2016
Хабарлар
24 НОЯБРЬДА «ХАКАСИЯ» РЕСПУБЛИКА ГАЗЕТАЗЫНЫҢ РЕДАКЦИЯЗЫНДА ИЛЕЕДЕ ААЛӋЫ ЧЫЫЛЫС ПАРҒАН. РЕСПУБЛИКАДАҒЫ АЙМАХ-ГОРОДТАР ГАЗЕТАЛАРЫНЫҢ РЕДАКЦИЯ ТОҒЫНӋЫЛАРЫ ПАЛА-ПАРХАЛАРЫНАҢ ХАДА «ТЕГІЛЕК СТОЛ» ТОҒЫЗЫНДА АРАЛАЗАРҒА ЧЫЫЛЫСХАННАР. РОССИЯНЫҢ ХАБАРӋЫЛАР ПІРІГІЗІНІҢ ХАКАС РЕСПУБЛИКАДАҒЫ ПӦЛИИ ІӋЕ КӰНІ АЛНЫНДА ІӋЕЛЕРНІ ПАЗА ОЛҒАННАРНЫ АРАЧЫЛИР СУРЫҒЛАРӋА «ТЕГІЛЕК СТОЛ» ИРТІРГЕН. МЕРОПРИЯТИЕНІ ИРТІРЕРІНЕ ПІРІГІС ПӰӰЛ ХАКАСИЯНЫҢ ІСТЕНІС ПАЗА СОЦИАЛЬНАЙ ТИЛӀС МИНИСТЕРСТВОЗЫНЫҢ ГРАНТЫН АЛҒАН. УЛУҒЛАР «ТЕГІЛЕК СТОЛ» ТОҒЫЗЫНДА АРАЛАСЧАТХАН ТУСТА, ОЛҒАННАР ІӋЕ КӰНІНЕ ПОС ХОЛЫНАҢ СЫЙЫХТАР ТИМНЕЕННЕР.
«Тегілек столның» тоғызында араласханнар Ағбандағы олған имнег туразының поликлиника пӧлиинің устағӌызы Элеонора Щуракова, Хакасияның істеніс паза социальнай тиліс министерствозынын, специализі Лариса Федотова, «Ӧрініс» республикадағы психолог-ӱгредіг, имнег паза социальнай полызығ кінінің директор орынӌызы Елена Шанова, ідӧк муниципальнай СМИ-ларның хабарӌылары, хайзылары пу сурығларны чарытчалар, ол санда кӧп палалығлар. Чыылығ Россияның хабарҷылар пірігізінің Хакасиядағы пӧлиинің кнезі Ольга Ширковецтің устаанынаң ирткен.
Ольга Валериановнаның чооғынаң, Іӌе кӱні алнында іӌелерні паза олғаннарны арачылир сурығлар олаңай ла кӧдірілбинче. Республикада іҷелерні паза олғаннарны арачылирынӌа улуғ тоғыс апарылча, олох туста пу сурығнаң айғасчатхан хабарӌыларнаң сидік сурығлардаңар піліп алар пӧгін турча, Олар ідӧк іҷе полчалар, пала ӧскірчелер, аннаңар кӱннің хайдағ-да сурығлар пӧкчелер, теен хабарӌылар пірігізінің кнезі. Ағаа хоза, «тегілек столда» пу сурығларнаң айғасчатхан специалисттерге сурығлар пирҷең оңдай пирілген.
Пастағы сӧс «Хакасия» газетаның хабарӌызы Елена Абумоваа пирілген. Елена Олеговна тоғыс хоостыра іҷелерні паза олғаннарны арачылир сурығларнаң кӧп айғасча, хайда-да пӧгерге дее полысча. Ол халғанӌы чылларның алызығларын пос хараанаң кӧрген. Хабарҷының чооғынаң, нинҷе-де чыл мының алнында іӌелері аларға хынмаан палалар республикадағы олған имнег туразында халӌаңнар. Кічіг постары, тӧреендӧк, іҷе паарсазы чох халғаннар. Хабарҷы оларға уғаа айаан, пір хызыӌахты алып алар кӧңні полғанох. Пу киректі сағысха киріп, Елена Абумова харах чазын тудын полбаан.
Республиканың телевидение сетьі «Ӏҷемні сағыпчам» проектті тоғындыр сыххан. Аны апарча Ольга Камзалакова. Проект чуртасха киріліп пастааннаң республикадағы олған тураларында ӧкіс олғаннар саны пілдірте хызырыл парған. Олғаннар наа сӧбіре тапханнар. Телепрограмма ӧкіс олғаннарға часкалығ олған тузына ізеніс пирген.
Позының тузазын ағылча Саяногорсктағы «Твоя среда» газета, хайда ӧӧн редактор полча Светлана Герасименко. Светлана Сергеевнаның чооғынаң, олар, газета сығарызынаң пасха, тастындағы рекламанаң, аймах мероприятиелер тимнирінең, иртірерінең айғасчалар. Мероприятиелернің ӧӧн чардығы кемге-де полызығ чыырынаң палғалыстығ полча. Олар - акциялар, концерттер, хайзыларынаңар анаң газетада кӧп пазылча, искірілче, салтарлары пирілче. Пу чылның иң танығлығ проектінің пірсі - «Ізеніс кӱні», хайда прай ниме «пасхаӌыл» олғаннарға (кинек олғаннарға. - Авт.) тимнелген: ойыннар, марығлар, иппотерапия.
Элеонора Щуракованың чооғынаң, Ағбанда педиатрлар тоғызына удаа хоп кірче, ӧӧнінде имӌі ағырчатхан палаа асхынах хайчатханынаң палғалыстығ. Элеонора Щуракованың таниинаң, республиканың ӧӧн городында пір педиатр, 850 паланы сыныхтағда тудар орнына, ортымахти 1100-1200 паланаң тоғынча, ол санда пір часха читкелек 120-150 паланаң. Аннаң пасха, ол тоғысты компьютер полызиинаң апарча, ағаа пічіктернең кӧп тоғынарға килісче. Аннаңар ортымахти пip палаа сыныхтағ тузында 7 минутадаң кӧп пирілбинче. Хаӌан имӌі аннаң чахсы чоохтазарға маңнанар?!
Ольга Валериановна халғанӌы чылларда республикада іӌелернің паза пip час толдырғалах палаларның ӱрепчеткені пӧзік синде полчатханына хайығ айландырған. Че ол кӧзідіг, азах аар ипчі пала тапчаң туразар кіріп, имҷілернің хал тудынызы сылтаанда ӱреенінең не палғалыстығ нимес. Ағаа ідӧк пір час толдырғалах палаларның, кинен полып, ӱреені теелче. 2016 чылны алза, пастағы чарым чылда республикада іҷелернің паза пip час толдырғалах палаларның ӱрепчеткені Россия синіндегі кӧзідігдең тӧбін полған полза, ікінҷі чарым чылында пістің кӧзідіг ол синні аза халған. Пу кӧзідіге ідӧк теелген Ағбан пилтірі аймаанда, іӌезінең хада узаанда, час паланың тыны ӱзілгені. Мындағ киректер санын хызырар пӧгіннең, час палалығ сӧбірелернең паланы алынӌа узударға киректепчелер.
Хакасияның істеніс паза социальнай тиліс министерствозының специализі Лариса Федотова ведомство устаанаң тоғынчатхан учреждениелердеңер чоохтаан: Саяногорсктағы паза Харатастағы реабилитация кіннерінеңер, халғанӌызының пӧлии полча Кызластағы реабилитация кіні паза «Теремок» сағызы уйан олғаннарға тура-интернады. Пу учреждениелер полызиинаң чуртастың сидік оңдайларына кір парған палаларға полызығ пирілче. Чоохтирға кирек, Кызластағы реабилитация кінінің тоғызынаңар «Хабар» газетаның хабарӌызы Татьяна Тютюбеева пасхан. Пу учреждение тоғызы хоостыра пістің чонның сағыссыраҷаң сурығлар илееде. Сағынчам, Татьяна Тютюбееваның статьязы хығырығҷыларның хайиин тартхан.
Редакцияларның кӧп палалығ сӧбірелерін искенде, олар, пала таапчатханда даа, ӧскірчеткенде дее, хазнаа тың на ізенмееннер. «Аскизский труженик» газетаның хабарҷызы Галина Боргоякованың кӧрізінең, ӧӧні - паланы тоғысха кӧніктір саларға, палаларны ынағ чуртирға ӱгредерге, андада олар чуртаста даа постарына килістіре орынны сидіксіністер чох таап алчалар. Галина Васильевнаның палалары постаң, прайзы сӧбіреліг, постарына сыданчалар. Амды аны пархаҷахтары ӧріндірчелер. Ол, тізең, оларға позының паарсазын, хынызын читірче.
«Палаларны ӧскірчеткенде, піс оларға кӧп ниме идерге чаратпаҷаңмыс, ол хакас кибірлерінең не палғалыстығ нимес. Пӱӱнгі кӱнде, психологтарны искенде, палаа «чарабас» сӧсті чоохтанарға чарадылбинчаттыр. Ам пархаларға аны чарабас, мыны чарабас пір дее тібинчем», - хатхырып ала чоохтапча Галина Васильевна. Чоохтирға кирек, Галина Боргоякова даа, «Сельская правда» газетаның делопроизводители Татьяна Эрина даа палаларын сидік 1990 чылларда ӧскіргеннер, че пӱӱн олар хайдағ-да улуғ сидіксіністерге урунғаннарын сағысха кирбинчелер. Я, сидік полған, че іӌе-паба сурығларны хада-пірге пӧкчең. Оларның пір пӧгін турған: палаларны азырирға, тонандырарға, ӱгредерге.
Ольга Валериановна «тегілек столның» тоғызына чӧпсінген. Сынында газеталар тоғынҷылары, полған на кӱн тоғынып, хайдағ улуғ тоғыс итчеткеннерінеңер сағынминдаачалар. Ағаа хоза, ибде хайынарға, сӧбірее чіӌең ниме тимнирге, палаларның ибдегі тоғызын сыныхтирға маңнанарға кирек. Че іӌе кізее ол олаңай кирек, ол аны кӱннің сай толдырча, андағ оңдайнаң тоғыста даа маңнаныстығ тоғынча, ибдегілеріне дее тус таапча.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы