ЧАПСЫСТЫҒ ПӰДІРІГ
14.12.2016
Хабарлар
Республиканың туризмҷе хазна комитедінің искіриинең, Ағбан пилтірі аймаанда Хакасияда ат чарызы иртірҷең паза туризмні тилітчең пастағы чабығлығ комплекс тимге сыхты. Ол «Алтын подкова» адалча.
Чабығлығ комплексті азарында араласхан паза чоох тутхан Ағбан пилтірі аймааның пазы Елена Егорова. Пастап спорт школазының ӱгренчілері аттығ сіліг чӧр полчатханнарын кӧзіткеннер. Анаң аймахтағы ветераннар хоры, «Добро» чайаачы ӧменің араласчылары улуғ нимес ойын кӧзіткеннер.
- Аттығ чӧргені кізіні амыр тудынарға, пасхаларынзар чалахай хайарға кӧніктірче. Хаҷан чалаң ойлатчатсаң, чирге теңмин, учухчатханға тӧӧйзің. Хайдағ ӧрініс! Аннаңар аттығ чӧрерге хынчам, - теен позының алғыстас сӧзінде Ағбан пилтірі аймааның пазы Елена Егорова.
- «Алтын подкова» чабығлығ комплекс азылғанда, хайдағ даа туста аттығ чӧрерге ӱгренерге паза аймах марығлар иртipерге чарир, - таныхтаан позының чооғында республиканың туризмҷе хазна комитедінің кнезінің тоғызын толдырчатхан Дмитрий Белоногов.
Анаң ол «Алтын подкова» чабығлығ комплекстің пастығы Эдуард Ухваринге, Хакасияда туризм тилідеріне улуғ хозым итчеткен ӱчӱн, Аарластығ пічік читірген. Ідӧк, мындағ чахсы комплекс азылғанынаң алғыстап, сыйыхтар читіргеннер Хакасияның аал хонии паза ас-тамах министрі Игорь Гердт, республиканың ат чарызы спортынҷа федерация президентінің орынӌызы Геннадий Кайманов паза даа пасхазы.
Ат чарызы иртірҷең паза туризмнең айғасчаң «Алтын подкова» комплекс 2010 чылда тоғынып пастаан. Амды, чылдаң чылға тиліп, чабығлығ комплекс пол парды. Ағаа хоза, аның кічіг гостиница, чайғы ибіҷектер, кафе паза банкет залы пар.
Автор :
Тимнеен Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы