РОССИЯ ПЕРВЕНСТВОЗЫ - ХУБАЧАРДА
02.12.2016
Хабарлар
Хакасия пазох улуғ марығ - волейболҷа Россия первенствозын - иртірче. Анда 2000-2001 чылларда тӧреен хыстарның Сибирьдегі паза Ыраххы Востоктағы командалары араласчалар. Таныхтирға кирек, мындағ улуғ марығ - волейболӌа тиксі Россиядағы турнир - пастағызын на аалда иртірілче. Спортсменнер Алтай аймаандағы Хубачар аалның «Колос» спортзалында кӱстерінең сынасчалар. Чиңіс ӱчӱн, марығларның ээзі «ЦСКА-Хакасиядаң» пасха, Хабаровск паза Хызылчар крайларының, Сахалин паза Иркутск областьтарының командалары кӱрезіг апарчалар.
29 ноябрьда Хубачардағы «Колос» спортзалда волейболӌа Россия первенствозы пайрамни азылған. Анда Хакасияның пазы Виктор Зимин, спорт министрі Валерий Денщиков паза пасха даа устағҷылар араласханнар. Виктор Михайлович, чыылысхан чонны паза спортсменнерні чылығ удурлаан ӱчӱн алғыстап, республиканың ӧӧн командазындағы хыстар аның кӧзіне піди ӧс парыбысханнарын таныхтаан.
- Хызыҷахтар постарының тренерінең хада кӱстіг команда пол парғаннар. Олар кӧп айдас чиңіс тутханнар. Ам олар, Армияның ӧӧн спорт клубы флагын тудып, марығласчалар. Пістің чир-суғчыбыс, Россияның, арачыланыс министpi Сергей Шойгуны алгыстирға сағынчам, ол республикаа чахсы полысча, пістің хызыҷахтарға мындағ марығларда аралазар оңдай пирген. ЦСКА-ға кірчеткен школаларның пірсі - пістің школабыс. Мындағ пӧзік синніг марығларны пастағызын на аалда иртрерге чарадығ алғаннарға улуғ алғыс. Ол - пістің хызычахтарның чидии. Прайзына оң ползын, айдас чиңістер! Піс полған на команданың чиңізіне ӧрінербіс. Че мин пістіңнер ӱчӱн «ағырарбын»! Прайзын волейбол ӱлӱкӱнінең! - теен Виктор Зимин.
Пастағы матчта Иркутск паза Сахалин областьтарының волейболисттері тоғасханнар. Пастағы партияны Иркутсктың спортсменнері 25:17 саннаң утып алғаннар. Ікінҷі партияда Сахалиннің волейболисттері тоғырланмааннар даа - 4:25. Ӱзінҷі партияны ідӧк иркутсктағылар 25:15 саннаң утханнар. Андағ оңдайнаң Иркутск облазының командазы 3:0 саннаң ізестіг чиңіс тутхан.
Ікінҷі ойында пістің «ЦСКА-Хакасия» команда ідӧк 3:0 саннаң Хабаровск крайының командазын ізестіг утып алған.
30 ноябрьда Хабаровск крайының хыстары Иркутск облазының волейболисттерінең тоғасханнар. «ЦСКА-Хакасия» команда Хызылчар крайы спортсменнерінең ойнаан. Ікі партияны пістің хыстар 25:13, 25:9 саннарнаң утханнар. Ӱзінҷізінде хызылчардағылар - 25:17 саннаң, че тӧртінҷі партияда пістің команда оларға маң пирбеен - 25:13. «ЦСКА-Хакасия» матчты 3:1 саннаң утхан.
Пӱӱн 12:00 частаң Хызылчар крайы паза Сахалин облазы ойын командалары тоғасчалар, 14.00 частаң «ЦСКА-Хакасия» команда - Иркутск облазындағыларнаң.
Таңда 12.00 часта Хабаровск крайының спортсменнері Хызылчар крайының командазынаң ойнирлар, 14.00 часта «ЦСКА-Хакасия» Сахалин облазының командазынаң тоғазар. 15.30 часта чиңісчілерге паза призерларға сыйыхтар читірілер, марығлар пайрамнығ чабылар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы