РЕСПУБЛИКАДА АТ СПОРТЫ ТИЛІПЧЕ
30.11.2016
Хабарлар
Хакасияның пазы Виктор Зимин республиканың ат спорты федерациязының президентi Ольга Сличнаянаң паза АА.Магдалиннің адынаң ат спортынӌа олған спорт школазының директоры Татьяна Чупинанаң тоғасхан. Тоғазығда олар регион пазына постарының чидіглерінеңер паза школа тоғызынаңар чоохтааннар.
Хайди таныхтаан Виктор Зимин, Хакасияда кӧп чыллар ат спортынӌа пӧзік синніг марығлар иртірілче.
- Сірер уғаа сидік спортнаң айғасчазар, аның салтарлары кӧп нименең палғалыстығ. Спорттың пасха кӧрімнерінде кізілер ле араласчатхан полза, мында ат хозылча. Сірернең хости улуғ «пала» полча тиирге чарир. Ол пірее нимее хыныхсыбин сыхча, ағырыбысча. Атнаң айғазары сидік полчатханын мин позым пілчем. Атты, пала чіли, чахсы кӧрерге кирек: имнирге, ӱгредерге, марығларға тимнирге... Ідӧк посха чахсы тимненістіг поларға кирек, - теен Виктор Зимин.
Ольга Сличнаяның паза Татьяна Чупинаның чооғынаң, пу чыл ат спортына пӧзік чидіглер ағылған. Хакасияда ат спортынӌа тиксі Россиядағы марығлар пӧзік синде ирткеннер.
Сибирьдегі регион пастағызын на андағ пӧзік синніг марығларны иртірді. Пістің спортсменнерібіс, постарын турыстыра кӧзідіп, нинҷе-де ӧӧн сыйыхты холға киргеннер.
- Виктор Михайлович, Сірернің полызииңарнаң піс марығларда араласчаң чахсы аттар алып алғабыс. Анзы ӧӧні полған. Ідӧк аттар марығласчаң чазының сиденін алыстырып алғабыс, - таныхтаан Ольга Сличная.
Республиканың спортсменнері Кемеровта ирткен троеборьеҷе марығларда постарын ідӧк чахсы кӧзіткеннер. Анда Сибирьдегі федеральнай округтың спортсменнері араласханнар.
Виктор Зиминнің чооғынаң, ат спорт школазында чабых манеж пӱдірии узарадылар. Школаның тоғызын, тӧбін тӱзірбин, улам пӧзік синге кӧдірерге кирек полар, ағаа прайзының хайии киректелер.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы