ІЗЕНІС ХАҶАН ДАА УСПИНЧА
02.12.2016
Хабарлар
Ағбандағы «Теремок» кинек палаларның туразында пip оолах чуртапча. Аның ады - Саша Салдыгашев. Чуртазында ағаа аар ӱлӱс тӱскен - оолах азахтары чох тӧреен. Ол олаңай даа аар ӱлӱстіг, че улам сидік, хаҷан аны тӧріткен iҷе-пабазы тастабысхан.
«Теремок» олған туразы 2008 чылдаң сығара тоғынча. Сашаны олох чылда пеер Пилтірдегі олған туразынаң ағылғаннар. Ол мында сигіс чыл чуртап парир. Амды оолахха 15 час.
- Саша - амыр оолағас, - чоохтапча аның воспитательі Карина Сергеевна Чечиева, - ол ӱгренерге хынча, спортнаң паза теелбекнең айғасча. Город синінде коляскалығ кинек олғаннарға спорт марии иртсе, Саша хаҷан даа I алай II орын алча. Оолах туюх нимес, уғаа ӧткін паза хаҷан даа чалтанмас. Позына сыданча. Прайзынаң ынағласча.
Саша «Теремоксар» наа ла килгенде, андар пабазы тоғазарға кил парӌаң полтыр. Пӱӱнгі кӱнде андар пірдеезі килбинче. Пу олған туразында палалар 18 частыға теере чуртапчалар. Анаң олар Пилтірдегі алай Тойымдағы психоневрология интернаттарында чуртапчалар. Саша нандыра Пилтірзер парарбын тіпче. Оолах компьютердегі ойыннарны ойнирға хынча.
- Мында компьютер клазынзар чӧрчем, - тіпче ол. - Комнатада компьютер турғызарға чарабас, пасха олғаннар аны оот саларлар. Пилтірзер чуртирға парзам, тасхар даа сыхпин, компьютердегі ойыннарны ойнирбын. Пилтірде мині нанҷыларым сахтапчалар, удаа сығдыратчалар.
Сашаның позының сотовай телефоны пар. Аны ағаа олған туразының администрациязы чахсы хылии-оңдайы ӱчӱн сыйлап пирген. Амды оолах прайзын сомға суурча паза телефондағы сарыннарны исче.
Оолах воспитательлеріне чахсы полысча, комнатаны арығлапча, постарына сыдан полбинчатхан палаларны тонандырыбысча. Прайзы Сашаа паарсапча, ағаа конфеттер ағыл пирчелер.
- Хайдағ тӱстер кӧрчезің, Саша? - сурғам оолахтаң.
- Аймах тӱстер - чахсы паза хорғыстығ, - нандырған ол. - Чахсы тӱстерімде воспитательлерімні паза ӱгретчілерімні кӧрчем, хорғыстығ тӱстерде - зомбилерні.
Сашаның воспитательі Карина Сергеевна «Теремок» олған туразында 2009 чылдаң сығара істен парир. Тоғысха ол Хубачардаң чӧрче. Ағбандағы Хакас хазна университедін тоосхан соонаң ол, кинек олғаннарнаң тоғынар ӱчӱн, квалификациязын алыстырған.
Таныхтирға кирек, Саша кічігдең сығара теелбекнең айғасча. Пӱӱл октябрьның халғанӌы кӱннерінде ол теелбекче ӱгретчізі Любовь Губорчукнаң Москвазар чӧрген. Анда олар, Чоннар аразындағы «INCLUSIVE DANCE» теелбек фестивальында аралазып, III орын алғаннар.
- Мин, Сашанаң хада теелбек салчатханымда, пос алынӌа сағынғам, нимезінең Саша пасха палалардаң пасхалалча? Чох, ол кинек палаа тӧӧй нимес. Теелбектензе, оолахтың чуртасха ӧрінчеткені іле кӧрінче, ол коляскада одырчатханын ундут салчатхан чіли пілдірче, аның пилі дее сала тӱзеділ парған. Саша чон аразында позын ипти тудынча, хаҷан даа наа ниме піліп аларға кӱстенче, - чоохтапча хореограф-ӱгретчі Любовь Губорчук.
Сашанаң паза Любовь Витальевнанаң хада Москвазар педагог-психолог Евгений Сергеевич Дубовский чӧрген. Ол оолахха самолётха одырарға-тӱзерге полысхан, оолахха чӧптер пиріп одырған. Олған туразынаң сыхпинчатхан пала пастағызын на Москвазар парған нооза, мындағ улуғ мероприятиеде аралазарға ол тың чӱрексеен. Хайди за чӱрексібес, фестивальда 12 хазна паза Россияның 40 регионы араласхан нооза (прай 500-ке чағын кізі!).
- Піс Москваның ӧӧн орамаларынҷа чӧргебіс, сомға суурынғабыс, - чоохтапча Саша. - Москва - улуғ город, анда чон кӧп, машиналар аар-пеер ойлат чӧрчелер. Мин пастағызын на метроны кӧргем. Чуртаабыс гостиницада. Пазох андағ улуғ мероприятиеде араласчаң кӧңнім пар.
Фестивальда Саша Салдыгашевтің паза Любовь Губорчуктың командазы «Ізеніс» адалған. Оолах пу марығда I орын алып аларға ізенген, че 500 азыра араласчы аразында олар III орынға турысханнары даа уғаа махалығ чидіг.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде