НИМЕ САҒЫПЧАЗАР 2017 ЧЫЛДАҢ?
30.12.2016
Хабарлар
Полған на кізі Наа чылдаң чахсы ла ниме сағыпча паза хайдағ-да пӧгіннер турғысча. Ниме сағыпчалар Хакасияның чуртағҷылары килер Таңах чылынаң?
Ирина ЧЕБОЧАКОВА, ХакНИИЯЛИ-ның тіл пӧлиинің наукаҷа ӧӧн тоғынҷызы:
- Чир ӱстӱнде чаа полбазын. Чон иреелестер чох чуртазын. Пістің республикада чуртас тилізін. Чоныбыстың саны ӧссін. Пістің тілібіс, чітпин, тилізін. Хакас аалларында палалар пос тілінең чоохтассыннар. Хакас тілін пілчеткен кізілер палаларын пос тіліне ӱгретсіннер. Чоныбыстың чӱзер чыллар чыылған культура ис-пайы чітпезін. Хазна программалары тилізін. Кӧзідімге, республиканың кічіг паза ыраххы аалларын хайраллиры - уғаа чахсы, тузалығ программа.
Терминология комиссиязында тоғынчам. Анда аймах организацияларның кізілері істенчелер. Чӧптіг тудынзабыс, пу тоғыс тӱзімніг, чахсы парар.
Мин 2017 чылда хакас тілінде сӧс пӱдірілчеткенінеңер монография сығарыбызарға пӧгінчем. Прайзын Наа чылнаң алғыстапчам!
Милентина АМЗАРАКОВА, "Трудовая доблесть Хакасии" халых пірігістің региондагы пӧлиинің кнезі:
- Хакасияның пазы Виктор Зимин халых чонзар Айланызында 2016 чылда чахсы салтарлар полғанынаңар искірген. Хакасия аннаң андар тилир тіп таныхтаан. 2017 чыл пістің республикаа уғаа чахсы чыл полар тіп ізенчем. Полар туссар ізеніснең кӧрчем. Чиит тӧлге кӧп хайығ салылар тіп молҷаан Хакасияның пазы. Анзы орта тіп санапчам. Амғы туста хазна аал хониина чахсы полысча, фермерлерге гранттар пирілче. Пу хабазығ аннаң андар пирілері ӧріндірче. Кічіг паза ыраххы аалларға ідӧк хабазығ пирілче. Че улуғ даа аалларға полызарға кирек. Анда даа полызығ кирексіпчеткен чон чуртапча. Хазна программалары килер чылда аннаң андар тоғынар тіп ізеніс пар.
Михаил БОЗЫКОВ, фермер:
- Піс, аал хонии тоғынӌылары, ӧзімнер паза маллар ӧскірерге чахсы чыл ползын тіп сағынчабыс. Чайғыда, от тоғынып алар ӱчӱн, чахсы кӱннер турзын. Кӱскӱде тоңастығларны чыып аларға чылығ кӱннер поларына ізенчем. Маллар, ағырығларға хаптырбин, чахсы ӧссіннер. Ідӧк 2017 чылда кредиттер тӧлебізерге пӧгінчем. Кресен-фермер хониин тилідерге кредит алғам. Аны табырах тӧленібізерге сағыс тутчам. Прайзын чағдапчатхан Наа чылнаң алғыстапчам!
Ольга АБУМОВА, кічіг паланаң ибде одырча:
- Асхыста тура пӱдірчебіс. 2017 чылда, читіре пӱдірібізіп, андар кӧзіп аларға пӧгінчебіс. Ідӧк футболӌа тилекей чемпионадына билеттер алып аларға кӱстенербіс. Мин футбол кӧрерге хынчам, аннаңар тилекей чемпионадында пол килерге сағыс тутчам. Килер чылда улуғ паламның олған садынзар теезі чидеріне ізенчем.
Прай чӱреемнең чир-суғӌыларымны алғыстапчам чағдапчатхан Наа 2017 чылнаң! Пу чыл сӧбіреңерге чахсы чуртас паза таңдағызына ізеніс ағылзын!
Галина СУБРАКОВА, сас хырыхчаң ус:
- Килер чылға улуғ пӧгіннер турғыспаам. Ахча ла читкіҷе ползын. Оңдай полза, Таиландсар алай Хыдатсар тынанарға пар килерҷікпін. Таңах чылында прайзының сағынған сағызы толзын. Чоныбысха пик хазых, чахсы чуртас алғапчам.
Автор :
Сурастырған Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде