ХАЛЫХТАР ПАЛАТАЗЫ ТӰЗІМНІГ ТОҒЫНҒАН
27.12.2016
Хабарлар
Республиканың правительство туразында Хакасияның Халыхтар палатазының пленарнай чыылии ирткен. Анда Халыхтар палатазының 2016 чылның тоғыс салтарларынаңар паза 2017 чылға пӧгіннерінеңер сурығлар кӧрілген.
Чыылығда Хакасия пазының орынӌызы Владимир Крафт, Россия президентінің Сибирьдегі федеральнай округтағы полномочиеліг кізізі аппарадының Хакасиядағы ӧӧн федеральнай инспекторы Виктор Чернышев, кізі праволарынӌа Хакасиядағы уполномоченнай Александр Чистотин, республиканың министерство-ведомстволарының устағӌылары, муниципальнай аймахтардағы Халыхтар палаталарының кнестері араласханнар.
Пӱӱл Халыхтар палатазы хайди тоғыныбысханынаңар чоох тутхан палатаның кнезі Ольга Левченко. Ол ӧӧнінде Халыхтар палатазы республиканың экономиказын тилідер паза социальнай сурығларны пӧгер пастағларнаң, чӧптернең ӱлгӱ органнарынзар сыхханнаңар, хайди ӱлгӱ структуралары ол чӧптерге хайғаннаңар искірген. Палата ӱлгӱнің тоғызындағы читпестерні критикаа тартча, андағ ла оңдай-наң ілезіне сығысчатхан читпестерні тӱзедіп аларға чарир.
Левченконың чооғынаң, палата ӱлгӱ органнарына пирген чӧптернің кӧбізі чуртасха кирілче. Ӱлгӱ паза халых пірігістері партнёрлар поларға киректер. Прай ниме закон хоостыра иділерге кирек. Пӱӱл палата Хакасияның табығ комиссиязынаң, юстиция управлениезінең паза аал хонии министерствозынаң хада-пірге тоғынардаңар чӧптезіглер идіп алған. Амды андағ он чӧптезіг иділ парған. Палатаның тоғызында республиканың прай даа органнарының кізілері араласчалар.
Кӧп хайығ салылған ӱгредіг, хазых хайраллир, социальнай сурығларға. Чииттернең кӧп тоғыс апарылған. Мында ХГУ-ның, ХТИ-ның ӱгретчілеріне, студенттеріне алғыс сӧстерін читірерге кирек, олар тоғыста чахсы хабасханнар. Ӧкіс палаларны сӧбірелерге пирер тоғыс ідӧк кӧп апарылған. Палатада кізілерге тикке юридическай полызығ пирілче. Кізілер аймах сурығларнаң айланчалар: льготаларӌа ахча тӧлелбинчеткенінеңер, льготалығ имнер пирілбинчеткенінеңер, чал ахчазынаңар. Ӱлгӱ органнары, ол сурығларны пӱкӱлее пӧкпин, алынҷа кізілернең не тоғынчалар.
Iдӧк палата коммерческай нимес пірігістернің (НКО) VIII форумын иртірген. Анда Россияның Халыхтар палатазының ӱс эксперті онлайн оңдайынаң араласхан. НКО-лар ӱгредіг, культура, хазых хайраллир сфераларда тоғыс апарчалар, чииттернең, хызылып чуртапчатханнарға полызығ пирер сурығларнаң айғасчалар. Россия президентінің чооғынаң, социальнай сурығларны пӧкчеткен НКО-ларға ахча бюджеттең позыдылар. Республиканың министерстволары андағ гранттар аларға марығлар иртіргеннер, 15 НКО гранттар алған.
Хакасияның город-аймахтарында сигіс Халых палатазы тоғынча. Амды Ағбан пилтірі паза Асхыс аймахтарында андағ палаталар тӧстирге пӧгінчелер. Республиканың чуртазында чон ам ӧткін араласча. Халых чон ӱлгӱнең сыбыра чараспинча, аны критикаа тартча. Палатадағы кізілер пос кӧңнінең тоғынчалар, оларға пір дее ахча тӧлелбинче,
Ольга Левченко пасха даа кӧп тоғыс апарылғанынаңар искірген. Аның соонда Халыхтар палатазының комиссиялар кнестері чоох тутханнар. Олар постарының сфераларындағы тоғыс салтарларынаңар паза хайдағ пӧгіннер тутчатханнарынаңар искіргеннер, чӧптернең сыхханнар. Оларның аразында культура, нациялар паза религиялар аразындағы хайызығлар сурығларынӌа комиссияның кнезі Людмила Растащенованың пастаана хайығ айландырарға чарир. Ол Хакасияда Ынархас туразын азар чӧпнең сыххан, андағ туралар пасха регионнарда пар одыр. Анда аймах нация кізілері, чыылызып, хада-пірге тоғынар сурығлар ӱзӱрерлер, мероприятиелер иртір турарлар.
Ынархас туразын азар сурыға Владимир Крафт таа чӧпсінген, ідӧк ол Халыхтар палатазының тоғызын пӧзікке паалап, ӱлгӱні критикаа тартарға хығырған. Іди хада-пірге тоғынза ла, чахсы салтарға чидерге чарир.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы