ХАКАСИЯНЫҢ САБЛЫҒ ООЛҒЫН САҒЫСХА КИРІП
20.01.2017
Хабарлар
Ирткен чылның халғанҷы кӱннерінде Н.Г.Доможаковтың адынаң национальнай библиотекада писатель Иван Мартынович Костяковтың пайрамнығ чазына чарыдылған мероприятие ирткен.
5 декабрьда хакас чонның саблығ оолғына 100 час толарҷых. Библиотеканың конференц-залында писательнің палалары, туған-чағыннары, арғыстары паза Иван Мартыновичтің чайаачызына хынчатхан улус чыылысхан. Пайрам литература тоғазии чіли иртірілген, аны библиотека тоғынӌыларынаң хада писательнің палалары Валерий, Сергей паза Галина Костяковтар тимнееннер.
Иван Мартынович Костяковтың чуртас чолынаң паза чайаачызынаң филология наукаларының кандидады, ХакНИИЯЛИ-ның фольклор пӧлиинің наукаӌа улуғ тоғынӌызы Юлия Чаптыкова таныстырған. Ученай «Чібек хур» романның, «Харах оды чох аңӌының чооғы» паза «Атығӌы Иремей» чоохтарның ӧӧн сағызын чарытхан.
Писательнің палалары пабаларынаңар ідӧк кӧп чапсых ниме чоохтааннар. Иван Мартынович армияа 1941 чылда хабылған. Олох чыл хакас оол Москваны ыырӌыдаң арачылаан. Анаң ағаа Украинада паза Белоруссияда хазыр хабыстарда аралазарға киліскен. Сергей оолғының таниинаң, хада чааласхан арғыстары писательні Грузин адаӌаң полтырлар. Ол спортнаң айғазарға хынӌаң, чаада даа, кӧп нимес пос тус пар полза, кізілерні чыып алып, футбол ойнаӌаң полтыр. «Пабабыс пісті спортха хынарға, чир-чайаанны хайраллирға ӱгреткен. Аның кӱстенізінең туңмам Галина, шахматнаң айғазып, спорт узы кандидатха читкен», - хозылған харындазының чооғына Валерий Иванович. Чайаачы устың палалары аның адын турыстыра ал чӧрерге кӱстенчелер. Сергейнең Галина инженер полып тоғынғаннар, Валерий оолғы аймах предприятиелерде устағӌы полған. Амды олар прайзы тынағда. Пайрамда ідӧк Иван Мартыновичтің Камиль кӧргенегі араласхан. Ӧтіг ӱнніг пис частығ оолах саблығ писательнің «Асхыс» кибелізін хығыр пирген. Кӧрігӌілер кічіг хығырығӌаа аптаттырғаннар.
Таныхтирға кирек, Иван Мартынович хакас газетазында тоғынған кізі. Ол «Хызыл аалда» 1939 - 1941 чылларда істенген. Ханнығ чааға парыбызып, поэт газетадаңар ундубаӌаң, ол «Хызыл аалзар» фронттаң сыбыра хабарлар ыс турған. Оларның пірсін пайрамға килген чонға экранда кӧзіткеннер. Илбек Ада чаа соонда писатель газетанаң пик палғалыс тутхан, аның чайаачы тоғыстары «Хызыл аалда», 1959 чылдаң «Ленин чолында» тӧреміл сыхчаңнар. «Чібек хур» романның ӱзіктерінең пурун газетаның хығырығӌылары танысханнар.
Пайрамның ікінӌі чардығында И.М.Костяковтың чуртазына паза чайаачызына чарыдылған наа кинденің презентациязы ирткен. Аны библиотеканың тоғынӌылары писательнің пайрамнығ чазына тимнептірлер. «Иван Мартынович Костяков» киндеде чайаачы устың хайдағ тоғызы ноо чылларда сығарылғаны прай кӧзіділ парған.
Ідӧк литература тоғазии тузында Н.Г.Доможаковтың адынаң национальнай библиотеканың директоры Юлия Костякованың паза писательнің хызы Галина Ивановнаның аразында чӧптезіг иділген. Амды хакас чонның саблығ оолғының тоғыстары библиотеканың сайтына сығарылар, хығырығӌыларға оларнаң танызар оңдай полар.
Писатель Иван Мартынович Костяков хакас литературазына улуғ хозым иткен, ол чуртазын, чайаачызын позының чонына чарытхан. Кибелістер, чоохтар, роман пастыра ол кізілерні чуртасха хынарға, чир-чайаанны хайраллирға ӱгреткен. Аннаңар аның ады хаӌан даа чонда халар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде