ПІСТӀҢ ХАБАРҶЫ ПРЕЗИДЕНТТІҢ ПРЕСС-КОНФЕРЕНЦИЯЗЫНДА АРАЛАСТЫ
30.12.2016
Хабарлар
Ӏкінӌі хати "Хабар"газетаның тоғынҷыларына Россия президентінің улуғ пресс-конференциязында аралазарға оңдай полған. Пӱӱл Москвазар мин, редакцияның ӱгредіг паза наука пӧлиинің хабарҷызы Оксана Сунчугашева, чӧргем. Ідӧк пресс-конференцияда PTC телекомпанияның паза Шира, Ағбан пилтірі аймахтар газеталарының редакторлары араласханнар. Пис кізі парғабыс. 12-ӌі пресс-конференция Чоннар аразындағы садығ кінінде 23 декабрьда ирткен.
Пӱӱл иң кӧп кізее аккредитация пирілген -1437 хабарӌаа, ирткен чылнаң тиңнестірзе, 50 кізее кӧп. Пӱӱл хабарӌыларның 68 суриина президент Владимир Путин 3 час 50 минута нандырған.
Россия президентінің пресс-конференциязына хабарӌылар пip пӧгіннең килчелер - президентке чонны сағыссыратчатхан сурығны пирерге. Конференцияа парарынаңар мин пip ай азынада пілгем. Анаң чорыхха тимненіс пасталған. Чазырбин чоохтаза, президентке сурығ пирері уғаа нандырығлығ, аннаңар матап чӱрексеем. Пастап ӱгредіг киреене теелчеткен сурығ тимнеем, че халғанӌы кӱнінде ӧӧн редактор Радион Сунчугашев Хакасияда тоғынчатхан кічіг аалларны хайраллир паза тилідер программадаңар сурығ тимнирге чӧп пирген. Анзы, минің кӧрізімнең, иң хайығ тартчатхан сурығ. Піс Хакасияда тоғынчатхан кічіг аалларны хайраллирынӌа республика программазын, федеральнай синде алып, пасха регионнарӌа тарадардаңар сурығ тимнеебіс.
Пресс-конференция иртер кінзер піс иртеезін читкебіс. Азынада "Хакасия" пазылых плакаттар тимнеп алғабыс. Конференция иртер кінзер иң пастағылар санында килген поларбыс тіп сағынғабыс, че пістің алныбыста чон илееде полған.
Тоғазығ 12.00 часта пасталған. Піс пастағы рядтарда орын таап аларға азынада чоохтас салған полғабыс, аннаңар залда ал-алынҷа одырғабыс. Андада президентке сурығ пирерге оңдай хозылча нооза.
Тус читкенде, залзар президент кірген. Ол, тоғазығны сӧӧ тартпин, ағаа сурығлар пирерге чаратхан. Иң пастап сурығны "Маяк" радиостанцияның корреспонденті пирген. Ол президенттең иртчеткен чылның салтарларын искір пирерге сурынған. Хайди чооғында таныхтаан Владимир Владимирович, тиксі алза, Россия 2016 чылда прай даа сфераларда чахсы ӧзіс кӧзіткен. Ол экономикада, аал хониинда, чаа структураларында паза даа пасхазында. Иң кӧп сурығ Россия экономиказының тилізіне теелген. Ідӧк хабарҷылар спортта полчатхан хатығластардаңар сурғаннар.
«Советский спорт» газетаның хабарҷызы Владимир Путиннең Россияның спортсменнері допинг амзапчатхан тіп пыролаттырчатханынаңар сурған.
- Спорт паза культура, политика киректеріне пip дее теелбин, чоннарны піріктірерге киректер. Пістің спортсменнерні допинг амзапчатхан тіп пыролапчатханы - ол пip кізінің пырозы. Ол кізі (адын адабинча, - Авт.), хырығ озаринаң Россиязар тоғынарға киліп, аннаң піссер хайдағ ла препараттар ағылбаан! Таңнастығ, хайди ол хырығны ипти иртіп алӌаң, - таныхтаан Владимир Путин.
Пастағы каналның хабарӌызы Антон Верницкийге президентке сурығ пирерге оңдай полғанох.
- Россияда чуртағӌыларны тикке имнепчелер паза ӱгретчелер. Че сынында хай пірее имнег паза ӱгредіг киректеріне іҷе-пабаларға ахча тӧлирге килісче? - сурған хабарӌы.
Иркутскта чон ачығ суғ ізіп ӱрепчеткеннеңер сурғаннарох. Президенттің иртер табығларда
аралазарын алай араласпазынаңар чыл сай сурчалар. Пӱӱл пу сурығ полғанох.
Президенттің пресс-конференциязында кӧп хабарҷылар араласчатханнаңар, прайзына сурығ пирерге оңдай полбинча.
Кӧзідімге, Сахалиннең килген хабарӌы Светлана Коцубинская Курил олтырыхтың тилізінеңер сурығ тимнеп салған полған, че сурығ пирерге киліспеенӧк.
- Ідӧк піс Владимир Владимирович Сахалинзер саналығ чыларға хығырарға сағынғабыс. Пістің уғаа чахсы курорттар пӱтчелер, - чоохтапча хабарҷы.
Хырығ озаринаң килген хабарҷылар Украинаның, Европаның паза Американың аразындағы хайызығлардаңар сурығлар пиргеннер. Хайди нандырған президент, Россия nip дее хазнанаң ыырлазарға сағынминча. Че олох туста, пістің хазназар чаанаң кірзелер, піс оларға нандырарға тимдебіс. Піс кӱстігбіс.
Минің кӧрізімнең, Россия президенті Владимир Путин - кӱстіг, ниме итчеткенін паза аның тоғызы хайдағ салтарларға ағыларын чахсы пілчеткен политик. Полған на сурыға аның нандырии тимде полған.
Автор :
Оксана СУНЧУГАШЕВА. Ағбан - Москва - Ағбан
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде