ПАСХА ЧОН ХАЙДИ НАА ЧЫЛНЫ УДУРЛАПЧА?
30.12.2016
Хабарлар
ИНДИЯ. Наа чыл алнында Индияның чуртағӌылары хоосхалар соонӌа чӱгӱр чӧрчелер. Пу - оларның пурунғы кибірі.
Наа чыл алнындағы иирде позын улуғлапчатхан индус таныс нимес кізінің хоосхазын, тудып алып, тосханҷа азырап саларға кирек. Іди ікі час аразына прай хоосхалар тох чӧрчелер. Индустар, тізең, тырбахтал парған, че ӧрчіліг сырайлығ, ӱлӱкӱн столы кистіне одырып, удур-тӧдір алғыстасчалар.
БОЛГАРИЯ. Наа чыл хараазында тиксі хазнада чарытхы ӱр нимеске ӱс парча. Ол тус аразына удур-тӧдір охсанызарға маңнанарға кирек. Че ноға харасхыда? Нандырығ! Ирепчі хырыс салған алай піреезі хазинезін пу харахнаң кӧрбинче, кемге-де ипчізі чархастығ полча... Мында, тізең, харасхыда кемні дее охсанчат!
Че пap пip сидіксініс. Соох хысхы хараада піреезі чарытхы столбазын охсаныбызып, ағаа ирнінең чапсын парча. Андада ӧнетін служба хыйалға кір парған кізее полызарға маңзырапча. Чарытхы пирзелер, прайзы Наа чылны таныхтапча.
ИТАЛИЯ. Наа чыл хараазын Италияның городында пас чӧрерге хорғыстығ. Кибір хоостыра анда иргі ниме-нооларны кӧзенектең сығара тастирға киректелче. Че чуртағҷылар, тізең, холға кірген прай нимелерні тастапчалар.
Перінӌек ипчілер, арғаас иреннер, хазыр хазинелер ол кӱн суғдаң даа амыр, оттаң даа чабыс пазыс чӧрчелер. Кем, кирек чох ниме-ноо чіли, кӧзенектең тастаттырарға хынар.
ШВЕЦИЯ. Амыр шведтернің кибірлеріне хайхирға ла халча, Наа чыл алнында олар иргі ідіс-хамысты нанӌыларының ізіктеріне оода саапчалар. Тігілері, тізең, анзына тың ӧрінчелер, нинҷе кӧп сӱлейке -анӌа ахча! Орамаларны сыбырчатхан кізілер ле ӧрінминчелер. Че олардаң пірдеезі сурбинча.
Халғанҷы туста иң кӧп сӱлейке налоговай служба ізии тастында чайыл халча. Шведтер налогтар тӧлирге хынчалар тіп сағынмаңар. Чох! Кибірге сылтанып, олар хынминчатхан ведомствоның ізіктерін паза кӧзенектерін сайбирға кӱстенчелер, анаң хандыра кӧңніліг Наа чылны удурлирға парчалар.
ШОТЛАНДИЯ. Шотландияда маң пирбес паза махачы чон чуртапча. Кибір-чозахтары даа оларның хылых-оңдайларына килістіре. Удур-тӧдір хыныстары ус парған ирепчілер Наа чылда ла чарылысчалар.
Куранттар саап пастаза, Шотландия чуртағҷылары чархастығ ипчілерін алай ирлерін чурттаң сығара сӱрчелер. Піреезі ибдең ӧрініснең парыбысча. Ибдең парарға хынмин, тура ізиине дее тудынза, аны сығара сӱрібізерлер. Андағларға Наа чылны тасхар удурлирға килісче. Позы пыролығ! Чабал хылиин позында тудынарға кирек полған.
Кирек чох кізілер ибдең парыбыссалар, халғаннары Наа чылны удурлапчалар.
БИРМА. Чыл ибіре чылығ полчатхан Бирма хазнаның чуртағӌыларының иң чахсы кибір пар. Олар Наа чылда орамаларҷа париған узах частығ апсах-инейлернің, тохтадып алып, пастарын чуупчалар. Анаң удур-тӧдір суғнаң чаба сазысчалар. Ол кӱн пірдеезі хуруғ кип-азахтығ полбинча. Прайзы ӧрчіліг!
Автор :
Тимнеен Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы