ПІРГЕ ТОҒЫСТЫ ТӰЗІМНІГ АПАРАРБЫС
02.12.2016
Хабарлар
Хакасияның пазы Виктор Зимин тоғыс чорығынаң Сойан-Сус ГЭС-та пол килген. Анда ол «РусГидро» ПАО устаа кнезі Николай Шульгиновнаң, орынҷылары Владимир Маркиннең паза Борис Богушнаң, Сойан-Сус ГЭС директоры Валерий Кяринең хада гидроэлектростанцияны нааӌылирын тоосчатхан тоғыстарны кӧрген.
Валерий Кяри 2009 чылдағы саай соонаң ГЭС-ты нааҷылирынҷа паза андағы тоғысты хорғыс чох идерінӌе хайдағ технология оңдайлары тузаланылғанынаңар искірген. Хакасияның пазы делегациянаң хада Сойан-Сус ГЭС-тың машиннай залын паза устаҷаң ӧӧн пультын кӧріп алған.
Николай Шульгинов Сойан-Сус ГЭС-тағы пар резервтернең Хакасияның производствозын паза экономиказын тилідерінде тӱзімніг тузаланарға чарирын таныхтаан:
- Піс Хакасия пазы Виктор Зиминнең хаҷанох тоғазып аларға сағыс тутхабыс. Амды тоғасханда, сидіксіністерні пӧгерінде хада тоғынарға киректелчеткенінеңер удур-тӧдір пілізіс таап алғабыс, Сағынчам, пістің пірге тоғыс узарадылар. Пасха оңдай чоғыл, республикада мындағ улуғ энергообъект - Сойан-Сус ГЭС - пар нооза. Гидростанция хорғыс чох паза ізестіг тоғынары піске дее, регион устағҷызына даа кирек. Аннаңар пістің пірге толдырҷаң пӧгіннер кӧп.
Владимир Маркин станция хысха тус аразына толдыразынаң даа нааҷылал парғанын таныхтаан:
- Иң не пастап, ол - станцияда тоғынчатхан кізілернің, республиканың устағ-пастааның паза «РусГидроның» чидии. Олар прайзы пірге тоғынғаннар нооза. Ол чох мындағ улуғ чидіглерге чит полбассың. Мындағ объекттерні піди чапчаң паза, ӧӧні, чахсы качестволығ тыхтирға уғаа сидік. Сойан-Сус ГЭС - ол пістің хазнадағы ла нимес, тиксі тилекейдегі иң чахсы, амғы тусха килістіре энергетика объекттерінің пірсі. Мин Европаның кӧп объекттерінде полғам, ізендірчем, Сойан-Сус ГЭС иң артых.
Станцияны кӧрген паза «РусГидроның» устағ-пастаанаң хада чыылығда араласхан соонаң регион устағҷызы ідӧк сағыстарынаң ӱлескен:
- Тоғазығ чахсы сағыстар артысхан. Ӧӧні, піс пӱӱн республика чуртағҷыларының чуртазын хорғыс чох идерінӌе чоохтазып алғабыс. Піс пірге тоғысты тӱзімніг апарарбыс. Пісті исчелер паза истерге тимделер. Пӱӱн «РусГидроның» устағӌылары прай социальнай объекттерде пол килгеннер. Кӧріп алғаннар кізілер хайди чуртапчатханын, гидростанция тоғынӌыларының палалары хайда ӱгренчеткенін паза хайдағ олған садынзар чӧрчеткенін, хайдағ спорт пӱдіріглері парын. Станцияның техническай саринаң компания устағӌылары ідӧк тее таныс полғаннар тіп сағынчам. Иң ӧӧні - олар пістің чирні кӧріп алғаны, пістің чуртаснан, чағын танысханы. Пу чорыхтың ӧӧн салтары анзында.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде