ООЛЛАРНЫҢ АДЫН АХТИР ӰЧӰН
06.12.2016
Хабарлар
Декабрьда «Единая Россия» партияның региондағы пӧлиинде Россияның Федеральнай чыылииның Федерация Чӧбінің кізізі - Хакасияның Ӧӧркі Чӧбінең сығарылған кізізі Евгений Серебренников чуртағҷыларнаң тоғазығ иртірген. Чоохтирға кирек, Евгений Александрович Федерация Чӧбінің оборонаӌа паза безопасностьча комитет кнезінің пастағы орынӌызы полча, аннаңар чуртағҷыларның даа сурығлары чааӌылар киреенең палғалыстығ полғаннар. Кӧні чоохтаза, пу тоғазығ пістің сенаторға уғаа аар ирткен сағынчам. Іӌе-пабалар оолларының чуртазы ӱзілгені хоостыра істезіг комитеттерінің паза чааӌы чарғыларының чарадығларынаң чараспинчалар.
Иң пастағызын сенаторнаң тоғасхан Россияның чааӌылар іӌелері комитедінің региондағы пӧлиинің кнезі Мария Давыденко. Ол тоғазыға килген іӌе-пабаларның киректерінеңер хысхаӌахти искірген. Мария Валерьевна ідӧк оолғы чох халған. 2005 чылда, тізең, ведомство общежитиезі, хайда Давыденколар чуртааннар, кӧйген. Ол тустаң сығара сӧбіре чурт суриин пӧк полбинча, теесте турча. Евгений Александрович ағаа, кирек пічіктерні тимнеп, позының адына сурыныс пічиин пазарға теен.
Харатас городтың чуртағҷызы Галина Шутованың оолғы 2011 чылда, армия службазын иртчеткенде, позына хол салыныбысхан. Официальнай чарадығнаң іӌе кізі чараспинча, пис чыл аразына ол, позының істезиин апарып, оолғы чох иттіргенін киречілепчеткен искіріглер тапхан. Че амды аны истерге хынминчалар. Іҷе кізі оолғының адын ахтирға сағынча: ол служба иртчеткенде ӱреен тіп чарадығ алдыртарға кӱстенче. Киректің ӧӧн сидіксінізі - кирек чааӌылардаң істезіг комитедіне пиріл парғаны. Ӏҷенің кӧрізінең, пу сурығнаң чааӌылар айғазарға кирек. Евгений Серебренников пічіктерні кӧрглеен, оолғы чох халған іӌее киректі сыныхтағда тударға молӌаан.
Хайдағ кізі палазы ӱрееннеңер амыр чоохтап полар, уламох хаҷан аның чуртастаң пос кӧңнінең парғаны ікінӌілестіг полза?! Іӌе кізее ол уғаа аар чӱк, нинңе дее чыл иртсе, аның ағырии хызырылбинча. Позының оолғының киреен чоохтапчатханда, харах чазын тудын полбаан Надежда Благодатских. Оолғынаң хада ӱр ниместе чоохтасхан ипчі аны ибінде тут полбаан. Ікі пасха ӧдік кизіп, оол тасхар парыбысханнаңар искірген аның хонҷығы. Хараа тооза іӌе оолғын тілеен, участковайзар айланған, че, кізіні ӱс кӱн пазынаң на тілепчеткеннеңер, ағаа полызығ пирілбеен, иртенінде, тізең, оолғы ӧліг табылған...
Алнындағы киректер осхас Геннадий Пахтаевтің кирее, хайзының оолғы 2012 чылда ӱреен. Паба кізі кӱстенізінең пір ай пазынаң уголовнай кирек азылған, че оолғы кинен полып ӱрееннеңер чарадығ алылған. Итсе, оолғы чох иттіргенін киречілепчелер томсктағы эксперттер. Иреннің прай пічіктер пар, че киректі хатап істезерге пирбинчелер, пічіктеріне хайығ салылбинча. Иреннер кӧп чоохтанминчалар, пичелге пастырза даа, чоохтарында анзы пір дее пілдіртпес. Ідӧк пик тудынған Геннадий Степанович.
Евгений Александрович сигіс чуртағӌынаң тоғасхан, Прайзы чааӌылар киректерінең палғалыстығ полған. Сенаторға сурығларны сыныхтағда тударға паза орыннаң тибіредерге полызар аның полысчызы Виктор Преловский паза «Единая Россия» партия.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы